كوللەدجدەردى سۇرانىسقا يە 100 ماماندىق بويىنشا جاڭعىرتۋ جانە بىلىكتى ماماندار دايارلاۋدىڭ حالىقارالىق تاجىريبەسىن ەنگىزۋ ماقساتىندا «جاس مامان» رەسپۋبليكالىق جوباسى ىسكە اسىرىلىپ جاتقانى بەلگىلى. ءبىلىم جانە عىلىم ءمينيسترى اسحات ايماعامبەتوۆتىڭ ايتۋىنشا, اتالعان باعدارلاما شەڭبەرىندە كوللەدجدەرگە تەحنيكالىق قۇرال-جابدىقتار ساتىپ الىپ قانا قويماي, ءبىلىم بەرۋ باعدارلامالارىن دا جاڭارتۋ جوسپارلانعان.
قازىرگى ۋاقىتتا ەلىمىزدەگى 67 كوللەدجدىڭ وقۋ-وندىرىستىك بازاسى جاڭارتىلدى. ءبىلىم بەرۋ ۇيىمدارى ستۋدەنتتەردى سۇرانىسقا يە 100 ماماندىق بويىنشا وقىتۋ ماقساتىندا قاجەتتى زاماناۋي قۇرال-جابدىقتار ساتىپ الدى. شارا «جاس مامان» جوباسىن جۇزەگە اسىرۋدىڭ ءبىرىنشى كەزەڭى اياسىندا قولعا الىندى. جىلدىڭ سوڭىنا دەيىن تاعى دا 13 كوللەدجگە قاجەتتى تەحنيكا جەتكىزىلەدى. جالپى, اتالعان جوبا ەلىمىزدىڭ 180 كوللەدجىن قامتيدى, ولاردىڭ بارلىعى وقۋ-وندىرىستىك بازاسىن جاڭارتا الادى.
«قازىر «جاس مامان» جوباسىنىڭ ءبىرىنشى كەزەڭى جۇزەگە اسىرىلىپ جاتىر. بيىل شامامەن 80 كوللەدج وزدەرىنىڭ تەحنيكالىق بازاسىن جاڭارتا الادى. بۇگىندە ەلىمىز بويىنشا 67 كوللەدج وزىق تەحنيكامەن جابدىقتالعان. جوبا ەلباسىنىڭ تاپسىرماسى بويىنشا تەحنيكالىق جانە كاسىپتىك ءبىلىم بەرۋ جۇيەسىن قولداۋ ماقساتىندا ىسكە قوسىلدى», دەدى ءبىلىم جانە عىلىم مينيسترلىگى تەحنيكالىق جانە كاسىپتىك ءبىلىم دەپارتامەنتىنىڭ ديرەكتورى ناسىمجان وسپانوۆا.
مىسالى, نۇر-سۇلتان قالاسى Astana Polytechnic جوعارى كوللەدجىنىڭ اۆتوكولىك جوندەۋ شەبەرحاناسىندا اۆتوكولىكتىڭ تولىق دياگنوستيكاسىن جاساۋعا مۇمكىندىك بەرەتىن زاماناۋي جابدىقتار ورناتىلعان. ستۋدەنتتەر شەبەرحانادا جەڭىل اۆتوكولىكتەرگە قىزمەت كورسەتۋ جانە جوندەۋ بويىنشا تاجىريبە جينايدى. سونداي-اق «جاس مامان» جوباسى اياسىندا كوللەدج العاش رەت وقۋ ەلەكتروموبيلىن ساتىپ الدى. وقۋىن اياقتاعاننان كەيىن كوللەدج تۇلەكتەرى قالالىق اۆتوپاركتە جۇمىس ىستەي الادى جانە جاڭا ەلەكتر اۆتوبۋستارىنا قىزمەت كورسەتۋگە مۇمكىندىكتەرى بار.
اتالعان كوللەدجدىڭ ديرەكتورى قاسىمحان سەنعازىەۆ بۇل باعدارلاما بويىنشا بيىل ۇلكەن لابوراتوريالار جۇمىسىن باستاعانىن جەتكىزدى.
«سونىڭ ءبىرى – اۆتوموبيلدەرگە قىزمەت كورسەتۋ زەرتحاناسى. ەڭ الدىمەن, بۇل كابينەتتەر حالىقارالىق ستاندارتتارعا سايكەس جاسالدى. سونداي-اق جۇمىس بەرۋشىلەردىڭ تالابىن ەسكەردىك. وسىعان دەيىن قۇرىلعىلار جەتىسپەۋشىلىگى بولدى. سوندىقتان جۇمىس بەرۋشىلەر تۇلەكتەردى جۇمىسقا العان سوڭ قايتا وقىتاتىن. ەندى جابدىقتالعان قۇرىلعىلار ارقىلى تۇلەكتەر جۇمىسقا ورنالاسقاندا بىردەن جۇمىسقا كىرىسىپ كەتۋىنە مۇمكىندىك بولادى. ءار قۇرىلعىنىڭ ءوزىنىڭ 16-17 زەرتحانالىق جۇمىسى بار. بۇل – اۆتوسەرۆيس, تقس-قا بارعان كەزدە جەڭىل كولىكتەرگە, اۆتوبۋستارعا جانە باسقا دا ءتۇرلى كولىكتەرگە قىزمەت كورسەتۋگە ارنالعان زەرتحانا», دەدى ق.سەنعازىەۆ.
ەلوردالىق اۆتوورتالىقتىڭ تەحنيكالىق ديرەكتورى دميتري گانبانىڭ ايتۋىنشا, ستۋدەنتتەردىڭ جاڭا قۇرىلعىلارمەن جۇمىس ىستەي الۋى اۆتوموبيلدەرگە تەحنيكالىق قىزمەت كورسەتۋ سالاسى ماماندارىنىڭ كاسىبي دەڭگەيىن ارتتىرادى.
«وسى ۋاقىتقا دەيىن قازاقستاندا مۇنداي دەڭگەيدەگى تەحنيكالىق جابدىقتالعان وقۋ ورىندارى بولعان ەمەس. ەندى وسىنداي كوللەدجدەردىڭ ماماندارىنا ەلىمىز بويىنشا سۇرانىس ارتاتىنىنا سەنىمدىمىن», دەپ اتاپ ءوتتى اۆتوورتالىقتىڭ تەحنيكالىق ديرەكتورى دميتري گانبا.
كوللەدجدەگى بارلىق شەبەرحانا مەن زەرتحانالار «جاس مامان» جوباسى اياسىندا جاڭارتىلدى. وقۋ جابدىقتارى الەمدىك جەتەكشى كومپانيالاردان شامامەن 230 ملن تەڭگەگە ساتىپ الىندى. بايلانىس, تەلەكوممۋنيكاتسيا جانە اقپاراتتىق تەحنولوگيالار كابينەتى دە جاڭا تەحنولوگيالارمەن تولىقتىرىلدى. ەندى ستۋدەنتتەر جەلىلىك قۇرىلعىلاردى كونسولدە دە, گرافيكالىق ينتەرفەيستە دە باسقارۋدى ۇيرەنەدى. جاڭا ماتەريالدىق-تەحنيكالىق بازا ەڭبەك نارىعىندا سۇرانىسقا يە بىلىكتى كادرلاردى دايارلاۋعا مۇمكىندىك بەرەدى. كوللەدجدەردەگى جابدىقتاردى ساتىپ الۋ مەن جەتكىزۋدىڭ اشىقتىعىن قامتاماسىز ەتۋ ءۇشىن كوميسسيا قۇرىلدى. ونىڭ قۇرامىندا وڭىرلەر مەن ءماسليحات دەپۋتاتتارى, تاۋەلسىز ساراپشىلار, وڭىرلىك كاسىپكەرلەر پالاتاسىنىڭ جانە سىبايلاس جەمقورلىققا قارسى ءىس-قيمىل اگەنتتىگىنىڭ ارنايى مونيتورينگتىك توبىنىڭ وكىلدەرى بار.
«جاس مامان» جوباسى اياسىندا جاڭا جابدىقتاردى ساتىپ الۋمەن قاتار وقۋ جوسپارلارى مەن باعدارلامالار ازىرلەنۋدە. سونداي-اق كوللەدجدەردىڭ شەبەرحانالارى مەن زەرتحانالارىندا جوندەۋ جۇمىستارى جۇرگىزىلىپ جاتىر. سۇرانىسقا يە 100 ماماندىقتىڭ ءتىزىمىن ەڭبەك جانە حالىقتى الەۋمەتتىك قورعاۋ مينيسترلىگى جاساعانىن اتاپ وتكەن ءجون.
ايتا كەتەتىن تاعى ءبىر جايت, ءبىلىم جانە عىلىم مينيسترلىگىنىڭ ايتۋىنشا, بۇعان دەيىن بىلىكتىلىك ساناتتارى ءۇشىن قوسىمشا تولەمدەردى تەك مەكتەپ مۇعالىمدەرى العان بولاتىن. «پەداگوگ مارتەبەسى تۋرالى» زاڭنىڭ قابىلدانۋىمەن كوللەدج پەداگوگتەرى دە بىلىكتىلىك ساناتى بەرىلگەننەن كەيىن اي سايىن قوسىمشا اقى الاتىن بولادى.
«مەملەكەت باسشىسىنىڭ قولداۋىمەن 2020 جىلدىڭ قاڭتار ايىنان باستاپ كوللەدج پەداگوگتەرىنىڭ جالاقىسى ارتتى, الداعى جىلدارى دا ارتا تۇسپەك. بىلىكتىلىك ساناتى ءۇشىن پەداگوگتەرگە قوسىمشا اقى تولەۋ ماسەلەسى كوپ جىل بويى كوتەرىلگەن بولاتىن. ەگەر مەكتەپتەردە مۇعالىمدەر بىلىكتىلىك ساناتتارى ءۇشىن قوسىمشا اقى السا, كوللەدجدەردە مۇنداي ءۇردىس بولعان جوق. ەندى كوللەدج پەداگوگتەرى دە اي سايىن لاۋازىمدىق جالاقىسىنىڭ 30-دان 50 پايىزىنا دەيىن قوسىمشا اقى الاتىن بولادى. ءوز كەزەگىندە كوللەدج ديرەكتورلارى مەن ديرەكتور ورىنباسارلارىنىڭ اتقارعان جۇمىسىنىڭ تيىمدىلىگىنە بايلانىستى ءوز جالاقىسىنىڭ 100 پايىزىنا دەيىن قوسىمشا اقى الۋ مۇمكىندىگى بار. بۇل ارىپتەستەرىمىزدىڭ جۇمىسقا دەگەن ىنتا-جىگەرلەرى مەن جۇمىستىڭ تيىمدىلىگىن ارتتىرا تۇسپەك», دەگەن ەدى مينيستر.
