بۇل جۇمىستى پرەزيدەنت جانىنداعى مەملەكەتتىك باسقارۋ اكادەمياسى ءوز موينىنا الدى. مەملەكەتتىك قىزمەت ىستەرى اگەنتتىگىنىڭ توراعاسى انار جايلعانوۆا اكادەميادا «ا» كورپۋسىنىڭ مەملەكەتتىك قىزمەتشىلەرىنە ارنالعان قايتا دايارلاۋ كۋرستارىنىڭ اشىلۋ سالتاناتىنداعى العى سوزىندە بۇل قادامنىڭ كاسىبي, باسەكەگە قابىلەتتى باسشىلاردى دايارلاۋعا باعىتتالعانىن اتاپ ءوتتى. «اتالعان كۋرس قازاقستاننىڭ تۇڭعىش پرەزيدەنتى – ەلباسى ن.نازارباەۆتىڭ قوعام قاجەتتىلىكتەرىنە باسا نازار اۋداراتىن, زاماناۋي مەملەكەتتىك اپپاراتتىڭ تالاپتارىنا جاۋاپ بەرەتىن باسشىلاردى دايارلاۋ تۋرالى تاپسىرماسىن ىسكە اسىرۋ ماقساتىندا جۇرگىزىلىپ جاتىر», دەدى ا.جايلعانوۆا. سونداي-اق ۆەدومستۆو باسشىسى ن.ءا.نازارباەۆتىڭ «ساياسي كوشباسشىلار ساياساتتى قالىپتاستىرادى, كاسىبي مەملەكەتتىك قىزمەتكەرلەر ونىڭ ورىندالۋىن قامتاماسىز ەتەدى» دەگەن ءسوزىن باسا ايتتى.
كۋرستى مەملەكەتتىك باسقارۋ اكادەمياسى مەن نازارباەۆ ۋنيۆەرسيتەتى بىرلەسە ۇيىمداستىرىپ وتىرعانىن ايتا كەتكەن ءجون.
«ا» كورپۋسى – بۇل ساياسي باسشىلىق پەن ورىنداۋشىلىق بۋىن اراسىنداعى ءوزارا بايلانىستى قامتاماسىز ەتۋگە ارنالعان كاسىبي باسقارۋشىلىق بۋىن. باعدارلاماعا مەملەكەتتىك باسقارۋ, كادر ساياساتى, شەشىم قابىلداۋ جۇيەسى تاسىلدەرىن جانە باسقا دا بىرقاتار باسىم ماسەلەلەردى وزگەرتۋ بويىنشا الدىنا ماڭىزدى مىندەتتەر قويىلعان تاجىريبەلى, قالىپتاسقان ءىرى قۇرىلىمداردىڭ باسشىلارى قاتىسادى.
ستراتەگيالىق كوشباسشىلىق, وزگەرىستەردى باسقارۋ جانە ءتيىمدى كوممۋنيكاتسيالار سياقتى داعدىلار پرەزيدەنتتىڭ جولداۋىندا ايتىلعان مىندەتتەردى جەدەل جانە ساپالى شەشۋگە كومەكتەسپەك. سونداي-اق مامانداردىڭ بىلىكتىلىگىن ارتتىرۋ ەلدەگى ەكونوميكالىق ءوسۋ قارقىنىن قالپىنا كەلتىرۋ, حالىقتىڭ ءومىر ءسۇرۋ ساپاسىن جاقسارتۋ مەن مەملەكەتتىك ورگاندار قىزمەتىنىڭ تيىمدىلىگىن تۇبەگەيلى ارتتىرۋ جۇمىسىندا دا وتە وزەكتى بولىپ وتىر.
«مەملەكەتتىك باسقارۋ مەن قوعامدىق دامۋداعى جۇيەلى وزگەرىستەردىڭ قازىرگى زامانعى ترەندتەرى مەن جوعارى قارقىنى ەلدىڭ ستراتەگيالىق مىندەتتەرىن ءتيىمدى شەشۋ ءۇشىن يننوۆاتسيالىق جانە ينكليۋزيۆتى ويلاۋ قابىلەتى بار باسشىلاردىڭ جاڭا بۋىنىن قالىپتاستىرۋدى تالاپ ەتەدى», دەپ قورىتىندىلادى ا.جايلعانوۆا.
