مۇعالىمدەردىڭ وزدەرىن بەينەروليك ارقىلى تانىستىرۋ دوداسى ەكى ايعا سوزىلىپ, ينستاگرام جەلىسىندە مىڭداعان جانكۇيەردىڭ قولداۋىنا يە بولدى. Edu Stream كومپانياسىنىڭ دەمەۋشىلىگىمەن وتكەن جەڭىمپازداردى ماراپاتتاۋ ءراسىمى EduStream KZ-ءتىڭ Youtube ارناسىندا ونلاين فورماتتا ءوتتى.
ەلىمىزدىڭ تۇكپىر-تۇكپىرىنەن جۇزگە جۋىق پەداگوگ قاتىسقان بايقاۋدا اسىرەسە, ماڭعىستاۋ وبلىسى مۇعالىمدەرىنىڭ بەلسەندىلىگى كوپشىلىكتى ءتانتى ەتتى. ۇيدە – كەلىن, نوۋتبۋك باسىندا – ۇستاز, بەينەروليكتە ينستا-جۇلدىز بولعان ارداقتى ۇستازدار وزدەرىن بارلىق قىرىنان بەساسپاپ ءارى شەبەر ەكەندىكتەرىن پاش ەتتى. بايقاۋعا قاتىسۋشىلاردىڭ ونەرى ەكى ساناتتا باعالاندى: «كورەرمەن كوزايىمى» بولىپ, ينستاگرام جەلىسىندە ەڭ كوپ لايك پەن پىكىر جيناعاندار جانە «قازىلار القاسىنىڭ داۋسىمەن» ەڭ جوعارى باللعا يە بولعاندار.
Edu Stream وقۋ ورتالىعى مەن بريتاندىق Express Publishing باسپاسى ۇيىمداستىرعان بايگەنىڭ ماقساتى وتاندىق ۇستازداردى بيىلعى پاندەميا كەزىندە جان-جاقتى قولداۋ. جانە بايقاۋ ناتيجەسىنىڭ ولاردىڭ كاسىبي ءتول مەرەكەسىمەن تۇسپا-تۇس كەلۋىنىڭ ءوزى دە كەزدەيسوق ەمەس.
– ۇستاز دەگەن ارداقتى ماماندىقتىڭ قانشالىقتى ماڭىزدى ەكەنىنە بيىلعى جىل كوزىمىزدى ايقىن جەتكىزدى. ءبىز بۇل ارقىلى كەلەشەك ۇرپاقتىڭ ساناسىنا ءبىلىم ءدانىن سەۋىپ, جارىق كۇنگە ۇمتىلدىرعان اسىل جانداردىڭ مارتەبەسىن كوتەرۋدى, ءسال دە بولسا ولاردىڭ كاسىبي باعىتىنا لايىق پايدالى اقپارات بەرۋدى كوزدەدىك. سول سەبەپتى جەڭىمپازداردى ماراپاتتاۋ تۇسىندا تانىمال جۋرناليست ءارى بلوگەر پولينا شيمانسكايا, مەديا-ترەنەر ءارى PR مامانى سالتانات اسكەربەكقىزى جانە رەجيسسەر ءارى ۆيزۋالدىق كونتەنت شەبەرى ءمادينا ءادبىراشيتوۆا سىندى ءوز ءىسىنىڭ شەبەرلەرىن شاقىرىپ, ۇستازدارعا وزدەرىن ەكراندا ۇستاۋ, ونلاين ساباقتا بالانىڭ نازارىن وزىنە اۋدارا ءبىلۋ سياقتى وتە پايدالى كەڭەستەر مەن لايفحاكتار بەردىك. Edu Stream كومپانياسى ءبىلىم جانە عىلىم مينيسترلىگىنىڭ ۇستازدار مارتەبەسىنە اسا دەن قويىپ وتىرعانىن قۋانا قۇپتايدى, – دەيدى Edu Stream وقۋ ورتالىعىنىڭ باس ديرەكتورى ناتاليا مۇحامەدجانوۆا.
ۇستازداردىڭ كرەاتيۆىندە شەك بولعان جوق. بىرەۋى اقىندىعىن پاش ەتىپ, ءوزىن اعىلشىنشا ولەڭمەن تانىستىرسا, ەكىنشىسى شاعىن دەرەكتى فيلم, ءۇشىنشىسى ءازىل-شىنى ارالاس بەينەبايان تۇسىرگەن. بارلىق جۇمىستار جان-جاقتى ىزدەنىستى اڭعارتادى. قازىلار القاسىنىڭ مۇشەلەرى قاتىسۋشىلار بەلسەندىلىگىنەن سالا ماماندارىنىڭ قانشالىقتى ءوز كاسىپتەرىن جاقسى كورەتىنىن جانە كەز كەلگەن قيىندىقتى جەڭىپ شىعۋعا دايىن ەكەندىكتەرىن بايقاۋعا بولاتىنىن ايتتى. ولاردىڭ قۇرامىندا اتا-انالار قاۋىمداستىعىنىڭ بەدەلدى وكىلدەرى, تانىمال تەلەجۋرناليستەر, بلوگەرلەر, رەجيسسەرلار مەن ۇيىمداستىرۋشى كومپانيا وكىلدەرى بولدى.
بايقاۋ ناتيجەسىندە «كورەرمەن كوزايىمى» اتانىپ, Edu Stream وقۋ ورتالىعىنىڭ ينستاگرام پاراقشاسىندا ەڭ كوپ لايك جانە پىكىر جيناعان جەڭىمپازدارعا سىي-قۇرمەت كورسەتىلدى. «پوزيتيۆتە – كوڭىلدى ۇستاز» اتالىمى بويىنشا گۇلايىم بىلالقىزى وزا شاپسا, «ەكران جۇلدىزى – كرەاتيۆتى پەداگوگ» نوميناتسياسىندا اباي تۇزەلباي جەڭىمپاز اتاندى. سىمبات وماروۆا «باستى نازاردا – جارقىراعان پەداگوگ», اينۇر باسپاەۆا «پەداگوگ-ترانسفورمەر – پەداگوگيكا سۇلۋى» اتالىمدارىن جەڭىپ الدى. «كورەرمەن كوزايىمى» ساناتىنداعى باس جۇلدە گاۋھار قاليەۆاعا بۇيىردى. ال «قازىلار القاسىنىڭ داۋسى» ساناتىندا گۇلنار قويشىباەۆا («پوزيتيۆتە – كوڭىلدى ۇستاز»), جانسايا بايانوۆا («ەكران جۇلدىزى – كرەاتيۆتى پەداگوگ»), گۇلبانۋ جۇنىسبەكوۆا («باستى نازاردا – جارقىراعان پەداگوگ»), سالتانات وسپانوۆا («پەداگوگ-ترانسفورمەر – پەداگوگيكا سۇلۋى») جەڭىمپاز اتاندى. «قازىلار القاسىنىڭ داۋسى» ساناتى بويىنشا باس جۇلدەگە ستەپنوگورسك قالاسىنىڭ ءتورت بىردەي ۇستازى – ەكاتەرينا اكيموۆا, وكسانا باشلىكوۆا, ليليا رۋدسكايا مەن گۋزال حاليتوۆا لايىق دەپ تابىلدى.
Edu Stream وقۋ ورتالىعى مەن بريتاندىق Express Publishing باسپاسى قاتىسۋشىلار مەن بايقاۋدى وتكىزۋگە اتسالىسقان ۇستازدار قاۋىمىنا العىسىن ءبىلدىردى. جەڭىمپازدارعا جەڭىسىن راستايتىن جەكە سەرتيفيكاتتار مەن باعالى سىيلىقتارى جەتكىزىلىپ, تابىستالدى.
