قازاقستان رەسپۋبليكاسى مەملەكەتتىك قىزمەت ىستەرى اگەنتتىگىنىڭ ءتورايىمى انار جايىلعانوۆا مەن بۇۇدب-نىڭ قازاقستانداعى تۇراقتى وكىلى ياكۋپ بەريش سەرىكتەستىك پەن 2021-2025 جىلدارعا ارنالعان ەلدىك باعدارلاما اياسىندا ءارى قارايعى ىنتىماقتاستىقتىڭ باسىمدىقتارىن تالقىلاۋ ماقساتىندا كەزدەسۋ وتكىزدى.
كەزدەسۋ بارىسىندا انار جايىلعانوۆا پرەزيدەنت قاسىم - جومارت توقاەۆتىڭ سوڭعى جولداۋىنا بايلانىستى اگەنتتىك تاراپىنان مەملەكەتتىك قىزمەتتى ترانسفورماتسيالاۋدىڭ باسىم باعىتتارى تۋرالى كوزقاراسىمەن ءبولىستى. "اگەنتتىك قازاقستاندىق مەملەكەتتىك قىزمەت تيىمدىلىگىن, مەملەكەتتىك قىزمەت ساپاسىن ارتتىرۋ جانە پاندەميا جاعدايىندا مەملەكەتتىك اپپاراتتى ودان ءارى كاسىبيلەندىرۋ ماقساتىندا بۇۇدب-مەن ىنتىماقتاستىقتى جالعاستىرۋعا مۇددەلى", دەدى انار جايىلعانوۆا.
بۇۇدب مەن اگەنتتىكتىڭ بىرلەسە جۇزەگە اسىرعان سوڭعى ءىس-شارالارىنا مەملەكەتتىك قىزمەتتەردى, ونىڭ ىشىندە تسيفرلىق فورماتتا ۇسىنىلاتىن مەملەكەتتىك قىزمەتتەردى بىرىڭعاي باعالاۋدى ازىرلەۋ, مەملەكەتتىك قىزمەتتەر جانە مەملەكەتتىك قىزمەتشىلەردىڭ ەتيكاسىن باعالاۋ ماسەلەلەرى بويىنشا الەۋمەتتىك ساۋالنامالار جۇرگىزۋ, مەملەكەتتىك قىزمەتشىلەردىڭ جاڭا ادەپ كودەكسىنىڭ جوباسىن ازىرلەۋ, سونداي-اق ۇكىمەتتىك ەمەس ۇيىمداردىڭ مەملەكەتتىك قىزمەتتەر قوعامدىق مونيتورينگىنە قاتىسۋ الەۋەتىن ارتتىرۋ كىرەدى.
مەملەكەتتىك قىزمەت ىستەرى اگەنتتىگى مەن بۇۇدب پەرسونالدى باسقارۋ سالاسىنداعى بىرقاتار جوبالاردى, سونىڭ ىشىندە بارلىق مەملەكەتتىك ورگانداردا ىسكە قوسۋ جوسپارلانعان مەملەكەتتىك قىزمەتكەرلەر ەڭبەكاقىسىن تولەۋ جۇيەسىنە فاكتور-بالدىق شكالانى ەنگىزۋ جانە كادرلىق قىزمەتتەر جۇمىسىنىڭ تسيفرلى پلاتفورماسى i-Qyzmet باستاماسىن پيلوتتىق سىناقتان وتكىزدى.
"بۇۇدب ناتيجەسىندە بىرقاتار ءساتتى جوبالار مەن ماڭىزدى باستامالار بىرلەسە جۇزەگە اسىرىلعان مەملەكەتتىك قىزمەت اگەنتتىگىمەن ۇزاق مەرزىمدى سەرىكتەستىكتى جوعارى باعالايدى. ءبىز ءبىرىنشى كەزەكتە تولاسسىز تسيفرلاندىرۋ, مەملەكەتتىك قىزمەتشىلەردى جاڭا داعدىلارعا ۇيرەتۋ جانە جالپى, داعدارىستارعا قارسى تۇرۋعا دايىن بولۋ باعىتتارىنا اسا نازار اۋدارا وتىرىپ, مەملەكەتتىك قىزمەت جۇيەسىن نىعايتۋ سالاسىندا جۇمىسىمىزدى جالعاستىرماقپىز", دەپ اتاپ ءوتتى ياكۋپ بەريش.
قازاقستاندا COVID-19 پاندەمياسى باستالعاننان بەرى بۇۇدب استانا مەملەكەتتىك قىزمەت حابىمەن سەرىكتەستىكتە ۇكىمەتكە مەملەكەتتىك ورگاندار بيزنەس-پروتسەستەرىنىڭ ساباقتاستىعىن قامتاماسىز ەتۋدە قولداۋ كورسەتىپ كەلەدى. ورتالىق جانە جەرگىلىكتى اتقارۋشى ورگانداردىڭ مەملەكەتتىك قىزمەتشىلەرى قاشىقتان جۇمىس ىستەۋ جاعدايىندا ءوز قىزمەتىنىڭ تيىمدىلىگىن ارتتىرۋ ءۇشىن نەگىزگى تسيفرلىق جانە كوممۋنيكاتيۆتىك داعدىلاردى دامىتۋ بويىنشا وقۋدان ءوتتى. سونىمەن قاتار, بۇۇدب i-Qyzmet اقپاراتتىق جۇيەسىن قولدانۋدى قوسا العاندا, مەملەكەتتىك سەكتورداعى ادام رەسۋرستارىن باسقارۋداعى بيزنەس-پروتسەستەردى تسيفرلاندىرۋ بويىنشا ۇسىنىستار جيىنتىعىن ازىرلەۋگە كومەكتەستى.
كەزدەسۋدە ادامي كاپيتالدى دامىتۋ, تسيفرلىق وقىتۋ جانە حالىققا مەملەكەتتiك قىزمەتتەردى ۇزدىكسىز كورسەتۋ ماڭىزدىلىعى ەسكەرىلە وتىرىپ, ودان ءارى ىنتىماقتاستىقتى كەڭەيتۋدىڭ ناقتى باعىتتارى تالقىلاندى.
ء"بىز قازاقستان مەملەكەتتىك قىزمەت سالاسىن قولداۋ ءۇشىن جوعارى كاسىبي ساراپتاما مەن يننوۆاتسيالىق شەشىمدەردى جۇمىلدىرۋدى جالعاستىرامىز. ءبىزدىڭ بىرلەسكەن كۇش-جىگەرىمىز ەلدىڭ بارلىق تۇرعىندارىنا پايدا اكەلەتىنىنە سەنىمدىمىن" دەپ قورىتىندىلادى بۇۇ دامۋ باعدارلاماسىنىڭ قازاقستانداعى تۇراقتى وكىلى ياكۋپ بەريش.
