وسى جىلعى تاعى ءبىر جاڭالىق – جىلۋ ماۋسىمىنىڭ جىلداعىدان 5 كۇن ەرتە باستالۋى. قازان تۋا كۇن سالقىنداپ, وبلىس باسشىلىعىنىڭ تاپسىرماسىمەن جىلۋ وسى ايدىڭ العاشقى ونكۇندىگىندە-اق بەرىلە باستادى.
قازىر وبلىستاعى 1 185 الەۋمەتتىك نىسانعا جانە ورتالىقتاندىرىلعان جىلۋ جۇيەسىنە قوسىلعان 713 كوپقاباتتى تۇرعىن ۇيگە جىلۋ تۇراقتى بەرىلۋدە.
وڭىردەگى الەۋمەتتىك سالا نىساندارىنا الداعى قىستان شىعۋ ءۇشىن 39,5 مىڭ توننا قاتتى جانە 26 مىڭ توننا سۇيىق وتىن قاجەت. تۇرعىندارعا قاجەتتى كومىر مولشەرى – 163,6 مىڭ توننا. قازىر وسى كومىردىڭ 113,0 مىڭ توننادان استامى جەتكىزىلدى.
جىلۋ بەرۋ ماۋسىمى كەزەڭىندە قىزىلوردا قالاسىنىڭ وزىنە عانا تاسىمالداۋشى جەكە كاسىپكەرلەر تاراپىنان بارلىعى 889 ۆاگون نەمەسە 61 385 توننا كومىر جەتكىزىلەدى. قازىر قالاداعى «بەك», «قارىمساقوۆ» جەكە كاسىپكەرلىگى مەن «ولجاس-2005», «تەك قازاقستان» جاۋاپكەرشىلىگى شەكتەۋلى سەرىكتەستىكتەرىندە كومىر قورى جەتكىلىكتى. قالا بيلىگى تاراپىنان ونىڭ باعاسى دا باقىلاۋدا تۇر.
ءار قىستا كومىردىڭ قات بولىپ, باعاسىنىڭ دا كۇرت ءوسىپ كەتەتىنى ءجيى بايقالىپ ءجۇر. وسىنداي كەلەڭسىزدىك بيىل قايتالانباس ءۇشىن وبلىس باسشىلىعى كومىر وندىرەتىن كاسىپورىندارمەن تىكەلەي كەلىسىمشارت جاساپ, تۇرعىندارعا ءتيىمدى باعامەن ساتۋعا باسا نازار اۋدارىپ وتىر. وسى كۇنى وبلىس اۋماعىندا 30 كومىر جيناقتاۋ قويماسى جۇمىس ىستەپ تۇر. ولاردىڭ بەسەۋى – قىزىلوردا قالاسىندا, قالعاندارى – اۋدانداردا. جالپى, جىلۋ ماۋسىمىنىڭ تۇراقتى ءوتۋى – وبلىستىق شتابتىڭ باقىلاۋىندا.
وڭىرگە گاز كەلگەلى كومىرگە سۇرانىستىڭ بۇرىنعىدان تومەندەگەنى بەلگىلى. «قازترانسگاز ايماق» اق وندىرىستىك فيليالى ديرەكتورىنىڭ ءبىرىنشى ورىنباسارى ەرمەك قالدىعۇلوۆتىڭ حابارلاۋىنشا, بيىل گاز تاراتقىش جەلىلەرىندەگى جوسپارلانعان تەحنيكالىق قىزمەت جانە باسقا دا جۇمىستار تولىقتاي جۇرگىزىلدى. جالپى ۇزىندىعى 2 305 شاقىرىمدىق گاز قۇبىرى, 54 بلوكتىك جانە 193 شكافتىق گاز رەتتەگىش بەكەتتەرى بار مەكەمە ماۋسىمعا تولىق دايىن.
«قازترانسگاز ايماق» اق وندىرىستىك فيليالى قازىر وبلىس بويىنشا 111 256 تۇتىنۋشىعا, وسىعان قوسىمشا گازعا قوسىلعان 2 403 كوممۋنالدىق-تۇرمىستىق كاسىپورىنعا گاز بەرىپ وتىر.
– تۇتىنۋشىلاردىڭ بارلىعى بىردەي جىلۋ ماۋسىمىنا ءازىر دەپ ايتۋ قيىن. كوپتەگەن دۇكەن, ءدامحانا, مەيرامحانا بۇگىنگە دەيىن گازدى ساتىپ الۋعا كەلىسىمشارت جاساماعان, سونداي-اق كوپشىلىگىنىڭ تەحنيكالىق قىزمەت كورسەتۋگە شارتتارى جوق. وسىعان بايلانىستى تۇتىنۋشىلارعا ەسكەرتۋ جۇمىستارىن جۇرگىزۋدەمىز. بۇل ناتيجە بەرمەسە, كاسىپورىندارعا گاز بەرۋ توقتاتىلادى, – دەيدى «قازترانسگاز ايماق» اق وندىرىستىك فيليالى ديرەكتورىنىڭ ءبىرىنشى ورىنباسارى ە.قالدىعۇلوۆ.
سونىمەن قاتار جەكە تۇلعالاردىڭ گازعا قارىزى 1 ملرد تەڭگەگە جۋىقتاپ وتىر. وسى سەبەپتەن دە «قازترانسگاز ايماق» اق قىزىلوردا وندىرىستىك فيليالى بەرەشەگى بار تۇتىنۋشىلاردى گازدان اجىراتۋعا ءماجبۇر. ولار تۇتىنۋشى تۇبىرتەك پاراعىنا سايكەس ءار ايدىڭ 25-ىنە دەيىن پايدالانىلعان گازعا تولەم جاساۋ قاجەتتىگىن ايتىپ وتىر. اجىراتىلعان ابونەنت قارىزىن تولىق وتەگەننىڭ وزىندە گازدى اجىراتىپ, قايتا قوسۋ قىزمەتىنىڭ اقىسىن تولەۋى ءتيىس. مۇنداي شىعىنعا ۇشىراماۋدىڭ باستى جولى – كوممۋنالدىق تولەمدى ۋاقتىلى تولەۋ.
قىزىلوردا
