ايماقتار • 25 قازان، 2020

قوعامدىق كولىك جۇرگىزۋشىلەرىنە ايىپپۇل سالىندى

146 رەت كورسەتىلدى

اقتوبە وبلىستىق پوليتسيا قىزمەتكەرلەرى  قوعامدىق كولىك جۇرگىزۋشىلەرىنىڭ جول قاۋىپسىزدىگى ەرەجەلەرىن ساقتاۋىن باقىلاۋ ماقساتىندا رەيد جۇرگىزدى دەپ حابارلايدى، Egemen.kz.

پوليتسەيلەر سوڭعى ءۇش كۇن ىشىندە قالاداعى اۆتوبۋس جۇرگىزۋشىلەرى اراسىندا  400-دەن استام قۇقىق بۇزۋشىلىقتى انىقتاپ، اكىمشىلىك  حاتتاما تولتىردى. رەيد بارىسىندا قوعامدىق كولىك جۇرگىزۋشىلەرىنىڭ ەڭ قاراپايىم جول ەرەجەلەرىن ساقتاي بەرمەيتىندەرى انىقتالدى. ماسەلەن،   24  جۇرگىزۋشى  جولاۋشىلار تاسىمالداۋ ەرەجەسىن ورەسكەل بۇزعان، رەيسكە شىققان  16 قوعامدىق كولىك  مىندەتتى تەحنيكالىق تەكسەرىستەن وتپەگەن.  60 جۇرگىزۋشى  كولىك جۇرگىزىپ كەلە جاتىپ  ۇيالى تەلەفوندى پايدالانعان،  24 جۇرگىزۋشى جىلدامدىقتى اسىرعان. رەيد بارىسىنداعى وسى زاڭ بۇزۋشىلىقتارعا بايلانىستى "اۆتوپارك" جشس مەكەمەسىنىڭ  7 لاۋازىمدى تۇلعاسى اكىمشىلىك جاۋاپكەرشىلىككە تارتىلدى.

سونداي-اق جۇرگىزۋشىلەر ەڭ ءجيى بۇزاتىن  زاڭ بۇزۋشىلىقتارعا كولىك باسقارىپ كەلە جاتىپ تەلەفونمەن سويلەسۋ،  جىلدامدىقتى ارتتىرۋ، توقتاۋ سىزىعىنان شىعىپ كەتۋ، جاياۋ جۇرگىنشىلەرگە جول بەرمەۋدى جاتقىزۋعا بولادى. رەيد قورىتىندىسى بويىنشا كولىك باسقارىپ وتىرىپ ۇيالى تەلەفونمەن سويلەسكەن جۇرگىزۋشىلەردىڭ ارقايسىسىنا  13 مىڭ تەڭگە كولەمىندە ايىپپۇل سالىندى.

قوعامدىق كولىك جۇرگىزۋشىلەرى اۆتوبۋس سالونىنداعى   جولاۋشىلار قاۋىپسىزدىگىنە دە، كوشەدەگى قوزعالىس ەرەجەلەرىن ساقتاۋعا دا بىردەي جاۋاپتى. الايدا قۇزىرلى مەكەمەلەردىڭ ءجيى-ءجيى ەسكەرتۋىنە قاراماستان، قوعامدىق كولىك جۇرگىزۋشىلەرىنىڭ اراسىندا جاۋاپكەرشىلىكتى  سەزىنبەيتىندەر ءجيى ۇشىراسادى. ولاردىڭ قىزمەتىنە قاتىستى  شاعىمدار دا ازايماي تۇر.  ايتا كەتۋ كەرەك، بيىلعى جىلدىڭ توعىز ايى ىشىندە  قوعامدىق كولىك جۇرگىزۋشىلەرىنىڭ كەسىرىنەن  9 جول-كولىك وقيعاسى  بولىپ، ودان  7 ادام جاراقات الىپ، 1  ادام قايتىس بولدى.

سوڭعى جاڭالىقتار

ۇقساس جاڭالىقتار