ءىس-شاراعا موڭعوليا ۇكىمەتى جانىنداعى مادەنيەت جانە ونەر ىستەرى جونىندەگى اتقارۋشى اگەنتتىك باسشىسى تس.ناتساگدولگور, «ابايدىڭ قاراسوزدەرى» كىتابىنىڭ موڭعول تىلىندەگى اۋدارماسىنىڭ اۆتورى, قوعام قايراتكەرى سۇلتان تاۋكەي, سونداي-اق جەرگىلىكتى بۇقارالىق اقپارات قۇرالدارى جانە قازاق دياسپوراسىنىڭ تانىمال تۇلعالارى قاتىستى.
كەشتى اشىپ ءسوز سويلەگەن قازاقستان رەسپۋبليكاسىنىڭ توتەنشە جانە وكىلەتتى ەلشىسى جالعاس ادىلباەۆ اتالعان قوس تۇلعانىڭ ەڭبەگى ءھام قوعامدى دامىتۋ تۇجىرىمدامالارى جالپىادامزاتتىق قۇندىلىققا, اعارتۋشىلىق يدەيالارىنا نەگىزدەلگەنىن اتاپ ءوتتى.
«اباي قۇنانباي ۇلى مەن ءال-فارابي – كوشپەندى حالىقتىڭ, ياعني قازاق حالقى مادەنيەتىنىڭ كورىنىسى. وسى ەكى ۇلى ويشىلدىڭ اراسىندا مىڭجىلدىقتار جاتسا دا, ولاردىڭ دۇنيەتانىمى جانە شىعارمالارى ءبىر مەزگىلدە جازىلعان سياقتى» دەدى ءوز سوزىندە موڭعوليا ۇكىمەتى جانىنداعى مادەنيەت جانە ونەر ىستەرى جونىندەگى اگەنتتىكتىڭ باسشىسى تس.ناتساگدولگور حانىم.
كەش بارىسىندا موڭعول تىلىنە اۋدارىلعان «ابايدىڭ قاراسوزدەرى» كىتابىنىڭ تۇساۋكەسەرى ءوتتى. كىتاپتىڭ اۆتورى, ديپلومات, پروفەسسور, تاريحشى, جازۋشى جانە اۋدارماشى سۇلتان تاۋكەي ۇلى اباي مۇراسى – قازاق حالقىنىڭ عاسىرلار بويى جيناقتالعان جانە بارلىق دانالىقتى بويىنا سىڭىرگەن رۋحاني بايلىق ەكەنىن باسا ايتىپ, اقىننىڭ شىعارمالارى قانشا ۋاقىت وتسە دە قۇندىلىعىن جويمايدى ءھام ءار كەز رۋحاني باعىتتى نۇسقايدى دەدى.
جيىن بارىسىندا اباي قۇنانباي ۇلىنىڭ ءومىرى مەن شىعارماشىلىعى تۋرالى موڭعوليالىق ابايتانۋشىلار ت.ەتەكباي مەن ا.جامبىلدىڭ باياندامالارى تىڭدالدى. سونىمەن قاتار باسقوسۋ كەزىندە ابايدىڭ «جەلسىز تۇندە جارىق-اي», «ايتتىم سالەم, قالامقاس» تۋىندىلارى موڭعول حالقىنىڭ ۇلتتىق اسپابى مورينحۋرمەن ورىندالىپ, قوناقتار قازاق دياسپوراسىنىڭ دارىندى جاستارىنىڭ ورىنداۋىندا كوپشىلىك ءسۇيىپ تىڭدايتىن «كوزىمنىڭ قاراسى» جانە «سەگىز اياق» اندەرى, سونداي-اق اقىننىڭ مانەرلەپ وقىلعان ولەڭدەرى مەن قاراسوزدەرىن تاماشالادى.
كورەرمەندەر ءۇشىن ۇلىلارعا ارنالعان فوتوكورمەلەر مەن كىتاپ كورمەلەرى ۇيىمداستىرىلىپ, جيىنعا قاتىسۋشىلار اباي مەن ءال-ءفارابيدىڭ ءومىرى مەن شىعارماشىلىعى تۋرالى دەرەكتى ءفيلمدى تاماشالادى.
