شىمكەنت قالاسى پوليتسيا دەپارتامەنتىنىڭ قىزمەتكەرلەرىنە جاس انانىڭ كامەلەتكە تولماعان بالاسىن ساتۋ تۋرالى ۇسىنىسى بار ەكەنى تۋرالى جەدەل اقپارات كەلىپ تۇسكەن. 2020 جىلدىڭ 11 قاڭتارىندا وتكىزىلگەن جەدەل-ىزدەستىرۋ ءىس-شارالارىنىڭ ناتيجەسىندە ءوزىنىڭ ءبىر جاستاعى بالاسىن 1 000 000 تەڭگە سوماسىنداعى اقشاعا باعالاپ, ساتۋ كەزىندە 1993 جىلى تۋعان ازاماتشا ۇستالدى.
ول مۇنداي شەشىمگە اقشا تاپشىلىعىنا بايلانىستى بەل بۋعانىن جەتكىزدى جانە ودان بالانى ساتقانى ءۇشىن ساتىپ الۋشىدان العان اقشا قاراجاتتارى الىندى.
شىمكەنت قالاسىنىڭ كامەلەتكە تولماعانداردىڭ ىستەرى جونىندەگى ماماندىرىلعان اۋدانارالىق سوتىنىڭ 2020 جىلدىڭ 27 قىركۇيەگىندەگى ۇكىمىمەن اتالعان ازاماتشا قر قك-ءنىڭ 135-بابى 2-بولىگىنىڭ 12-تارماعى (كامەلەتكە تولماعاندار ساۋداسى) بويىنشا ايىپتى دەپ تانىلىپ, 6 جىلعا باس بوستاندىعىنان ايىرىلدى.
