"ەڭ الدىمەن, اۋىلدىق اۋماقتاردى ممەلەكەتتىك باسقارۋدىڭ ءتيىمدى تەتىگىن قالىپتاستىرۋ قاجەت ەكەنى انىق. بۇگىن "اۋىل – ەل بەسىگى" جوباسىنا ۇلتتىق جوبا مارتەبەسىن بەرۋ تۋرالى جاقسى ۇسىنىس ايتىلدى. بۇل باستامانى ورىندى دەپ قابىلدايمىز. ۇلتتىق جوبا وسى باعىتتاعى ماسەلەلەردى كەشەندى تۇردە شەشۋگە, اۋىلعا كورسەتىلەتىن مەملەكەتتىك قولداۋدى جۇيەلەۋگە مۇمكىندىك بەرەدى. وسى رەتتە مەملەكەت باسشىسىنىڭ تاپسىرماسىن ەستەن شىعارمايىق", دەدى م.اشىمباەۆ سەناتتاعى اۋىلدىق اۋماقتاردى دامىتۋ جونىندەگى پارلامەنتتىك تىڭداۋدا.
سونىمەن قاتار ول بۇگىن اۋىلدىق اۋماقتاردى دامىتۋ ماسەلەلەرىن اۋىل شارۋاشىلىعى مينيسترلىگىنە بەرۋ تۋرالى ءسوز بولعانىن ەسكە سالدى. بۇل وسى سالاعا بولىنگەن رەسۋرستاردى ءبىر ۇيلەستىرۋشى ورگانعا شوعىرلاندىرۋعا مۇمكىندىك بەرەدى جانە سەناتورلار وسى ۇسىنىستى قولداپ وتىر.
"اۋىل حالقىنىڭ ءومىر ءسۇرۋ دەڭگەيىن ارتتىرۋدىڭ نەگىزگى فاكتورى – ساپالى ينفراقۇرىلىم قالىپتاستىرۋ ەكەنى تۇسىنىكتى. ول دەگەنىمىز – دەنساۋلىق ساقتاۋ, ءبىلىم بەرۋ, مادەنيەت, باسپانا ماسەلەلەرىن وڭتايلى شەشۋ دەگەن ءسوز. سونداي-اق, ساپالى جول مەن تسيفرلىق ينفراقۇرىلىمدى دامىتۋ. سوندىقتان اۋىلدى دامىتۋدى قارجىلاندىرۋ رەسپۋبليكالىق بيۋدجەتتىڭ باسىم باعىتتارىنىڭ ءبىرى بولۋى كەرەك دەپ ەسەپتەيمىز", دەپ اتاپ ءوتتى سەنات توراعاسى.
ماۋلەن اشىمباەۆ اۋىل تۇرعىندارىن جۇمىسپەن قامتۋ جانە ولاردىڭ تابىسىن ارتتىرۋ دا ەڭ وزەكتى ماسەلەلەردىڭ ءبىرى ەكەنىن ايتتى. وسى ماقساتتا ەڭ الدىمەن, جۇمىس ورىندارىن اشۋ, اۋىلدىق كاسىپكەرلىكتى دامىتۋ جانە قوسىمشا مەملەكەتتىك قولداۋ شارالارىن جۇزەگە اسىرۋ قاجەت ەكەنى اتالىپ ءوتتى. بۇدان بۇرىن حابارلانعانداي, اتالعان پارلامەنتتىك تىڭداۋدا سەناتور اقىلبەك كۇرىشباەۆ اۋىلدىق ايماقتاردى دامىتۋ ماسەلەلەرىن باسقارۋدى ۇلتتىق ەكونوميكا مينيسترلىگى قاراماعىنان الىپ اۋىل شارۋاشىلىعى مينيسترلىگىنە بەرۋ كەرەكتىگىن ۇسىندى.
