Jas Otan جاستار قاناتىنىڭ جيىرما جىلدىعىنا وراي ۇيىمداستىرىلعان جارىس ەلوردا بازارلارى مەن ساۋدا ۇيلەرىندە جۇمىس ىستەيتىن جاستاردى جاسىل الاڭدا جينادى. 12 قازاندا باستالعان جارىستا قالانىڭ ساۋدا ۇيلەرى مەن بازارلارىندا جۇمىس ىستەيتىن جاس قىزمەتكەردەن قۇرىلعان ون ءتورت كوماندا باق سىناستى.
ساۋدا بازارلارىنىڭ ساتۋشىلارى, تجو قىزمەتكەرلەرى, امبەباپ جۇمىسشىلار مەن كۋرەرلەر از ۋاقىتتىڭ ىشىندە فۋتبولشىلارعا اينالىپ, ءوز كوماندالارىن جيناقتاپ, باق سىناستى. ۇزدىكتەرىنە كۋبوك پەن اقشالاي سىياقى بەرىلدى. ءتۋرنيردىڭ جالپى جۇلدە قورى 600 مىڭ تەڭگەنى قۇرادى. جارىس تالابى بويىنشا, ويىنشىلاردىڭ جاسى 35-تەن اسپاۋى ءتيىس-ءتى.
تۋرنير قورىتىندىسى بويىنشا, «ەسىل» ساۋدا ءۇيىنىڭ كومانداسى ءبىرىنشى ورىندى يەمدەنسە, ەكىنشى ورىندى «استانالىق» بازارىنىڭ كومانداسى الدى. ءۇشىنشى ورىن «كوك بازار» كومانداسىنا بۇيىردى.
سونىمەن قاتار تۋرنير بارىسىندا كوزگە تۇسكەن ويىنشىلار «ۇزدىك ويىنشى», «ۇزدىك شابۋىلشى», «ۇزدىك قاقپاشى» اتالىمدارىمەن ماراپاتتالدى.
«جالپى تۋرنير جوعارى دەڭگەيدە ۇيىمداستىرىلدى. بارلىق كوماندالار مىقتى بولدى. ءار ويىن تارتىستى ءوتتى. مۇنداي تۋرنيرلەر ءجيى ءوتىپ, جۇزدەگەن جاستى قالانىڭ سپورت الاڭدارىندا جيناسا ەكەن دەيمىن. ۇيىمداستىرۋشىلارعا راحمەت!», دەدى تۋرنير قاتىسۋشىسى سەرىكبەك كوكەنوۆ.
ۇيىمداستىرۋشىلاردىڭ ايتۋىنشا, «دۇيسەنبىلىك فۋتبول-2020» تۋرنيرىنە ەكى اي كولەمىندە رەسپۋبليكانىڭ بەس وڭىرىنەن 100-دەن استام كوماندا قاتىسقان.
«تۋرنير اياسىندا 5 وڭىردە 100 كوماندا اراسىندا تارتىستى ويىندار ءوتتى. ولاردىڭ قورىتىندىسى بويىنشا ءار ءوڭىر جەڭىمپازدارى انىقتالدى. تۋرنير جۇمىسشى جاستار اراسىندا سالاۋاتتى ءومىر سالتىن قالىپتاستىرىپ, بوس ۋاقىتتارىن ءتيىمدى پايدالانۋعا باۋلۋدى كوزدەيدى. مۇنداي شارالار الداعى ۋاقىتتا جالعاسىن تابادى», دەدى Jas Otan جاستار قاناتىنىڭ جەتەكشىسى ەلنۇر بەيسەنباەۆ.
