جامبىل وبلىسى پوليتسيا دەپارتامەنتىنىڭ باستىعى جانات سۇلەيمەنوۆتىڭ نۇسقاۋىنا سايكەس, 13-19 قازان ارالىعىندا تاراز قالاسىنىڭ اۋماعىندا جەرگىلىكتى جانە رەسپۋبليكالىق باق وكىلدەرىنىڭ قاتىسۋىمەن "قۇقىقتىق ءتارتىپ" جەدەل-الدىن الۋ ءىس-شاراسى ءوتتى. جۋرناليستەر زاڭ تالاپتارىن بۇزۋشىلىق دەرەكتەرىنە, سونداي-اق جول قاۋىپسىزدىگى ەرەجەلەرىن ساقتاماعان تۇلعالاردىڭ ۇستالعانىنا كۋا بولدى, ويىن-ساۋىق جانە باسقا دا مەكەمەلەردە جۇرگىزىلگەن رەيدتەرگە قاتىستى. جول قاۋىپسىزدىگى جەلىسى بويىنشا 891 اكىمشىلىك حاتتاما تولتىرىلىپ, 39 اۆتوكولىك ايىپپۇل تۇراعىنا قويىلدى. سەگىز ميلليون تەڭگەدەن استام سوماعا ايىپپۇل سالىندى, 6,4 ميلليون تەڭگە ءوندىرىپ الىندى. الكوگولدىك ىشىمدىكتەردى ىشكەنى جانە قوعامدىق ورىنداردا ماس كۇيىندە بولعانى ءۇشىن وبلىستىق ناركوديسپانسەرگە 367 تارازدىق ورنالاستىرىلدى. 100-دەن استام ءجاسوسپىرىم ەرەسەكتەردىڭ قاراۋىنسىز تۇنگى ۋاقىتتا تۇرعىن ۇيدەن تىس جەردە بولعانى ءۇشىن ۇستالدى, ولاردىڭ اتا-انالارى قر اقبتك-ءنىڭ 442-بابى بويىنشا اكىمشىلىك جاۋاپكەرشىلىككە تارتىلدى (كامەلەتكە تولماعانداردىڭ زاڭدى وكىلدەرىنىڭ ەرىپ-ءجۇرۋىنسىز تۇنگى ۋاقىتتا ويىن-ساۋىق مەكەمەلەرىندە نەمەسە تۇرعىن ۇيدەن تىس جەردە بولۋى). ونىڭ ىشىندە كامەلەتكە تولماعانداردىڭ ويىن-ساۋىق مەكەمەلەرىندە بولۋىنىڭ 14 دەرەگى انىقتالدى. كەيبىر ءدامحانالار مەن مەيرامحانالاردىڭ اكىمشىلەرى اقبتك-ءنىڭ 132-بابى (كامەلەتكە تولماعانداردىڭ تۇنگى ۋاقىتتا ويىن-ساۋىق مەكەمەلەرىندە بولۋىنا جول بەرۋ) بويىنشا اكىمشىلىك جاۋاپكەرشىلىككە تارتىلدى. پوليتسيا قىزمەتكەرلەرى تۇنگى ۋاقىتتا الكوگول ونىمدەرىن ساتۋدىڭ جولىن كەسۋگە, سونداي-اق كامەلەتكە تولماعان جاسوسپىرىمدەردىڭ قاداعالاۋسىز جۇرۋىنە باسا نازار اۋداردى. قىلمىستىق قۇقىق بۇزۋشىلىق جاساعانى ءۇشىن 22 ادام, ونىڭ ىشىندە 12 – ەسىرتكى زاتتارىن زاڭسىز ساقتاعانى جانە پايدالانعانى ءۇشىن, 10 – وتكىر كەسكىش زاتتاردى, سونىڭ ىشىندە كاستەتتەر مەن پىشاقتاردى ساقتاعانى جانە الىپ جۇرگەنى ءۇشىن ۇستالدى. سونىمەن قاتار, ماس كۇيىندە كولىك قۇرالىن باسقارعانى ءۇشىن ءتورت جۇرگىزۋشى جانە كولىك قۇرالىن باسقارۋ قۇقىعىنان ايىرىلعان ءبىر جۇرگىزۋشى جاۋاپكەرشىلىككە تارتىلدى.
– قوعامدىق ورىندار مەن كوشەلەردە قۇقىق ءتارتىبىن قامتاماسىز ەتۋ, قىلمىستىڭ الدىن الۋ جانە جولىن كەسۋ ماقساتىندا جەدەل الدىن الۋ ءىس-شاراسى بارىسىندا بارلىعى 2859 اكىمشىلىك قۇقىق بۇزۋشىلىق انىقتالدى. "قۇقىقتىق ءتارتىپ" جاش الداعى ۋاقىتتا دا ءوز جالعاسىن تابادى, – دەپ قورىتىندىلادى ءسوزىن تاراز قالاسىنىڭ پب جپقب باستىعى ءسابيت مامىتبەكوۆ.
