جامبىل وبلىسىنداعى "رادونەج" ورىس قاۋىمداستىعىنىڭ ۇيىمداستىرۋىمەن اقىننىڭ مەرەيتويى اتالىپ ءوتتى. تارازدىڭ تورىندە وتكەن پوەزيا كەشىنە مەكتەپ وقۋشىلارى, كوللەدج ستۋدەنتتەرى مەن مۇعالىمدەرى, ەتنيكالىق بىرلەستىكتەردىڭ وكىلدەرى مەن جالپى ولەڭسۇيەر قاۋىم قاتىستى. اقىن ەسكەرتكىشىنىڭ الدىنا جينالعان قاۋىم ولەڭ وقىپ, ونەر كورسەتتى. "رادونەج" ورىس قاۋىمداستىعىنىڭ توراعاسى, "كالينكا" ۆوكالدىق ءانسامبلىنىڭ كوركەمدىك جەتەكشىسى ۆلاديمير سوروكيننىڭ جەتەكشىلىگىمەن ەسەنيننىڭ سوزىنە جازىلعان اندەر ورىندالدى.
"ەسەنيننىڭ ولەڭدەرىندە ونىڭ وتانعا دەگەن سۇيىسپەنشىلىگى بەينەلەنگەن. ونىڭ مەيىرىمدىلىك پەن سۇيىسپەنشىلىككە تولى ولەڭدەرى ءاربىر جۇرەككە جاقىن. اقىننىڭ شىعارمالارى بۇگىندە الەمنىڭ كوپتەگەن تىلدەرىنە اۋدارىلعان. مىنە, بۇگىنگى ەسەنين وقۋلارى دا قالامىزداعى پوەزياعا قۇشتار جانداردى جيناي ءبىلدى", دەدى ۆلاديمير سوروكين.
تاراز قالاسىندا ەسەنين وقۋلارى ون جىلدان استام ۋاقىت ءداستۇرلى تۇردە ۇيىمداستىرىلىپ كەلەدى. جىل سايىن مەكتەپ وقۋشىلارى اقىن اتىنداعى ادەبي وقۋلارعا بەلسەنە قاتىسادى. بۇل جولعى پوەزيا كەشىندە ولەڭ وقىلىپ, اقىن ەسكەرتكىشىنە گۇل شوقتارى قويىلدى.
جامبىل وبلىسى
