وتكەن اپتا سوڭىندا وڭىرلىك كوممۋنيكاتسيالار قىزمەتىندە سىرداريا اۋدانىنىڭ اكىمى تالعات دۇيسەباەۆ بريفينگ وتكىزىپ, باق وكىلدەرىنە ماسەلەنىڭ جاي-جاپسارىن ايتىپ بەردى.
اۋىلداعى تۇرعىنداردىڭ دەنى وسىدان 16 جىل بۇرىن قۇرىلعان «ا.توقماعامبەتوۆ» جشس قۇرامىندا ەكەن. سەرىكتەستىكتەگى 875 تۇرعىن 2 مىڭ گەكتارداي ەگىستىك القاپتىڭ 10% ۇلەسىنە يە, نەگىزگى 90 پايىزدىق ۇلەس جالعىز ازاماتقا تيەسىلى. ەرتە كوكتەمدە وسى قۇرىلىم يەلىگىندەگى القاپتىڭ 105 گەكتارىنا ازامات ىسقاقوۆ باسشىلىق ەتەتىن «ازامات» شارۋا قوجالىعى كۇرىش ەگەدى. بۇعان جەر ۇلەسىنە يە اۋىل تۇرعىندارى قارسى شىعىپتى. كەيىننەن ازامات ىسقاقوۆقا سول كەزدەگى سەرىكتەستىك توراعاسى مەڭدىعالي ەسجانوۆتىڭ قۇرىلتايشىلارعا ەسكەرتپەي, ولاردىڭ كەلىسىمىن الماستان رۇقسات بەرگەنى بەلگىلى بولادى. قۇرىلتايشىنىڭ وكىلى ماديار الدوڭعاروۆ بۇل شەشىمدى زاڭسىز دەپ تاۋىپ, ماۋسىم ايىندا م.ەسجانوۆتى قىزمەتىنەن بوساتىپ جىبەرەدى. ەكى شارۋاشىلىق اراسىندا بۇل تۋرالى جاسالعان كەلىسىمدە ءبىر تاراپتىڭ ءمورى قويىلماۋى دا ءىستىڭ داۋ-دامايسىز شەشىلۋىنە اجەپتاۋىر كەدەرگى كەلتىرسە كەرەك. وسىدان دا قازىر «ازامات» شارۋا قوجالىعى 105 گەكتار القاپتاعى ەگىندى جيناپ الا الماي وتىر. دالىرەگى, القاپتىڭ 70 گەكتارى ورىلعان, بىراق جينالماي جاتىر. ال اتىزدا قالعان كۇرىشتىڭ ونىمدىلىگى كۇن سايىن تومەندەي بەرەتىنى بەلگىلى. 35 گەكتارداي القاپقا ءالى كومباين تۇسپەي تۇر.
– جالپى, بۇل – ەكى كاسىپكەر اراسىنداعى داۋ. بىراق ماسەلە ۋشىعىپ بارا جاتقان سوڭ جۋىردا القاپتىڭ باسىنا باردىق. پروبلەما شەشىلمەيىنشە ەگىستىككە ەكى جاقتان دا كومباين كىرمەسىن دەدىك. ەكى تاراپقا دا قاتىسى جوق شارۋاشىلىقتاردىڭ تەحنيكاسىمەن كۇرىشتى جيناپ الىپ, باسقا قامباعا ساقتاي تۇرايىق دەگەندى دە ۇسىنىس رەتىندە ايتتىق. وعان ەكى جاق تا كونبەدى. وسىدان دا ورىلعان كۇرىش ءالى جينالماي جاتىر, – دەيدى اۋدان اكىمى.
كەيىننەن اۋدان اكىمىنىڭ كابينەتىندە جيىن ءوتىپ, ۇشجاقتى كەلىسىم جاسالىپتى. بىراق ەرتەسى-اق سەرىكتەستىك پەن شارۋاشىلىق باسشىلارى كەلىسىمنەن باس تارتاتىنىن حابارلاعان.
اۋدان باسشىسى كاسىپكەرلەر اراسىنداعى بۇل داۋ تەك سوت ارقىلى شەشىلەتىنىن ايتىپ وتىر. بىراق ەشقانداي مامىلەگە كونبەي, ءوزارا كەلىسىمگە كەلمەي وتىرعان ەكى تاراپتىڭ ءالى كۇنگە سوتقا جۇگىنبەگەنى تۇسىنىكسىز. قۇرىلتايشى وكىلى ىسقاقوۆ پەن ەسجانوۆ جۇمساعان شىعىندارى كورسەتىلگەن قۇجاتتاردى ۇسىنسا, شىعىندارىن وتەپ بەرۋگە دە دايىن ەكەن. بىراق ولار ازىرگە مۇنداي قۇجاتتار ۇسىنباعان.
اۋدان اكىمىنە جۋىردا اۋىل تۇرعىندارىنان وكىلدەر كەلىپ, 3 ماسەلەنى شەشىپ بەرۋىن سۇراپتى. ونىڭ ەكەۋى وسى ماسەلەگە قاتىستى. سونداي-اق ولار كەلەشەكتە «ا.توقماعامبەتوۆ» جشس-مەن جۇمىس ىستەۋدەن باس تارتاتىندارىن دا جەتكىزىپتى. اۋىلداعىلار باسقا ۇلكەن سەرىكتەستىكتەردىڭ ەلدىڭ الەۋمەتتىك ماسەلەسىن شەشۋگە ۇلەس قوسىپ كەلە جاتقانىن ايتىپ, «ا.توقماعامبەتوۆ» سەرىكتەستىگىنىڭ 16 جىلدان بەرى مۇنداي ىسكە ىنتا تانىتپاي وتىرعانىنا نارازىلىقتارىن بىلدىرگەن.
اۋدان باسشىسىنىڭ ايتۋىنشا, بۇل ماسەلە ەگىن جيناۋ ناۋقانى تولىقتاي اياقتالعاننان كەيىن جالپى جينالىستا تالقىلانادى.
قىزىلوردا وبلىسى
