استانادا «قازاقستان بارىسى» قازاق كۇرەسىن دامىتۋ قورىنىڭ ۇيىمداستىرۋىمەن «قازاق كۇرەسىنىڭ وتكەنى, بۇگىنى مەن بولاشاعى» اتتى عىلىمي-تاجىريبەلىك كونفەرەنتسياسى ءوتتى.
جيىندا قازاق كۇرەسىن زەرتتەۋشى عالىمدار, تاريحشىلار, ەتنوگرافتار, وبلىستىق فەدەراتسيالار باسشىلارى مەن شەتەلدىك قوناقتار, سونىڭ ءىشىندە شەتەلدەردەگى قازاق كۇرەسى فەدەراتسيالارىنىڭ جەتەكشىلەرى باياندامالار جاسادى. ال نەگىزگى باياندامانى دۇنيەجۇزىلىك قازاق كۇرەسى فەدەراتسياسىنىڭ پرەزيدەنتى سەرىك توكيەۆ پەن «قازاقستان بارىسى» قازاق كۇرەسىن دامىتۋ قورىنىڭ قامقورلىق كەڭەسىنىڭ توراعاسى ارمان شوراەۆ جاسادى.
استانادا «قازاقستان بارىسى» قازاق كۇرەسىن دامىتۋ قورىنىڭ ۇيىمداستىرۋىمەن «قازاق كۇرەسىنىڭ وتكەنى, بۇگىنى مەن بولاشاعى» اتتى عىلىمي-تاجىريبەلىك كونفەرەنتسياسى ءوتتى.
جيىندا قازاق كۇرەسىن زەرتتەۋشى عالىمدار, تاريحشىلار, ەتنوگرافتار, وبلىستىق فەدەراتسيالار باسشىلارى مەن شەتەلدىك قوناقتار, سونىڭ ءىشىندە شەتەلدەردەگى قازاق كۇرەسى فەدەراتسيالارىنىڭ جەتەكشىلەرى باياندامالار جاسادى. ال نەگىزگى باياندامانى دۇنيەجۇزىلىك قازاق كۇرەسى فەدەراتسياسىنىڭ پرەزيدەنتى سەرىك توكيەۆ پەن «قازاقستان بارىسى» قازاق كۇرەسىن دامىتۋ قورىنىڭ قامقورلىق كەڭەسىنىڭ توراعاسى ارمان شوراەۆ جاسادى.
سەرىك توكيەۆ ءوز سوزىندە ءتول كۇرەسىمىزدى دامىتۋدا اتقارىلعان جانە قازىرگى كەزدە ىستەلىپ جاتقان جۇمىستار مەن الداعى ۋاقىتقا جوسپارلانعان ءىس-شارالار تۋرالى ايتىپ بەردى. سونىمەن بىرگە, ول دۇنيەجۇزىلىك قازاق كۇرەسى فەدەراتسياسىنىڭ ەشقانداي مەملەكەتتىك ورگاننان كومەك الماي, ءتول كۇرەسىمىزدى ءوز كۇشىمەن دامىتىپ كەلە جاتقانىن, كۇرەسىمىزدىڭ سپورت جانە دەنە-شىنىقتىرۋ ىستەرى اگەنتتىگى مەن ۇلتتىق وليمپيادالىق كوميتەتتىڭ قولداۋىنا ءزارۋ بولىپ وتىرعانىن اتاپ ءوتتى. ال «قازاقستان بارىسى» قازاق كۇرەسىن دامىتۋ قورى قامقورلىق كەڭەسىنىڭ توراعاسى ارمان شوراەۆ ءاربىر قازاق ءۇشىن ءتول كۇرەسىمىزدىڭ ءمانى مەن ماڭىزىن, ونىڭ تاريحىمىزدا, دۇنيەتانىمىمىزدا الاتىن ورنى تۋرالى ايتا كەلىپ, بولاشاقتا ونى ەلىمىزدەگى №1 سپورت تۇرىنە اينالدىرۋ كەرەكتىگىن, بۇل ءۇشىن بىزگە موڭعولدار مەن جاپونداردىڭ وزىق تاجىريبەلەرىن پايدالانۋ قاجەتتىگىن اتاپ كورسەتتى.
جيىندا قازاق كۇرەسىنىڭ ماماندارى, بالۋاندار, جاتتىقتىرۋشىلار مەن تورەشىلەر ءتول كۇرەسىمىزدىڭ دامۋ تاريحى مەن قالىپتاسۋ كەزەڭدەرى, قازاق كۇرەسى ەرەجەسى مەن تورەشىلەردىڭ بىلىكتىلىگى, بالۋاننىڭ كيىمى, بولاشاق بالۋانداردى تاربيەلەۋ, مامانداردى دايىنداۋ سياقتى ماسەلەلەردى تالقىلادى. جيىندا وسى ماسەلەلەر بويىنشا قازاق كۇرەسىنىڭ ەرەجەسى مەن تورەشىلىك جايىنا جانە سپورتتىق كۇرتەشەگە وزگەرىس ەنگىزۋ تۋرالى ۇسىنىستار جاسالدى.
كونفەرەنتسيا بەس سەكتسيا بويىنشا ءوتتى. وندا 1959 جىلعى ءىى كسرو حالىقتارى سپارتاكياداسىندا قازاق كۇرەسىنەن كورسەتىلىم بەلدەسۋلەرىنە قاتىسقان ساقاتاي امانجولوۆ, قازاق كۇرەسىنەن تۇڭعىش رەت سپورت شەبەرى اتانعان ارداگەرلەر سايلاۋ ساقاەۆ پەن قۋانىش ابەكباەۆ جانە مەيىرحان امانباەۆ, سپورت ارداگەرلەرى سەرعالي جاقسىلىقباەۆ, حاميت ىسقاق, قازاقتىڭ سپورت جانە تۋريزم اكادەمياسىنىڭ پروفەسسورى ەرعالي مۇحيددينوۆ, قازاق كۇرەسىنەن قازاقستان رەسپۋبليكاسىنا ەڭبەك سىڭىرگەن جاتتىقتىرۋشى ديحانباي بيتكوزوۆ, مەملەكەتتىك جاتتىقتىرۋشى مارات جاقىت ءسوز ءسويلەپ, ءوز ويلارىن ورتاعا سالدى. كونفەرەنتسيا اياسىندا ءتول كۇرەسىمىزدىڭ دامۋىنا اتسالىسقان ازاماتتار «قازاق كۇرەسىنە قوسقان ۇلەسى ءۇشىن» جۇلدەسىمەن ماراپاتتالىپ, ادىلەتتى جوعارعى كۇرەس حارتياسى سالتاناتتى تۇردە قابىلداندى.
كونفەرەنتسيا قورىتىندىسىندا قازاق كۇرەسىن دامىتۋدا جاڭا شەشىمدەر قابىلداندى. وسى شەشىمدەر مەن دايىندالعان ماتەريالدار زاڭدى قۇجاتتار قاتارىنا ەنۋى ءۇشىن ارنايى ورىندارعا ۇسىنىلادى.
داستان كەنجالين,
«ەگەمەن قازاقستان».
سۋرەتتى تۇسىرگەن
ەرلان وماروۆ.
