قيىن-قىستاۋ كەزەڭدە سىر بويىندا كاسىپكەرلەر مەن قاراپايىم تۇرعىندار كومەگىمەن اۋرۋحانالار مەن ەمحانالاردا قات بولىپ تۇرعان اپپاراتتار الىندى. كوپبالالى جانە الەۋمەتتىك جاعدايى تومەن وتباسىلارى دا قايىرىمدىلىقتان قۇر قالعان جوق. وبلىس حالقى ەمى تابىلماعان كەسەلگە قارسى كۇرەستە وسىلايشا ەلدىك تانىتتى. كوپ جۇمىلعان جەردە قانداي قيىندىقتىڭ دا جولى تابىلاتىنى بەلگىلى عوي, بىرتە-بىرتە ىندەتتىڭ دە اياسى تارىلىپ, ەل ەسىن جيدى.
بىراق ءدال قازىر وڭىردە جاقىنىنا جاناشىرلىق تانىتاتىن وسىنداي ءۇردىس سايابىرسىپ قالعانداي. ءتىپتى كەشەگى كەسەل ورشىگەن ساتتە تىنىم تاپپاعان ەرىكتىلەر كومانداسىنىڭ دا ەكپىنى قازىر ونشالىقتى سەزىلمەيدى. جەرگىلىكتى بيلىك تاراپىنان ۆولونتەرلەردى باعىتتاپ وتىرۋ دا ۇمىت قالعان سىڭايلى.
سوڭعى ءبىر-ەكى اي كولەمىندە وسى باعىتتا جەكەلەگەن اۋدانداردان عانا جىلت ەتكەن جاقسى جاڭالىقتار تاۋىپ, گازەتكە جاريالادىق. جاڭاقورعان اۋدانىنداعى «جاڭارعان جاڭاقورعان جاستارى» ەرىكتىلەر توبى قايىرىمدىلىق شارالارىن ۇزبەپتى. قازالىلىق جاستار دا ءوزارا اقىلداسىپ, جاعدايى قيىن وتباسىلار ءۇشىن 2 ءۇيدىڭ قۇرىلىسىن باستاپتى. ونىڭ بىرەۋىن ءبىتىرىپ, قينالعان جاندارعا قۋانىش سىيلاسا, ەكىنشىسىنىڭ دە قۇرىلىسى اياقتالىپ قالدى.
بىراق باسقا اۋدانداردا مۇنداي جاڭالىقتار جوقتىڭ قاسى. ءبىر حابار بولا ما دەگەن ۇمىتپەن, اۋدان اكىمدىكتەرىندەگى, ءتيىستى باسقارمالارداعى ءباسپاسوز قىزمەتتەرىنە حابارلاستىق. باسقا جاڭالىقتان مۇدىرمەيتىن كوپشىلىگى جاقىنىنا جاناشىرلىق تانىتاتىن شارالارعا كەلگەندە كۇمىلجىپ قويا بەرەدى. سۇراعان مالىمەتىمىزدىڭ سوڭى سيىرقۇيمىشاقتانىپ كەتە بەرەتىنىنە قاراعاندا جەرگىلىكتى بيلىك ەرىكتىلەر قيمىلىن ەرىككەننىڭ تىرلىگى سانايتىن سياقتى. ايتپەسە جۇزدەگەن جاستاردى يگىلىكتى شاراعا ۇيىستىرۋعا بولادى عوي.
قازىر وڭىردە كۇرىش وراعى قىزىپ تۇرعان شاق. جازدايعى ەڭبەكتىڭ ناتيجەسىن كورەر كەزەڭنىڭ باسقا شارۋاعا مويىن بۇرعىزبايتىنى دا راس. ونىڭ ۇستىنە حابارى سەزىلىپ تۇرعان باسقا دا ساياسي ناۋقاندارعا بايلانىستى قاربالاس شارۋا ءجۇرىپ جاتقان بولار. بىراق بۇل مەملەكەت باسشىسىنىڭ باستاماسىمەن قولعا الىنعان ۆولونتەرلەر جىلىنا, «جاقىنىڭا جاناشىر بول!» ۇرانى شەڭبەرىندەگى شارالارعا سەلقوس قاراۋعا سەبەپ بولماسا كەرەك. سالىستىرعانداي بولمايىق, بىراق وزگە وبلىستار بۇل باعىتتا بىزدەن الدەقايدا وزىق تۇر. ال سىرداعى سايابىر تىرلىكتىڭ سەبەبىن كىمنەن سۇرايمىز؟!
قىزىلوردا وبلىسى
