تەست سۇراقتار مەن جاۋاپ نۇسقالارى بار ساۋالداما تۇرىندە ۇسىنىلعان. تەستىڭ جۇمىس ىستەۋ قاعيداسى نەيروندىق جەلىگە – جاساندى ينتەللەكت تەحنولوگياسىنا نەگىزدەلگەن. نەيروجەلى COVID-19 ۆيرۋسىن جۇقتىرۋ ىقتيمالدىعىن ونداعى COVID-19 نەگىزگى بەلگىلەرى, تاۋەكەل توپتارى جانە دەنساۋلىق ساقتاۋ مينيسترلىگىنىڭ رەسمي حاتتامالارى تۋرالى باعدارلامالانعان اقپاراتتى ەسكەرە وتىرىپ انىقتايدى. ازىرلەۋشىلەر تەست ناتيجەلەرى ناقتى دياگنوزدى بەرمەيتىنىن جانە مەديتسينالىق قورىتىندى ەمەس ەكەنىن ەسكەرتەدى. الايدا وسى ارقىلى قازاقستاندىقتاردىڭ COVID-19 ۆيرۋسىن جۇقتىرۋ ىقتيمالدىعىنا قاتىستى ءوز دەنساۋلىعىنىڭ جاي-كۇيىن ءوز بەتىنشە تالداۋعا مۇمكىندىگى بار.
ءۇش اي بويى كوماندا ساۋالداما سايتىنىڭ ينتەرفەيسى مەن فۋنكتسيونالدىعى بويىنشا مۇقيات جۇمىس ىستەدى. جوبا مەنتورى – كاسىپكەر, مەديتسينا اكادەمياسىنىڭ تۇلەگى جانە DBA EU Business School (شۆەيتساريا) ىسكەرلىك اكىمشىلەندىرۋ دوكتورى سەيىتجان سىپابەكوۆ. كوماندانىڭ باسقا ەكى قاتىسۋشىسى – Nazarbayev University ينجەنەريا جانە تسيفرلى عىلىمدار مەكتەبى باكالاۆريات باعدارلامالارىنىڭ تۇلەكتەرى يۋسۋپ تۋمگوەۆ پەن امانجول شۋنگەەۆ. قازىر ەكەۋى دە نۋ ماگيستراتۋراسىندا, يۋسۋپ Data Science سالاسىندا, ال امانجول مەديتسينا مەكتەبىندە Sport Medicine and Rehabilitation سالاسىندا وقۋىن جالعاستىرۋدا.
ء«بىزدىڭ كوماندادا سەيىتجان كاسىبي مەديتسينالىق قولداۋدى قامتاماسىز ەتەدى. ءبىزدىڭ مىندەتىمىز – تەستى ازىرلەۋ, ونىڭ مەديتسينالىق قۇرامداس بولىگى ءۇشىن امانجول جاۋاپتى, ال مەن تەحنيكالىق اسپەكتىلەرگە جاۋاپ بەرەمىن», دەيدى يۋ.تۋمگوەۆ.
تەگىن جانە قاراپايىم تەست تاپسىرۋ ءۇشىن https://covistop.asia/covid-test / سايتىنا ءوتۋ جانە جاۋاپتارعا 5 مينۋت جۇمساۋ جەتكىلىكتى. تەست ناتيجەلەرىنە بايلانىستى رەسپوندەنت ودان ءارى ۇسىنىمدار الادى. قازىر تەست اقپاراتتىق سيپاتتا جۇمىس ىستەيدى, بولاشاقتا ازىرلەۋشىلەر مەديتسينالىق مەكەمەلەر مەن COVID-19 جونىندەگى جەدەل جەلىلەردىڭ بايلانىس دەرەكتەرىن, سونداي-اق ۆيرۋس جۇقتىرۋ ىقتيمالدىعى جوعارى ارەكەتتەر الگوريتمىن قوسۋدى جوسپارلاپ وتىر.
«تەست نۇر-سۇلتان قالاسىنىڭ ۇلتتىق عىلىمي كارديوحيرۋرگيالىق ورتالىعى ماماندارىنىڭ مودەراتسيالاۋىنان ءوتتى. تەست ناتيجەلەرى كەز كەلگەن اقپاراتتىق جۇيەگە, ونىڭ ىشىندە ەلىمىزدەگى دەنساۋلىق ساقتاۋ جۇيەسىنە ينتەگراتسيالانۋى مۇمكىن. دەرەكتەر كوبىنەسە دەربەستەندىرىلگەن سيپاتقا يە. ءبىزدى قولداعانداردىڭ بارلىعىنا جانە COVID-19-دى جۇقتىرۋدىڭ ەڭ اسقىنعان جاعدايلارى بار پاتسيەنتتەردى ەمدەۋمەن اينالىسقان ماماندارعا العىس ايتامىز», دەيدى يۋ.تۋمگوەۆ.
تەست الەۋمەتتىك كوممەرتسيالىق ەمەس جوبا ەكەنىن اتاپ وتكەن ءجون. تەستىدەن ءوتۋ جانە ناتيجەلەردى الۋ تەگىن. بولاشاقتا ازىرلەۋشىلەر تەست ناتيجەلەرىنىڭ دالدىگىن ارتتىرۋدى جوسپارلاپ وتىر جانە جاساندى نەيروندىق جەلىنى پايدالانۋدان باسقا, ماشينالىق وقۋدى دا قوسقىسى كەلەدى.
