برازيليادان الىنعان ءدان سەپكىش قۇرىلعىنىڭ كومەگىمەن, ماساقتى داقىلداردىڭ تۇسىمدىلىگى 2 ەسە ارتقان. اۋىل شارۋاشىلىعى سالاسىندا جاڭا تەحنولوگيالاردىڭ پايدالانىلۋى جايىندا قازىعۇرت اۋدانى, «شاربۇلاق» اۋىلدىق وكرۋگىندە وتكەن سەمينار-كەڭەستە كەڭىنەن ايتىلدى. اشىق اسپان استىندا وتكەن باسقوسۋعا وبلىس اكىمى ومىرزاق شوكەەۆ, اگروبيزنەس وكىلدەرى, اۋدان, قالا اكىمدەرى مەن شارۋالار قاتىستى.
ءسۇر تاناپتا قالدىرماي تىكەلەي سەبۋ ادىستەرىن الەمنىڭ دامىعان ەلدەرى, اتاپ ايتقاندا اقش, كانادا, برازيليا, ارگەنتينا ەلدەرىنىڭ شارۋالارى كەڭىنەن پايدالانادى. سوڭعى جىلدارى كوپ ەلدەردە نولدىك تەحنولوگيانى پايدالانۋ ارقىلى وسىرىلەتىن ەگىستىكتىڭ كولەمى ارتىپ كەلەدى. ايدالماعان جەرگە داقىلداردى تىكەلەي سەبۋ قازاقستاننىڭ سولتۇستىك ايماقتارىندا دا, اسىرەسە شولەيتتى, سۋ جانە جەل ەروزياسىنا ۇشىراعان جەرلەردە, ءداندى داقىلداردى نولدىك تەحنولوگيامەن ءوسىرۋدىڭ تيىمدىلىگى دالەلدەندى.
"جاڭا تەحنولوگيالارعا مىندەتتى تۇردە كوشۋىمىز كەرەك. ويتكەنى مىنا باسەكەلەستىك زاماندا ءداستۇرلى تەحنولوگيا الىسقا اپارمايدى ءبىزدى. ءبىز كىرىسەيىك ەندى وسىعان. نولدىك تەحنولوگيانى وتە بەلسەندى قولعا الىپ جاتقان شارۋا قوجالىقتارى بار. بۇل جەردە باتىلدىق كەرەك. بىزدە ءبىر جاقسى جەرى 5 مىڭ گەكتارلىق القاپتار, ول ۇلكەن ەمەس. ەلىمىزدە الدى ميلليون گەكتارعا دەيىن ەگەتىن وبلىستار بار", - دەدى ومىرزاق ەستاي ۇلى.
جيىندا وبلىستىق اۋىل شارۋاشىلىعى باسقارماسىنىڭ باسشىسى نۇربەك بادىراقوۆ قازاقستانداعى ماقتانى ساتىپ الۋ باعاسىنىڭ بەكىتىلۋىن جاريالادى. وڭىردەگى 18 ماقتا وڭدەيتىن كاسىپورىن ءشيتتى ماقتانىڭ تونناسىن 130 مىڭ تەڭگەدەن قابىلداۋدى باستادى. ىرىلەنگەن اگروقۇرىلىمدار ءۇشىن ءشيتتى ماقتا باعاسى ءالى دە وسەدى دەپ كۇتىلۋدە.
