رۋحانيات • 24 قازان، 2020

ويسىلقارا اۋليە كەشەنى قورعاۋعا الىندى

حرومتاۋ اۋدانىنىڭ وڭتۇستىك-باتىس باعىتىندا، اۋدان ورتالىعىنان 35 شاقىرىم جەردە ويسىلقارا اۋليە قورىمى بار. ور وزەنىنە قۇياتىن ويسىلقارا بويىندا مۇحاممەد پايعامباردىڭ زامانىنداعى يسلام ءدىنىن تاراتۋشىلاردىڭ ءبىرى – ويسىلقارا اۋليە جەرلەنۋى مۇمكىن، دەپ حابارلايدى Egemen.kz.

بايان قۋاندىققىزى

ەل ىشىندە تۇيەنىڭ ءپىرى – ويسىلقارا ەسىمىمەن تانىلعان ۋايس ال-قوراني ساحابانىڭ جەتى جەردە بەيىتى بار دەپ ايتىلادى. سولاردىڭ ءبىرى باتىستان شىعىسقا سوزىلىپ جاتقان كارى مۇعالجار قىراتتارىنىڭ شەتكى تۇسى، ويسىلقارا وزەنىنە جاقىن توبەشىكتەگى قورىم. 1980 جىلدارى ولكەتانۋشى، سول كەزدەگى وبلىستىق تاريحي-ولكەتانۋ مۋزەيىنىڭ ديرەكتورى رىسجان ىلياسقىزى ويسىلقارا اۋىلىنىڭ تۇرعىندارى –تۇرسىن نۇرمۇقانوۆ، عيلمان تولەزباەۆ، اباي جاقسىلىقوۆتان وسى جەردىڭ قارتتارىنان جەتكەن اڭىزدى جازىپ العان. اۋىل اقساقالدارىنىڭ ايتۋىنشا، جەتى جۇرتتى ارالاپ قارتايعان ساحابا وسى جەرگە جەتكەندە، تۇيەسىن شوگەرىپ ومىردەن وتكەن. ساحابا قايتىس بولعان كەزدە، ونىڭ دەنەسىن الىپ كەتكەن ادامدار وسى توبەشىكتەن جەتى باعىتقا قاراي تاراسقان. ارقايسىسى جەتەكتەگەن تۇيەگە ارتقان ساندىقتا ويسىلقارا اۋليەنىڭ دەنەسى جاتىپتى دەگەن اڭىز قالعان.

ۇلكەن توبەدە ەڭ ءبىرىنشى بولىپ ساحابا جەرلەنگەن سوڭ باسقا بەيىتتەر كەيىنىرەك پايدا بولعانعا ۇقسايدى. قورىمنىڭ شەتىندەگى مۇك باسقان كونە تاستارمەن قورشالعان ويسىلقارا زيراتىن ادامدار اياعىمەن تاقىرلانعان ەسكى سۇرلەۋ قورشاپ جاتىر. اۋليە زيراتىن ءۇش اينالا تىلەك تىلەۋ ءۇردىسى ەجەلدەن وسى كەزگە دەيىن جالعاسىپ كەلەدى. تاس قورىمنىڭ وڭتۇستىك بەتىندە «قىز اۋليە» اتانعان ەكى تاس بەلگى تۇر. بۇل جەردەگى زيرات تاستارىنىڭ كوپشىلىگىنىڭ ورتاسىندا ويىقشالار تەسىلگەن.

حرومتاۋ اۋداندىق تاريحي-ولكەتانۋ مۋزەيىنىڭ ديرەكتورى نۇرگۇل امانعاليەۆانىڭ ايتۋىنشا، كەڭەس وكىمەتى ورناماستان بۇرىن ويسىلقارا وزەنىنىڭ بويىن جايلاعان جۇرتتىڭ اقساقالدارى باباسىنان جەتكەن اڭىزداردى كەيىنگىلەرگە اماناتتاپ وتىرعان. ويتكەنى، بۇل ولكەدە ادامدار كوشى ەجەلدەن جالعاسىپ كەلەدى. ال، پايعامبار زامانىنىڭ ءدىن تاراتۋشىلارى باتىستان شىعىسقا قاراي سوزىلىپ جاتقان كارى مۇعالجار قىراتتارىنىڭ بويىمەن وزەن جاعالاپ جۇرە بەرگەن.

قۇدىقساي اۋىلدىق وكرۋگىنىڭ اكىمى قاسىم ءشۇيىنىشباي ۇلىنىڭ ايتۋىنشا، دەمەۋشىلەر كومەگىمەن ورتالىق قاقپاسى بار 1500 مەترلىك قورشاۋعا جانە ارنايى باننەرگە تاپسىرىس بەرىلگەن. سەبەبى، جان-جاقتاعى شارۋا قوجالىقتارىنىڭ مالى وسى جەرگە ءجيى-ءجيى كىرىپ كەتىپ جاتادى. قورشاۋدىڭ بيىكتىگى 4 مەتر دەپ ۇلگىلەنگەن.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز