بۇكىلالەمدىك بوكس سەرياسىنىڭ وتكەن ماۋسىمداعى چەمپيونى Astana Arlans كومانداسى جاڭا چەمپيوناتتىڭ ءبىرىنشى كەزدەسۋىن 15 قاراشا كۇنى الماتىدا Baku Fires كومانداسىمەن وتكىزىپ, 4:1 ەسەبىمەن جەڭىسكە جەتتى.
بۇكىلالەمدىك بوكس سەرياسىنىڭ وتكەن ماۋسىمداعى چەمپيونى Astana Arlans كومانداسى جاڭا چەمپيوناتتىڭ ءبىرىنشى كەزدەسۋىن 15 قاراشا كۇنى الماتىدا Baku Fires كومانداسىمەن وتكىزىپ, 4:1 ەسەبىمەن جەڭىسكە جەتتى.
كەزدەسۋ استانالىقتاردىڭ جەڭىلىسىنەن باستالدى. وندا ءانۋار مۇزاراپوۆ ازەربايجان قۇراماسىنداعى رەسەيلىك لەگيونەر حامزا نامەتوۆكە جول بەرىپ الدى. سودان كەيىن باعدات الىمبەكوۆ قارسىلاسى – تاعى ءبىر لەگيونەر ماگومەد گۋربانوۆتى ۇتىپ, ەسەپتى تەڭەستىردى. سوسىن اسحات ءۋاليحانوۆ باكۋلىك وسمان اليەۆتى تىزە بۇكتىرىپ, كوماندانى العا شىعاردى.سودان كەيىن قازاقستاندىقتار ساپىنداعى ۋكراينالىق لەگيونەر سەرگەي دەرەۆيانچەنكو قوناقتار قۇرامىنداعى بەلارۋس نيكولاي ۆەسەلوۆتى نوكاۋتقا ءتۇسىردى. ال ماتچتاعى سوڭعى نۇكتەنى ءبىزدىڭ ۆاسيلي لەۆيت قويدى. ول ابدۋلكادىر ابدۋللاەۆتى تالاسسىز جەڭدى.
Astana Arlans كەلەسى كەزدەسۋىن 23 قاراشادا ماسكەۋدە Russian Boxing ۇجىمىنا قارسى وتكىزەدى. بۇرناعى كۇنى بۇل ماتچقا شىعاتىن بوكسشىلاردىڭ دا ەسىمدەرى بەلگىلى بولدى. «ارلانداردىڭ» باس جاتتىقتىرۋشىسى سەرگەي كورچينسكيدىڭ ايتۋىنشا, رەسەي استاناسىندا كوماندا نامىسىن قورعايتىن بەس بوكسشىنىڭ اراسىندا ولجاس ساتتىباەۆ (52 كگ), سامات باشەنوۆ (60 كگ), مەيىرىم نۇرسۇلتانوۆ (69 كگ), دانابەك سۋجانوۆ (81 كگ) جانە حورۆات لەگيونەرى فيليپ حرگوۆيچ (+91 كگ) بار.
رەسەيلىكتەر ءبىزدىڭ بەس بوكسشىعا الەمنىڭ 2011 جانە 2013 جىلدارعى چەمپيونى ميشا الويان (52 كگ), ادلان ابدۋراشيدوۆ (60 كگ), الەكساندر يۆانوۆ (69 كگ), دميتري بيۆول (81 كگ) جانە سەرگەي كۋزمين (+91 كگ) قۇرامىنداعى كومانداسىن قارسى قويعالى وتىر.
استانا كومانداسى وسى جولى ءۇش بىردەي دەبيۋتانتتى – ولجاس ساتتىباەۆتى, مەيىرىم نۇرسۇلتانوۆتى جانە دانابەك سۋجانوۆتى رينگكە شىعارادى.
دامير قوجامقۇل.
