تاياۋدا ۇقك شەكارا اكادەمياسىنىڭ قاراويداعى دالالىق وقۋدى قامتاماسىز ەتۋ باسقارماسىندا, مۇنان كەيىن الماتى وبلىسى بويىنشا دەپارتامەنتىنىڭ قاراساي اۋدانى بويىنشا شەكارا باسقارماسىندا وتكەن ءىس-شارالار – باتىر شەكاراشى رادجان باتىرحانوۆتىڭ رۋحىنا تاعزىم ەتۋگە ارنالدى. ال اتالعان شارالاردى شەكاراشى ارداگەرلەردىڭ «زاستاۆا تارلاندارى» رەسپۋبليكالىق قوعامدىق ۇيىمىنىڭ الماتى قالاسى جانە الماتى وبلىسى بويىنشا فيليالى ۇيىمداستىردى.
1994 جىلى ءوزىنىڭ وتان الدىنداعى بورىشىن سول كەزدەگى كۇرشىم شەكارا وتريادىنىڭ «شىڭدىعاتاي» شەكارا زاستاۆاسىندا اتقارىپ جۇرگەن جەرىنەن ءوزى سۇرانىپ, تاجىك-اۋعان شەكاراسىنا اتتانعان رادجاندى الدا اۋىر ۇرىستىڭ كۇتىپ تۇرعانىن ەشكىم بىلمەك تۇگىلى سەزبەگەن دە ەدى.
1994 جىلدىڭ 28 قىركۇيەگى كۇنى ەكى جۇزدەن استام مۇزداي قارۋلانعان مودجاحەد تمد-عا مۇشە مەملەكەتتىڭ, ياعني تاجىكستاننىڭ وڭتۇستىك شەكاراسىن بۇزىپ كىرەدى دە حوروگ قالاسىنىڭ اۋماعىنا قاراي بەت الادى. وسى ساتتە توعىز اۆتولىككە مىنگەن مودجاحەدتەردىڭ جولىنا قازاقستاندىق جانە رەسەيلىك شەكاراشىلار قارسى تۇرادى دا, قورعانىسقا ىڭعايلى توبە ءۇشىن قاقتىعىس باستالىپ كەتەدى. وسى ۇرىستا رەسەيلىك لەيتەنانت ۆلاديمير سەليۋك پەن قازاقستاندىق شەكاراشى رادجان باتىرحانوۆ توبەنى الۋ ءۇشىن دۇشپانمەن ەرلەرشە ارپالىسادى. الايدا لەيتەنانت اۋىر جارالانادى دا, رادجان كومانديرىن جاۋدىڭ جاڭبىرشا توپەلەگەن وعىنىڭ استىنان الىپ شىعادى. سوسىن قول پۋلەمەتىمەن اتىستى جالعاستىرعان ول بولىمشەنىڭ قولايلى جەرگە ورنىعىپ الىپ, مودجاحەدتەرگە تىل جاعىنان سوققى بەرۋگە مۇمكىندىك جاسايدى. وسى ۇرىستا ءوزىنىڭ اسكەري بورىشىنا مەيلىنشە ادال قازاق ەلىنىڭ ورەنى قازا تابادى.
سودان بەرى ارادان سىرعىپ 26 جىل ءوتتى. وسى جىلداردىڭ ىشىندە باتىر شەكاراشىنىڭ ەرلىگىن ۇلىقتاۋعا ارنالعان شارالار از بولعان جوق. باتىر شەكاراشى قازاقستان رەسپۋبليكاسى پرەزيدەنتىنىڭ جارلىعىمەن ءىى دارەجەلى «ايبىن» وردەنىمەن ماراپاتتالىپ, 2000 جىلى ونىڭ ەسىمى قازىرگى كۇرشىم اۋدانى بويىنشا شەكارا باسقارماسىنىڭ «شىڭدىعاتاي» شەكارا بولىمشەسىنە بەرىلدى. سونىمەن قاتار تاجىكستان ەلىنىڭ استاناسى دۋشانبە قالاسىنداعى كوشە مەن مەكتەپ رادجان باتىرحانوۆتىڭ اتىمەن اتالادى. بۇعان جىل سايىن رادجان تۋىپ-وسكەن شىعىس قازاقستان وڭىرىندەگى كاتونقاراعايدا ءوتىپ كەلە جاتقان ءىس-شارالار مەن باتىر اتىنداعى كوشەنى دە قوسۋعا بولادى.
ۇقك شەكارا اكادەمياسىنىڭ دالالىق وقۋدى قامتاماسىز ەتۋ باسقارماسىندا وتكەن شاراعا «زاستاۆا تارلاندارى» رەسپۋبليكالىق قوعامدىق ۇيىمىنىڭ الماتى وبلىستىق فيليالىنىڭ توراعاسى, زاپاستاعى پولكوۆنيك ا.دۋبوۆپەن بىرگە «تاجىك-اۋعان شەكاراسىنداعى جاۋىنگەرلىك ۇرىستارعا جانە اسكەري قاقتىعىستارعا قاتىسۋشى ارداگەرلەر وداعىنىڭ» الماتى وبلىستىق فيليالىنىڭ توراعاسى, زاپاستاعى پودپولكوۆنيك مارات دوسىباەۆ, تاجىك-اۋعان شەكاراسىندا سارىوزەك روتاسىن باسقارعان زاپاستاعى پولكوۆنيك اسقار يزبانوۆ, مەرزىمدى قىزمەتتىڭ اعا سەرجانتى الماس تاليپوۆتار قاتىستى. ولار – وسىدان تۇپ-تۋرا 26 جىل بۇرىن 28 قىركۇيەكتە بولعان قاقتىعىستى كوزدەرىمەن كورىپ قانا قويماي, رادجان باتىرحانوۆ سياقتى باتىر شەكاراشىنىڭ ارقاسىندا جاۋعا تىل جاقتان سوققى بەرۋشىلەردى باسقارعان جانە سول قاقتىعىسقا بەلسەنە قاتىسقان ارداگەرلەر.
باسقوسۋعا قاتىسۋشىلار ەسىمى شەكارا قىزمەتىنىڭ تاريحىنا التىن ارىپپەن جازىلعان باتىر رادجان تۋرالى ارىدەن اڭگىمە قوزعاپ, كۋرسانتتاردى ەرلىككە ۇندەدى. اسىرەسە قورعانىس مينيسترلىگىنىڭ سارىوزەكتە جاساقتالعان روتاسىن باسقارعان زاپاستاعى پولكوۆنيك ا.يزبانوۆ پەن ونىڭ ورىنباسارى بولعان پودپولكوۆنيك م.دوسىباەۆتاردىڭ ايتارى از بولعان جوق. 1994 جىلدىڭ 28 قىركۇيەگىندە جاۋمەن بولعان قاقتىعىستا شەكاراشىلاردىڭ قايسارلىقتارى مەن تاباندى ارەكەتتەرى جايىندا ەستەلىكتەر ايتتى.
ال الماتى وبلىسى بويىنشا دەپارتامەنتىنىڭ قاراساي اۋدانى بويىنشا شەكارا باسقارماسىندا وتكەن ەكىنشى ءىس-شاراعا زاپاستاعى پولكوۆنيك ا.دۋبوۆپەن بىرگە شەكاراشى ارداگەرلەردىڭ الماتى قالاسىنداعى فيليالىنىڭ توراعاسى, زاپاستاعى گەنەرال-مايور م.ءماجيتوۆ قاتىستى.
ايتا كەتۋ كەرەك, توقسانىنشى جىلدارى تاجىك-اۋعان شەكاراسىندا ەرلىكپەن قازا تاپقان قازاقستاندىق اسكەري قىزمەتشىلەرگە قويىلعان ەسكەرتكىش شەكارا قىزمەتى بويىنشا تەك اتالعان ۇجىمدا ورناتىلعان. سوندىقتان جىل سايىن 7 ءساۋىر – ەرلىكپەن قازا تاپقان ۇلتتىق ۇلاننىڭ 17 ساربازىن ەسكە الۋ ءۇشىن تاجىك-اۋعان شەكاراسىنىڭ ارداگەرلەرى وسىندا جينالىپ, رادجان باتىرحانوۆ باستاعان باتىرلارىمىزعا تاعزىم ەتۋدى داستۇرگە اينالدىرعان.
زاپاستاعى گەنەرال-مايور مارات ءماجيتوۆ شارانىڭ ماڭىزىنا ەرەكشە توقتالىپ وتكەن سوڭ ەسكەرتكىشكە گۇل شوقتارىن قويۋ ءراسىمى دە باستالدى. گۇل شوقتارى سالىنعان سەبەتتى كوتەرگەن قوس شەكاراشى باستاعان توپ قازا تاپقاندارعا اسكەري قۇرمەت كورسەتتى.
ءيا, بويلارىندا پاتريوتتىق رۋحتارى بار وسكەلەڭ ۇرپاق باردا باتىرلارىمىزدىڭ اتى وشپەيدى. سولاردىڭ ءبىرى رادجاننىڭ جاساعان ەرلىگى – شەكاراشىلاردىڭ وتان ءۇشىن وتقا تۇسۋگە دايىن ەكەنىنىڭ ايعاعى.
تامارا داۋلەتباەۆا,
ۇقك شەكارا قىزمەتىنىڭ زاپاستاعى پودپولكوۆنيگى
