كەزدەسۋ بارىسىندا الەۋمەتتىك كاسىپكەردى انىقتايتىن نورمالار مەن ولشەمدەردى زاڭنامالىق دەڭگەيدە ەنگىزۋ, وسى باعىتتا وقىتۋ ءىس-شارالارىن وتكىزۋ, جاڭا فورماتتاعى بيزنەسمەندەرگە سىيلىق بەرۋ ارقىلى قولداۋ جونىندە ۇسىنىستار ايتىلدى.
الاڭ اياسىندا تابىستى الەۋمەتتىك كاسىپكەر, "Green Tal" الەۋمەتتىك شەبەرحاناسىنىڭ نەگىزىن قالاۋشى ەمين اسكەروۆ مودەراتور رەتىندە ءسوز سويلەدى. سونداي-اق, "ورتالىق ازيانىڭ ەۋرازيا" قورى وكىلى ايگۇل تاعاتوۆا, "Impact Hub Almaty" قۇرىلتايشىسى ينديرا شاح, قازاقستاننىڭ الەۋمەتتىك كاسىپكەرلەر قاۋىمداستىعىنىڭ پرەزيدەنتى جانە "ەلداني" قوعامدىق قورىنىڭ ديرەكتورى گۇلزيرا امانتۇرلينا, "رادوست" قايىرىمدىلىق دۇكەنىنىڭ نەگىزىن قالاۋشى مەرۋەرت ارگيمباەۆا, "Generation" قوعامدىق بىرلەستىگىنىڭ نەگىزىن قالاۋشى ۆلاديسلاۆ گولياركو, ەكولوگيا سالاسىنداعى الەۋمەتتىك كاسىپكەر ميراس ابباسوۆ جانە باسقا دا ساراپشىلار ءوز ۇسىنىستارىن بەلسەندى تۇردە ءبىلدىردى.
سپيكەرلەردىڭ ايتۋىنشا, وسى سالانى دامىتۋدىڭ نەگىزگى پروبلەمالارى: الەۋمەتتىك كاسىپكەرلەر ءۇشىن بىرىڭعاي پلاتفورمانىڭ بولماۋى, مەملەكەت تاراپىنان الەۋمەتتىك كاسىپكەرلەر ءۇشىن پرەفەرەنتسيالاردىڭ بولماۋى, سونداي-اق اقپاراتتىق جاريا ەتۋدىڭ جەتكىلىكسىزدىگى.
ايتىلعان ۇسىنىستار قازاقستان رەسپۋبليكاسى پارلامەنتى سەناتىنىڭ دەپۋتاتتارى باستاماشى بولعان الەۋمەتتىك كاسىپكەرلىك ماسەلەلەر جونىندەگى زاڭ جوباسىندا كورىنىس تابادى.
ەستەرىڭىزگە سالا كەتەيىك, اتالمىش سالادا پارمەندى ۇسىنىمدار ازىرلەۋ ءۇشىن وسىنداي ديالوگ الاڭدارى "الەۋمەتتىك كاسىپكەرلىكتى دامىتۋ الەۋەتىن زەردەلەۋ جانە ونى دامىتۋدىڭ نەگىزگى ادىستەمەلەرىن ازىرلەۋ" زەرتتەۋى اياسىندا, قر اقدم باستاسىمەن وتكىزىلدى.
