جاس سۋرەتشى نۇرجان سولتانبەكوۆتىڭ نەگىزگى باعىتى كەسكىندەمە ونەرى مەن گرافيكا ەدى. كادىمگى قالامساپپەن سالعان يلليۋستراتسيالىق سۋرەتتەرى ەرتەگى كىتاپتارعا سۇرانىپ-اق تۇر. باتىرلاردى سالعان بەينەسىنە قاراساڭىز, سىرت كەلبەتىن كورىپ قانا قويمايسىز, ىشكى رۋحىن دا سەزىنگەندەي بولاسىز. ءار سۋرەتىنە جاۋاپكەرشىلىكپەن قارايتىن نۇرجان ءاتۇستى ءجۇرىپ, قولىنا قارىنداش المايدى. جايلانىپ-تولعانىپ بارىپ, اسىقپاي كىرىسكەن ءجون دەپ ەسەپتەيدى ءوزى. سوندىقتان دا شىعار, ءار جۇمىسى ساپالى, تارتىمدى بولىپ شىعادى.
زامانداستارى نۇرجاننىڭ سالعان سۋرەتتەرىنە قاراپ, ەرتەگى كىتاپتاردىڭ يلليۋستراتورى بولۋعا ابدەن لايىق ەكەنىن ايتادى. راس-اۋ, بۇگىندە بۇلدىرشىندەر قىزىعاتىنداي قازاقى سۋرەتتەر جوقتىڭ قاسى. بالانىڭ ساناسىن «چەلوۆەك پاۋك», «حالك», «بۋبا» سىندى قايداعى جوق كەيىپكەرلەر جاۋلاپ العان زاماندا ۇلتتىق بولمىسىمىزعا جاقىن, وسكەلەڭ ۇرپاققا تاربيە بەرەتىندەي كورنەكىلىكتەر كەرەك-اق.
گرافيكا, كەسكىندەمە جانرىندا جۇمىس ىستەپ جۇرگەن نۇرجان سولتانبەكوۆ سەمەيدەگى №19 مەكتەپكە جۇمىسقا ورنالاسقاننان بەرى اعاشتان رەترو كولىك جاساۋدى ەرمەك ەتىپ ءجۇر.
– اعاش ونەرىمەن اينالىسۋ ويىمدا بولعان ەمەس. وسى مەكتەپكە كەلگەن سوڭ اعاشتان جاسالعان رەترو كولىكتىڭ شاعىن ماكەتىن كوردىم. اياقتالماعان ەكەن. ونى وسى مەكتەپتە مۇعالىم بولعان ءبىر اعامىز باستاپ, كەيىن قايتىس بولىپ كەتىپتى. سونى اياقتاعان سوڭ وسىنداي ماكەتتەر جاساۋعا كىرىستىم, – دەيدى جاس سۋرەتشى.
قازىرگى ۋاقىتتا نۇرجاننىڭ قورىندا رەترو كولىك ماكەتىنىڭ بەسەۋى بار. جيىرما شاقتى جۇمىس جينالعان سوڭ كورمە وتكىزۋدى دە ويلاستىرىپ وتىر. ول كونە كولىكتەردى عالامتورداعى سۋرەتتەرىنە قاراپ جاسايدى ەكەن. ءجۇز پايىز ۇقساتپاسا دا مولشەرىن كەلتىرەدى.
سەمەي قالاسىنىڭ تۋماسى نۇرجان سولتانبەكوۆ كوللەدجدەن سوڭ جوعارى ءبىلىم الۋ ءۇشىن 2012-2015 جىلدارى شاكارىم اتىنداعى سەمەي مەملەكەتتىك ۋنيۆەرسيتەتىنە ءتۇسىپ, «بەينەلەۋ ونەرى جانە سىزۋ» مۇعالىمى ماماندىعىن الىپ شىققان. بۇگىندە سەمەيدەگى №19 مەكتەپتە كوركەم ەڭبەك پەن بەينەلەۋ ونەرىنەن ساباق بەرەدى. اعاش, گرافيكا جانرىنان بولەك ساندىك قولدانبالى ونەرمەن دە شۇعىلدانادى.
سەمەي
