مينيسترلىك تاراتقان مالىمەتكە سۇيەنسەك, ايماقتىق كوميسسيانىڭ شەشىمىمەن اتىراۋ قالاسىنداعى كوروناۆيرۋسپەن اۋىرعان №1 ەمحانانىڭ 11 مەديتسينا قىزمەتكەرىنە الەۋمەتتىك تولەم تولەنەتىن بولىپ وتىر. بۇدان بۇرىن اتالعان ەمحانا قىزمەتكەرلەرى وبلىستىق دەنساۋلىق ساقتاۋ باسقارماسىنا الەۋمەتتىك تولەمدەر تاعايىنداۋ تۋرالى وتىنىشتەرىن قاراۋدان باس تارتقانىنا بايلانىستى شاعىم ايتقان-دى. جۇرت اۋىرىپ جاتقاندا كاسىبي مىندەتىن ورىنداۋدان باس تارتپاعان ەمحانا قىزمەتكەرلەرىنىڭ كوپشىلىگى كوروناۆيرۋسپەن اۋىرعان. ال وبلىستىق كوميسسيانىڭ قاراۋىنا №1 ەمحانانىڭ اكىمشىلىگى 33 مەديتسينا قىزمەتكەرىنىڭ قۇجاتىن ۇسىنىپتى. ونىڭ ىشىندە تەك 10 ءوتىنىش قانا ماقۇلدانعان.
ەندى مىنە, دەنساۋلىق ساقتاۋ مينيسترلىگى مەن ەڭبەك جانە حالىقتى الەۋمەتتىك قورعاۋ مينيسترلىگىنىڭ 2020 جىلعى 10 قازانداعى №129 بىرلەسكەن بۇيرىعىنا وزگەرىستەر ەنگىزىلىپ وتىر. بۇل ناۋقاس جانە قايتىس بولعان مەديتسينا قىزمەتكەرلەرىنە وتەماقىلاردى قاراۋ جانە تاعايىنداۋ پروتسەدۋرالارىن ەداۋىر جەڭىلدەتتى. وسىدان كەيىن وبلىستىق كوميسسيا مۇشەلەرى 23 ادامنىڭ قۇجاتتارىن قايتا قارادى. الايدا 22 وتىنىشكە دالەلدى سەبەپپەن باس تارتىلىپ وتىر. ال ءبىر قۇجاتقا قاتىستى وڭ شەشىم قابىلداندى.
وبلىستىق دەنساۋلىق ساقتاۋ باسقارماسى باسشىسىنىڭ مىندەتىن اتقارۋشى اسحان بايدۋاليەۆتىڭ مالىمەتىنە سۇيەنسەك, مۇنايلى وڭىردە قاۋىپتى ىندەتپەن اۋىرعان 1 105 مەديتسينا قىزمەتكەرى تىركەلىپتى. وسىعان بايلانىستى 955 قىزمەتكەر وتەماقى الۋ ءۇشىن ءوتىنىش بەردى. ونىڭ ىشىندە كوروناۆيرۋستى جۇقتىرعان 501, ۆيرۋستىق پنەۆمونيامەن اۋىرعان 454 قىزمەتكەر بار.
«الەۋمەتتىك مەديتسينالىق ساقتاندىرۋ قورى» اتىراۋ وبلىسى بويىنشا فيليالىنىڭ ديرەكتورى ءسابيت قۇرالبەكتىڭ مالىمەتىنە سۇيەنسەك, قىركۇيەكتىڭ قورىتىندىسىمەن 828 مەديتسينا قىزمەتكەرىنە 160,476 ملن تەڭگە كولەمىندە ۇستەمەاقى تولەۋ جوسپارلانىپ وتىر.
– اتىراۋ وبلىسىندا ناۋرىز ايىندا 857 مەديتسينا قىزمەتكەرىنە 66,1 ملن تەڭگەگە ۇستەمەاقى بەرىلدى. ساۋىردە 1 080 مەديتسينا قىزمەتكەرى 158,1 ملن تەڭگە, مامىردا سالانىڭ 1 429 قىزمەتكەرى 255,35 ملن تەڭگە, ماۋسىمدا 2019 مەديتسينا قىزمەتكەرى 390,59 ملن تەڭگە كولەمىندە ۇستەمەاقى الدى. ال شىلدەدە 2 475 اق حالاتتىعا 796,1 ملن تەڭگە, تامىزدا 2 205 مەديتسينا قىزمەتكەرىنە 476,0 ملن تەڭگە ۇستەمەاقى تولەندى, – دەيدى س.قۇرالبەك.
اتىراۋ وبلىسى
