ليديا سيدورەنكو 85 جاستا, جۇرگىزۋشى ءوتىلى 61 جىلدى قۇرايدى. ول جولدا ءوزىن ءتارتىپتى ۇستاۋدىڭ ۇلگىسى بولىپ تابىلادى – وسى ۋاقىتقا دەيىن ول بىردە-ءبىر بۇزۋشىلىق جاساماعان. وسى ۋاقىتقا دەيىن بارلىعى ءتورت اۆتوموبيل باسقارعان: بەرىلىس قورابى رۋلمەن باسقارىلاتىن “موسكۆيچ-ۆوسمەروچكا”, ليديا الەكساندروۆنا ونى وسىلاي ەركەلەتىپ اتاعان, سوسىن قىزىل ءتۇستى “موسكۆيچ – 2140”, 1990 جىلى ونى اقشىل-سارى ءتۇستى “ۆاز-2106” ماركالى كولىككە الماستىرعان. 2011 جىلى “ۆولگا” گاز-24 ماشيناسى بولعان, وبلىس جۇرگىزۋشىسى ونى ءالى كۇنگە دەيىن باسقارادى.
جۇرگىزۋشى كۋالىگىن جامبىل قالاسىندا 1959 جىلى العان, بىراق ەشبىر كولىك ۇيىمىندا جۇمىس ىستەمەگەن, ۇزاق جىلدار بويى وبلىستىق تۇتىنۋشىلار وداعىندا ەڭبەكتەنگەن.
جەرگىلىكتى پوليتسيا قىزمەتى باسقارماسىنىڭ اۋماعىندا ليديا سيدورەنكونىڭ پوليتسيا دەپارتامەنتىنىڭ باستىعى جانات سۇلەيمەنوۆپەن كەزدەسۋى ءوتتى. وندا قاتارلاسىپ – “ۆولگا”, “موسكۆيچ”, “جيگۋلي” ماركالى جەتى رەتروماشينالار بوي تۇزەدى. ولاردىڭ كەيبىرىن ليديا الەكساندروۆنا جەكە ءوزى باسقارىپ, پوليتسيانىڭ جاس قىزمەتكەرلەرىنە كولىك باسقارۋ شەبەرلىگىن كورسەتتى.
– كوپ جىلدار بويى قازاقستان رەسپۋبليكاسىنىڭ زاڭدارىن جانە جول قوزعالىسى ەرەجەلەرىن قاتاڭ ساقتاپ, جوعارى سانالىق جانە جاۋاپتى ازاماتتىق پوزيتسيا ۇستانعانىڭىز ءۇشىن سىزگە شىن جۇرەكتەن العىسىمدى بىلدىرەمىن. ازاماتتارىمىزدىڭ اراسىندا جۇرگىزۋشىلەر ءتارتىبىن قالىپتاستىرۋعا جانە نىعايتۋعا قوسقان ۇلەسىڭىز باعا جەتپەس. سىزگە زور دەنساۋلىق, ۇزاق عۇمىر, وتباسىڭىزعا اماندىق پەن بەرەكە تىلەيمىن! – دەدى جانات سۇلەيمەنوۆ.
گەنەرال ليديا سيدورەنكوعا العىس حات, گۇل شوعى جانە قۇندى سىيلىق تاپسىرا وتىرىپ, ىقىلاسىن ءبىلدىردى.
پد باسشىلىعىنا قامقورلىعى مەن ىقىلاسى ءۇشىن العىس ايتىپ, ليديا سيدورەنكو بارلىق جۇرگىزۋشىلەرگە كەلەسى سوزدەرىن ارنادى:
– قۇرمەتتى جۇرگىزۋشىلەر! جول قوزعالىسى ەرەجەلەرىن مۇلتىكسىز ساقتاڭىزدار, جول ۇستىندە جۇرگىزۋشىلەر رەتىندە ءبىر-بىرلەرىڭىزدى قادىرلەڭىزدەر. اسىرەسە بۇل جاستارعا قاتىستى. سوندا عانا ءتارتىپ ورناپ, جول-كولىك وقيعالارى مەن قايعىلى وقيعالار از بولماق.
كەزدەسۋ, كەڭەستىك زاماننىڭ اۆتوموبيل قۇرىلىسى تاريحىنا كىشىگىرىم ەكسكۋرسيامەن اياقتالىپ, ەڭ ءتارتىپتى جۇرگىزۋشى 85 جاستاعى ليديا سيدورەنكو قويىلعان رەترواۆتوموبيلدەر ەرەكشەلىكتەرى تۋرالى اڭگىمەلەپ, ءىس جۇزىندە كولىكتەردى باسقارىپ كورسەتتى.
