كەزدەسۋدە جاڭا كونستيتۋتسيا جوباسىنىڭ جالپى ەرەجەلەرى, نەگىزگى باپتارى, قازىرگى قولدانىستاعى كونستيتۋتسيادان ارتىقشىلىعى جونىندە اشىق اڭگىمە ءوربىدى.
وبلىستىق ءماسليحات توراعاسى سايلاۋبەك ەسجانوۆ ءوزىنىڭ كونستيتۋتسيالىق كوميسسيا قۇرامىندا جۇمىس ىستەگەنىن, جاڭا اتا زاڭ جوباسىنىڭ ادام مەن ونىڭ ءومىرىن, قۇقىقتارى مەن بوستاندىقتارىن مەملەكەتتىڭ ەڭ جوعارى قۇندىلىعى رەتىندە قاراستىراتىنىن ايتتى.
«جاڭا كونستيتۋتسيانى جاساۋ بارىسىندا جۇمىس بارىنشا اشىق جۇرگىزىلدى. كوميسسيانىڭ بارلىق وتىرىسى تىكەلەي ەفيردەن كورسەتىلدى. ەل كولەمىندە ازاماتتاردان, ساراپشىلاردان, ەڭبەك ۇجىمدارىنان مىڭداعان ۇسىنىس ءتۇستى. ولاردىڭ ەلەۋلى بولىگى قورىتىندى ماتىندە ەسكەرىلدى. جاڭا كونستيتۋتسيا – كابينەتتە جاسالعان قۇجات ەمەس, بۇل بايىپتى جۇرگىزىلگەن قوعامدىق ديالوگتىڭ ناتيجەسى. مەن بۇگىنگى جاڭا جوبانى ناعىز حالىقتىق كونستيتۋتسيا دەپ اتار ەدىم. ويتكەنى حالىق جوبانى تۇزۋگە بەلسەندى قاتىستى. قازىر ەكونوميكا, تۇرمىس جاعدايى, ءومىر ساپاسى, حالىق سۇرانىسى وزگەردى. سوندىقتان جاڭا تالاپتارعا جاۋاپ بەرەتىن باستى قۇجات – اتا زاڭىمىز دا جاڭارۋ كەرەك. ەڭ باستىسى, ازاماتتاردى قورعاۋ كەپىلدىكتەرى مەن ادام قۇقىعى كۇشەيتىلدى. اڭگىمە ەڭبەك قۇقىعى, الەۋمەتتىك قورعاۋ, ساپالى ءبىلىم مەن مەديتسيناعا قولجەتىمدىلىك, ءادىل سوت تۋرالى بولىپ وتىر. وسىنىڭ ءبارىنىڭ وزدەرىڭىز سياقتى ەڭبەك ادامدارىنا تىكەلەي قاتىسى بار», دەدى وبلىستىق ءماسليحات توراعاسى.
وبلىستىق ءماسليحات دەپۋتاتى دينارا وتەباەۆا كونستيتۋتسيانىڭ جاڭا جوباسىندا جوعارى ەكولوگيالىق مادەنيەتتى قالىپتاستىرۋ, تاريحي-مادەني مۇرانى ساقتاۋ, ءتول مادەنيەتتى قولداۋ ماسەلەلەرىنىڭ ءبىرىنشى رەت ناقتى كورىنىس تاۋىپ وتىرعانىن ايتتى.
اڭگىمە بارىسىندا فابريكا ۇجىمى وزدەرىن تولعاندىرىپ جۇرگەن بىرقاتار سۇراقتارعا جاۋاپ الدى. ماسەلەن, جۇمىسشىلاردىڭ ءبىرى قويعان «كەلەشەكتە ورىس ءتىلىنىڭ تاعدىرى قالاي بولماق؟» دەگەن ساۋالعا دەپۋتات ماحاببات جۇتاەۆ: «كوپشىلىك تاراپىنان قازاق ءتىلى مەن ورىس تىلىنە قاتىستى كوپتەگەن سۇراقتار ءتۇسىپ جاتقانىن بىلەسىزدەر. بۇل زاڭدى دا. جاڭا كونستيتۋتسيانىڭ جوباسىندا بۇل جونىندە قازاقستان رەسپۋبليكاسىنىڭ مەملەكەتتىك ءتىلى – قازاق ءتىلى. مەملەكەتتىك ۇيىمداردا جانە جەرگىلىكتى ءوزىن-ءوزى باسقارۋ ورگاندارىندا قازاق تىلىمەن قاتار ورىس ءتىلى رەسمي تۇردە قولدانىلادى. مەملەكەت ءبىرتۇتاس قازاقستان حالقىنىڭ تىلدەرىن ۇيرەنۋ جانە دامىتۋ ءۇشىن جاعداي جاساۋعا قامقورلىق كورسەتەدى دەپ تايعا تاڭبا باسقانداي انىق جازىلعان», دەپ جاۋاپ بەردى.
جيىن سوڭىندا حالىق قالاۋلىلارى فابريكا جۇمىسشىلارىن 15 ناۋرىزدا وتەتىن رەفەرەندۋمعا بەلسەندى قاتىسۋعا ۇندەدى.
