باقىتقالي ورازعاليەۆ 2017 جىلى دوستارىمەن بىرگە «زەللو. ىزدەۋ» توبىن قۇردى. جاس جىگىتتىڭ بۇل ىسپەن اينالىسۋىنا اقتوبەنىڭ شەتىندەگى جيليانكا ەلدى مەكەنىندە تۇراتىن تانىستارىنىڭ بالاسىنىڭ جوعالىپ كەتۋى سەبەپ بولدى. كورشى تۇراتىن 11 جاستاعى ەكى بالا قىستىڭ ايازدى كەشىندە جوعالىپ كەتەدى. اتا-انالارى دۇرلىگىپ بالالاردى تۇنىمەن ىزدەگەنىمەن, ەش جەردەن تابا المايدى.
– بالالار ۇيلەرىنەن سومكەگە ازىق-ت ۇلىك سالىپ الىپ كەتكەن. ەندەشە ولاردى ەشكىم ۇرلاماعان, ءوز بەتىنشە ءبىر جاققا كەتكەن دەپ توپشىلادىم. قىس ورتاسىندا, ايازدى كۇنى ولار قايدا جول تارتۋى مۇمكىن؟ نە بولسا دا, الىستاعى ساياجايلارىنان ىزدەپ كورەيىك دەپ كەڭەس بەرىپ, ءبارىمىز جولعا شىقتىق. ايتقانىمداي-اق, ەكى بالانى سول جەردەن تاۋىپ الىپ, ۇيلەرىنە قايتاردىق. جالپى, وسى جاستاعى بالالار كوپ جاعدايدا زەرىككەندىكتەن, نە ويناپ ءجۇرىپ اداسىپ كەتەدى. ال جاسوسپىرىمدەردىڭ جوعالۋىنا كوبىنە ءۇي ىشىندەگى جانجال, اتا-اناسىمەن ۇرىس-كەرىس سەبەپشى بولادى. توبىمىزعا ىشتەي جالعىزدىق, تورىعۋشىلىق, ۇرەي, قورقىنىش سەزىمىنە بوي الدىرعان سوڭ وسىنداي قادامعا باراتىن جاسوسپىرىمدەرمەن جۇمىس ىستەيتىن پسيحولوگ مامان الدىق. ول بالالارعا ۇيدەن كەتىپ قالۋدىڭ سەبەپ-سالدارىن جايلاپ تۇسىندىرەدى. وكىنىشكە قاراي, بالا مەن ۇلكەننىڭ اراسىندا ءتىل تابىسۋدىڭ بولماۋىنان وسىنداي جاعدايلار تۋىپ جاتادى, – دەيدى باقىتقالي.
قازىرگى كەزدە «زەللو. ىزدەۋ» ۆولونتەرلىك توبىنىڭ 20 ۇيلەستىرۋشىسى مەن 30-40 ىزدەۋشىسى بار. كوپ جاعدايدا جەرگىلىكتى پوليتسيا قىزمەتى مەن توتەنشە جاعدايلار دەپارتامەنتى دە بۇلاردان كومەك سۇراپ جاتادى. ۆولونتەرلەر اقپارات تۇسكەن بويى جوعالعان ازاماتتىڭ سۋرەتىن الەۋمەتتىك جەلىلەرگە سالىپ, دەرەۋ جان-جاققا حابار جىبەرەدى. وسى جاعىنان العاندا ءار ۆولونتەردىڭ وزىنە بەكىتىلگەن اۋدانى بار.
ۇلتتىق قىزىل جارتى اي قوعامى فيليالىنىڭ قىزمەتكەرلەرى ءار توقسان سايىن وسى توپتىڭ مۇشەلەرىنە وقۋ ترەنينگتەرىن وتكىزەدى. سونداي-اق وبلىستىق توتەنشە جاعدايلار دەپارتامەنتى ماماندارى ۆولونتەرلەردى بيىككە ورمەلەۋگە جاتتىقتىرادى, سۋعا كەتكەن ادامدارعا العاشقى كومەك كورسەتۋدى ۇيرەتەدى. «وسى جاعىنان العاندا, ءبىزدىڭ توبىمىز كاسىبي قۇتقارۋشىلارعا اينالىپ كەلەدى», دەيدى ب.ورازعاليەۆ.
ايتا كەتۋ كەرەك, جىل باسىنان بەرى «زەللو. ىزدەۋ» توبىنا 60 اقتوبەلىك تۇرعىننىڭ جوعالۋى تۋرالى دەرەك تىركەلسە, 50 ادامدى ۆولونتەرلەر امان-ەسەن تاۋىپ بەرگەن. بۇلاردىڭ ىشىندە ەسىن جوعالتقان ەرەسەك ادامدار دا, ۇمىتشاقتىق دەرتىنە شالدىققان مۇگەدەك جىگىتتەر دە, جاس بالالار دا بار. بۇگىندە توپ مۇشەلەرىنىڭ ارقايسىسىنىڭ ءوز جۇمىستارى بولعانىمەن, ولاردى ورتاق ماقسات – قيىن جاعدايدا قالعاندارعا كومەكتەسۋ ءىسى بىرىكتىرەدى.
اقتوبە وبلىسى
