زاۋىتتىڭ قۋاتى ىشكى نارىقتى تولىق كولەمدە دارىلىك ونىممەن قامتاماسىز ەتۋ ءۇشىن جەتكىلىكتى كولەمدە ينەكتسيالىق ەرىتىندىلەر وندىرۋگە مۇمكىندىك بەرەدى. ءونىم ءوندىرۋدىڭ جىلدىق كولەمىنە ءجۇز ەلۋدەن استام اتاۋ ەنگىزىلگەن. كاسىپورىننىڭ وندىرىستىك قۋاتى جىلىنا 90 ملن. قۇتى ينەكتسيالىق ەرىتىندىنى قۇرايدى. پوليپروپيلەن بوتەلكەلەرىندە جاسالعان ونىمدەر تاسىمالداۋ مەن پايدالانۋدا وتە ىڭعايلى.
كومپانيا ءوز قىزمەتىندە يمپورتتى الماستىرۋ ساياساتىن باسشىلىققا الاتىنىن اتاپ ءوتۋ قاجەت. بۇل رەتتە حالىقارالىق تالاپتارعا ساي جانە قۇنى بويىنشا قولجەتىمدى دارىلىك زاتتار شىعارىلادى. سونىمەن قاتار كومپانيا تاجىكستان, قىرعىزستان, وزبەكستان جانە رەسەي سياقتى ەلدەرگە ءونىم ەكسپورتتايدى.
قازىرگى ۋاقىتتا بارشا الەمدى جايلاعان دەرت جەكە قورعانۋ قۇرالدارىمەن جانە بارلىق قاجەتتى ءدارى-دارمەكتەرمەن جەتكىلىكتى قامتاماسىز ەتۋ ءۇشىن جەكە رەسۋرستاردىڭ بولۋى قانشالىقتى ماڭىزدى ەكەندىگىن كورسەتتى. وتاندىق فارماتسەۆتيكالىق ءوندىرىستى دامىتۋدا مەملەكەتتىڭ قولداۋى جانە قازاقستاندىق دارىلىك زاتتاردى وندىرۋشىلەرمەن ۇزاق مەرزىمدى شارتتار جاساسۋ جونىندەگى "سق-فارماتسيا" جشس جوباسىن ىسكە اسىرۋ شەشۋشى ءرول اتقاردى. ىنتىماقتاستىقتىڭ مۇنداي ءتۇرى وتاندىق وندىرۋشىلەر وندىرەتىن دارىلىك زاتتار نومەنكلاتۋراسىنىڭ ءتىزىمىن كەڭەيتۋگە مۇمكىندىك بەرەدى. وسىنداي كومپانيالاردىڭ ءبىرى بىرىڭعاي ديستريبيۋتورمەن ۇزاق مەرزىمدى شارت جاساسقان "Kelun-Kazpharm" بولىپ تابىلادى.
"بۇگىندە "Kelun" كورپوراتسياسى ينتەرناتسيونالداندىرۋ ستراتەگياسىن بەلسەندى تۇردە ىلگەرىلەتۋدە جانە 20-دان استام ەلدە تانىمالدىلىققا يە بولعان ءونىمنىڭ جاپپاي ەكسپورتىن جۇزەگە اسىرۋدا. بۇل جۇمىستى ءبىز سونداي-اق سك-فارماتسيانىڭ بىرىڭعاي ديستريبيۋتورىنىڭ قولداۋىمەن, فارماتسەۆتيكا سالاسىن دامىتۋ جانە جەرگىلىكتى نارىقتا دارىلىك زاتتاردىڭ قۇنىن ايتارلىقتاي تومەندەتۋ بولىگىندە جۇزەگە اسىردىق. ءبىزدىڭ بىرلەسكەن جۇمىسىمىزدىڭ ارقاسىندا وتاندىق ءفارمونىمنىڭ ۇلەسى ەكسپورتتىڭ 80%-ىن قامتاماسىز ەتەدى, نارىقتاعى ءوندىرىستىڭ ءوزى جالپى كولەمنىڭ 20%-ىن قۇرايدى", دەيدى "Kelun-Kazpharm" جشس كوممەرتسيالىق ديرەكتورى ەرمەك مولداقاپاسوۆ.
سونداي-اق كومپانيا باسشىسىنىڭ ايتۋىنشا, وتاندىق فارماتسەۆتيكالىق زاتتار ءوندىرىسى ۇلەسىنىڭ ءوسۋى جاڭا وندىرىستەردى ىسكە قوسۋمەن جانە قولدا بار قۋاتتاردى جاڭعىرتۋمەن, سونداي-اق شەتەلدىك ارىپتەستەردى تارتۋمەن بايلانىستى.
جوعارى ساپانى قامتاماسىز ەتۋ ءۇشىن بارلىق شىعارىلاتىن ءونىم جاپونيا مەن تايۆان ءوندىرىسىنىڭ زاماناۋي جابدىقتارىندا تەستىلەۋدەن وتەدى, سونداي-اق سينگاپۋردان يمپورتتالاتىن شيكىزات پايدالانىلادى. كومپانيا العاشقىلاردىڭ ءبىرى بولىپ QR-كود ارقىلى ءونىمدى تاڭبالاۋ جۇيەسىن ەنگىزدى, ول ءونىمنىڭ قوزعالىسىن قاداعالاۋعا جانە اشىقتىقتى قامتاماسىز ەتۋگە مۇمكىندىك بەرەدى.
بۇگىندە كاسىپورىندا 420 ادام ەڭبەك ەتەدى. زاۋىت قىزمەتكەرلەرى جۇمىسقا قابىلداناتىن ءاربىر مامان ءۇشىن فارماتسەۆتيكالىق ونەركاسىپ, عىلىمي زەرتتەۋلەر مەن ازىرلەمەلەر سالاسىندا وقىتۋ جۇرگىزەدى. سونىمەن قاتار, ءوندىرىس وشاعى س.د. اسفەندياروۆ اتىنداعى مەديتسينا ۋنيۆەرسيتەتىمەن شارت جاساستى. وسىلايشا وقۋ ورنىنىڭ تۇلەكتەرى قىتايدا بىلىكتىلىگىن ارتتىرۋ بويىنشا تاعىلىمدامادان ءوتىپ, بىلىمدەرىن شىڭدايدى.
