"جىل سايىن 15 قىركۇيەك پەن 15 قاراشا ارالىعىندا وتەتىن تىركەلۋ ناۋقانى كەزىندە egov.kz ارقىلى ءۇيدىڭ جانىنداعى ەمحاناعا تىركەلىپ العام. جاقىندا ەمحانادان حابارلاسىپ, جاسىما قاراي پروفيلاكتيكالىق تەكسەرۋدەن وتۋگە شاقىردى. بۇگىن سوعان باردىم. قان قىسىمىمدى ولشەدى, حولەستەرين مەن قانت مولشەرىن تەكسەردى. ەكگ-عا, ماممولوگقا, گينەكولوگقا جىبەردى. شىنىمدى ايتسام, وسىلاي ارنايى تەكسەرىلۋگە شاقىرعاندارىنا راحمەت, ايتپەسە ءانى-ءمىنى دەپ جۇرە بەرەمىز. جالپى بايقاعانىم, مىنا ءمامس جۇيەسىن ەنگىزگەلى بەرى, بۇرىن ۇزاق كۇتەتىن كوپتەگەن مەديتسينالىق قىزمەتتەر قولجەتىمدى", دەيدى نۇر-سۇلتان قالاسىنداعى № 9 ەمحانا پاتسيەنتى ج.ەرلەروۆا.
ەستەرىڭىزگە سالا كەتەيىك, سovid-19 تارالۋىنا بايلانىستى شەكتەۋ شارالارى ەنگىزىلگەن كەزدە ەمحانالار پروفيلاكتيكالىق تەكسەرۋلەر جۇرگىزۋدى ۋاقىتشا توقتاتقان بولاتىن.
قر دەنساۋلىق ساقتاۋ مينيسترلىگىنىڭ № 685 "پروفيلاكتيكالىق مەديتسينالىق قاراپ-تەكسەرۋلەرگە جاتاتىن ادامداردىڭ نىسانالى توپتارىن, سونداي-اق وسى قاراپ-تەكسەرۋلەردى وتكىزۋدىڭ قاعيدالارى مەن كەزەڭدىلىگىن بەلگىلەۋ تۋرالى" بۇيرىعىنا سايكەس, 0-دەن 18 جاسقا دەيىنگى بالالار جانە 30-دان 70 جاسقا دەيىنگى ەرەسەكتەر سكرينينگتەن ءوتۋى ءتيىس.
بالالار جىل سايىن كامەلەتكە تولعانعا دەيىن پروفيلاكتيكالىق تەكسەرۋدەن وتەدى. مەكتەپكە دەيىنگى مەكەمەلەردىڭ تاربيەلەنۋشىلەرىن, مەكتەپ وقۋشىلارىن, ورتا ارناۋلى وقۋ ورىندارىنىڭ وقۋشىلارىن جانە 18 جاسقا دەيىنگى ستۋدەنتتەردى ءبىلىم بەرۋ ۇيىمدارىنداعى كوشپەلى بريگادا تەكسەرەدى. مەكتەپكە دەيىنگى مەكەمەلەرگە بارمايتىن بالالاردى تەكسەرۋ ەمحانادا نەمەسە وتباسىلىق دەنساۋلىق ورتالىقتارىندا جۇرگىزىلەدى.
30 جاستان 70 جاسقا دەيىنگى ايەلدەر ءۇشىن ءتورت جىلدا ءبىر رەت جاتىر موينى وبىرىنىڭ سكرينينگى قاراستىرىلعان, وعان قاراپ-تەكسەرۋ مەن تسيتولوگيالىق زەرتتەۋ كىرەدى. 40 جاستان كەيىن ەكى جىلدا ءبىر رەت ايەلدەرگە ءسۇت بەزى قاتەرلى ىسىگىن ەرتە انىقتاۋ ءۇشىن الدىن-الا تەكسەرۋ جانە مامموگرافيا جۇرگىزىلەدى.
30-دان 70 جاسقا دەيىنگى ەرلەر مەن ايەلدەر ەكى جىلدا ءبىر رەت ءارتۇرلى اۋرۋلاردىڭ دامۋىنىڭ مىنەز-ق ۇلىق قاۋىپ فاكتورلارىن ەرتە انىقتاۋ ءۇشىن تەكسەرىلۋى ءتيىس. ەگەر دارىگەر پاتسيەنتتىڭ ارتىق سالماعىن, فيزيكالىق بەلسەندىلىگىنىڭ تومەندىگىن, تەمەكى شەگەتىنىن نەمەسە قاۋىپتى مولشەردە ىشىمدىك ىشەتىنىن انىقتاسا, وندا پروفيلاكتيكالىق كەڭەس, مىنەز-قۇلقىن وزگەرتۋ تۋرالى ۇسىنىستار بەرىلەدى, دەنساۋلىقتى ساقتاۋ مەكتەبىنە جىبەرەدى.
40 جاستان كەيىن ەرلەر مەن ايەلدەر ەكى جىلدا ءبىر رەت ارتەريالىق گيپەرتونيانى, جۇرەكتىڭ يشەميالىق اۋرۋىن, قانت ديابەتىن, گلاۋكومانى ەرتە انىقتاۋعا سكرينينگتەن وتەدى.
50-دەن 70 جاسقا دەيىنگى ەرلەر مەن ايەلدەر ەكى جىلدا ءبىر رەت كولورەكتالدى وبىردى ەرتە انىقتاۋ ءۇشىن سكرينينگتەن ءوتۋى قاجەت. گەموكۋلت تەستى ارقىلى تەكسەرەدى. ەگەر ول وڭ ناتيجە بەرسە, ناۋقاس ىشەكتىڭ كولونوسكوپيالىق زەرتتەۋىنەن وتۋگە جىبەرىلەدى.
ايتا كەتۋ كەرەك, پروفيلاكتيكالىق تەكسەرۋلەردى قارجىلاندىرۋ ءمامس قاراجاتى ەسەبىنەن جۇزەگە اسىرىلادى, سوندىقتان سكرينينگتەن ءوتۋ ءۇشىن ساقتاندىرۋ مارتەبەسىنە يە بولۋ قاجەت. سونىمەن قاتار, ايتا كەتەيىك, مەملەكەت 15 جەڭىلدىك ساناتىنا جاتاتىن 11 ملن قازاقستاندىق ءۇشىن جارنا تولەيدى.
