جامبىل وبلىسىنىڭ پروكۋرورى نۇرعالىم ءابدىروۆ پەن وبلىستىق پوليتسيا دەپارتامەنتىنىڭ باستىعى, گەنەرال-مايور جانات سۇلەيمەنوۆ اتالعان جوبانىڭ ىسكە اسىرىلۋ بارىسىمەن تانىستى. بۇل جوبا اعىمداعى جىلدىڭ 1 قازانىنان باستاپ ەنگىزىلگەن بولاتىن.
قاناتقاقتى جوبا مەملەكەت باسشىسى قاسىم-جومارت توقاەۆتىڭ جولداۋىندا ايتىلعان تاپسىرمالارمەن بىرگە "تسيفرلىق قازاقستان" مەملەكەتتىك باعدارلاماسى اياسىندا ىسكە اسىرىلۋدا. سونىمەن قاتار, جوبا پروتسەسكە قاتىسۋشىلاردىڭ كونستيتۋتسيالىق قۇقىقتارىن قورعاۋعا, قىلمىستىڭ جاي-كۇيى تۋرالى دەرەكتەردىڭ انىقتىعىن قامتاماسىز ەتۋگە, مانيپۋلياتسيالار مەن بۇرمالاۋشىلىقتاردى قىسقارتۋعا, تەرگەپ-تەكسەرۋ پروتسەسىن وڭتايلاندىرۋعا, پروتسەسكە قاتىسۋشىلاردىڭ بايلانىستارىن بارىنشا ازايتۋعا باعىتتالعان. جامبىل وبلىستىق پوليتسيا دەپارتامەنتىنىڭ مالىمەتىنشە, بۇل جوبانىڭ ەرەكشەلىگى – پروكۋرورلار بۇرىن تەرگەۋ ورگانى دەربەس قابىلداعان نەگىزگى پروتسەدۋرالىق شەشىمدەردى ەلەكتروندى فورماتتا الدىن-الا كەلىسەدى جانە ازاماتتاردى قىلمىستىق قۋدالاۋ شەڭبەرىنە زاڭسىز تارتۋدى بولدىرماۋعا كومەكتەسەدى. جاڭا جوبانى ءتيىمدى ەنگىزۋ ماقساتىندا وبلىس اكىمدىگىنىڭ قولداۋىمەن 250 جۇمىس ورنىن جابدىقتاۋ ءۇشىن 160 ميلليون تەڭگەگە كومپيۋتەرلىك تەحنيكا ساتىپ الىنعان.
جۇمىسپەن تانىسۋ بارىسىندا ءوڭىر پروكۋرورى مەن وبلىستىڭ باس پوليتسەيى ناقتى ۋاقىت رەجيمىندە سوتقا دەيىنگى تەرگەپ-تەكسەرۋدىڭ بىرىڭعاي ءتىزىلىمى بازاسىندا ەلەكتروندىق جەكەلەگەن پروتسەستىك شەشىمدەردى دايىنداۋ پروتسەسىن كوردى. سودان كەيىن ولار پروكۋرورعا كەلىسۋ ءۇشىن جىبەرىلدى. سونداي-اق, ولار قالالىق پوليتسيا ءبولىمى مەن پروكۋراتۋرانىڭ ءوزارا ءىس-قيمىل پروتسەسىمەن تانىستى. وبلىس پروكۋرورى نۇرعالىم ءابدىروۆ جوبانى اپتا سايىن قورىتىندىلاۋدى, جۇمىستاعى كەمشىلىكتەردى ازايتۋدى جانە ەلەكتروندىق جۇيەنى جەتىلدىرۋ بويىنشا ۇسىنىستار ەنگىزۋدى تاپسىردى. ال, وبلىستىق پوليتسيا دەپارتامەنتىنىڭ باستىعى جانات سۇلەيمەنوۆ انىقتاۋشىلار مەن تەرگەۋشىلەردى ۇنەمى وقىتۋ جانە بىلىكتىلىگىن ارتتىرۋ قاجەتتىگى تۋرالى ايتتى.
كەزدەسۋ سوڭىندا "تاراز – قاۋىپسىز قالا" تۇجىرىمداماسى اياسىندا وبلىس ورتالىعىنداعى قىلمىستىق احۋالعا بايلانىستى ارنايى كەڭەس ءوتتى.
