وتكەن دەمالىس كۇندەرى پوليتسەيلەر, سەس جانە اكىمدىك وكىلدەرى بازارلار مەن باسقا دا نىسانداردى ارالادى. بەلگىلى بولعانداي, كەيبىر شوب وكىلدەرى كارانتين رەجيمى كۇشەيگەنىنە قاراماستان بۇزۋشىلىق جاساۋدى جالعاستىرۋدا. مىسالى, بازارلاردىڭ ءبىرىنىڭ يەلەرى دەمالىس كۇندەرى جۇمىس ۋاقىتىن ساقتاماعانى ءۇشىن ۇلكەن ايىپپۇل تولەيدى. تاعى ءبىر ورىندا تەكسەرۋشىلەر كىرە بەرىستە سانيتايزەرلەر ورناتىلماعانىن انىقتادى. سونىمەن قاتار, جاۋاپتى ادامدار جاناسۋسىز تەرمومەتردى قولدانا المادى.
"ساۋدا ۇيلەرى دەمالىس كۇندەرى جۇمىس ىستەمەۋى كەرەك, تەك ءدارىحانالار, قوعامدىق تاماقتانۋ ورىندارى بولسا, ولار جۇمىس ىستەۋگە قۇقىلى", دەپ ءتۇسىندىردى بايقوڭىر اۋدانى بويىنشا تاۋارلار مەن قىزمەتتەردىڭ ساپاسى مەن قاۋىپسىزدىگىن باقىلاۋ باسقارماسى باسشىسىنىڭ ورىنباسارى سالتانات ىقىلاسوۆا.
مامانداردىڭ ايتۋىنشا, قازىرگى كەزدەگى نەگىزگى بۇزۋشىلىقتار – جۇمىس رەجيمىن ساقتاماۋ, قوعامدىق تاماقتانۋ ورىندارىندا كەلۋشىلەر سانىنىڭ كوپ بولۋى, ساتىپ الۋشىلار مەن ساتۋشىلار ءۇشىن ماسكانىڭ بولماۋى, الەۋمەتتىك قاشىقتىق ساقتاماۋ, نىساننىڭ كىرەبەرىسىندە انتيسەپتيكتەردىڭ بولماۋى, كەي جەرلەردە كەلۋشىلەر مەن قىزمەتكەرلەردىڭ تەرمومەترياسى جۇرگىزىلمەيدى. سونداي-اق ءجيى كەزدەسەتىن بۇزۋشىلىقتار قاتارىنا بۇقارالىق وتباسىلىق ءىس-شارالاردى, كەزدەسۋلەردى, جيىنداردى وتكىزۋ جاتادى.
"9 قازانداعى جاعداي بويىنشا بارلىعى 1240 راپورت كەلىپ ءتۇستى. ونىڭ 627-ءسى قارالىپ, 133 766 808 تەڭگە كولەمىندە اكىمشىلىك ايىپپۇل سالىندى. ونىڭ ىشىندە 509-ى بويىنشا 110 196 325 تەڭگە ءوندىرىلدى. ءتورت ماتەريال سوتتىڭ قاراۋىنا جىبەرىلدى", دەلىنگەن حابارلامادا.
ەستەرىڭىزگە سالا كەتەيىك, ەلوردادا كارانتين رەجيمى كۇشەيتىلگەنى جاريالانعان بولاتىن. ازاماتتار ماسكا تاعۋ ءتارتىبىن, اراقاشىقتىقتى قاتاڭ ساقتاپ, انتيسەپتيك قولدانۋى كەرەك.
قۇقىق بۇزۋشىلىق انىقتالعان جاعدايدا, جەكە تۇلعالارعا 30 اەك (83 340 تەڭگە), زاڭدى تۇلعالارعا – 230-دان 1600 اەك-كە دەيىن (4 ميلليون 445 مىڭ تەڭگەگە دەيىن) ايىپپۇل سالىنادى. كىناسىن مويىنداعان جاعدايدا, ايىپپۇل جەتى كۇن ىشىندە 50% جەڭىلدىكپەن تولەنەدى. جەتى كۇن ىشىندە تولەنبەگەن نەمەسە كىناسىن مويىنداماعان جاعدايدا, اكىمشىلىك ايىپپۇل تۋرالى قاۋلى تولىعىمەن شىعارىلىپ, 30 كۇن ىشىندە تولەنەدى.
