كەشە ەلوردا ۋاقىتى بويىنشا ساعات 14.00-دە پارتيانىڭ ءار وڭىردە وتكىزەتىن ىشكى سايلاۋى اياقتالىپ, ۇمىتكەرلەرگە داۋىس بەرۋ توقتاتىلدى.
بۇل ىرىكتەۋ ەڭ الدىمەن ءماجىلىس پەن بارلىق دەڭگەيدەگى ءماسليحاتتار سايلاۋىنا پارتيالىق تىزىمدەرگە ەنگىزۋ ءۇشىن قوعامنىڭ سەنىمى مەن قولداۋىنا يە بولعان بەدەلدى كوشباسشىلاردى انىقتاۋ ماقساتىندا ۇيىمداستىرىلعان بولاتىن.
ەلباسى پرايمەريزدىڭ باستالۋىنا بايلانىستى ۇندەۋىندە «بارلىق پارتيالاستاردى, Nur Otan جاقتاستارىن ەلىمىز ءۇشىن وسىناۋ ماڭىزدى ساياسي وقيعاعا بارىنشا بەلسەندى قاتىسۋعا شاقىرامىن», دەگەن ەدى. پارتيا توراعاسى وزگەلەردى شاقىرىپ قانا قويماي, ۇلگى كورسەتىپ, ءوزى دە ونلاين داۋىس بەرگەنىن ايتا كەتۋ قاجەت. داۋىس بەرۋ كەزىندە ەلباسى ىشكى پارتيالىق ىرىكتەۋگە قاتىسۋشىلاردىڭ ۇگىت-ناسيحات جۇمىستارىن جانە قوعامدىق پىكىرتالاستاردى مۇقيات باقىلاعانىن دا اتاپ ءوتتى.
وسىنداي ۇلگىلى ءىستى پارتيا توراعاسىنىڭ ءبىرىنشى ورىنباسارى باۋىرجان بايبەك تە جاسادى. ول سايلاۋ ۋچاسكەسىنە بارىپ, ءوزى دە داۋىس بەردى. سونىمەن قاتار داۋىس بەرۋ پروتسەسىنىڭ ۇيىمداستىرىلۋ دەڭگەيىمەن تانىستى. بۇل تۋرالى ول الەۋمەتتىك جەلىدەگى جەكە پاراقشاسىندا «پارتيا ليدەرى ن.نازارباەۆتىڭ تاپسىرماسىمەن Nur Otan-نىڭ پارتياىشىلىك سايلاۋى ەلىمىزدىڭ پارتيالىق-ساياسي دامۋ تاريحىندا تۇڭعىش رەت رەسپۋبليكالىق اۋقىمدا وتۋدە. بۇل – ەلباسى باستاماسىمەن قولعا الىنعان پارتيانى «قايتا جانداندىرۋدى» تۇيىندەيتىن كەزەڭنىڭ ءبىرى. بۇگىنگى تاڭدا ادامدار قوعام ومىرىنە بەلسەندى اتسالىسقىسى كەلەدى. وزگەرىستەرگە, جاڭا تۇلعالار مەن تىڭ يدەيالارعا دەگەن سۇرانىس ارتا تۇسۋدە. ەلىمىزدىڭ جەتەكشى ساياسي كۇشى رەتىندە Nur Otan پارتياسى ەل سۇرانىسىن دەر كەزىندە قاناعاتتاندىرىپ وتىر. باستاپقىدا تۋىنداعان كۇمانعا قاراماستان, بۇگىندە پرايمەريزدىڭ ءوز دەڭگەيىندە ءوتىپ جاتقانىن نىق سەنىممەن ايتۋعا تولىق نەگىز بار. جاريا تۇردەگى پارتياىشىلىك ىرىكتەۋ ەلىمىز ءۇشىن سونى ساياسي جاڭالىق رەتىندە جۇرت قىزىعۋشىلىعىن تۋعىزىپ, 10 مىڭنان استام قاتىسۋشى 60 مىڭنان استام كەزدەسۋ مەن پىكىرسايىس وتكىزدى. ءىس-شارالار بارىسىندا 1,4 ملن ادام قامتىلدى», دەپ جازدى.
ونىڭ ايتۋىنشا, ەل پرەزيدەنتى ق.توقاەۆتىڭ «حالىق ۇنىنە قۇلاق اساتىن مەملەكەت» تۇجىرىمداماسى اياسىندا ءاربىر ءوڭىر, قالا مەن اۋدان بويىنشا جاريالانعان 216 سايلاۋالدى باعدارلامانىڭ جوباسىنا قاتىستى 20 مىڭ ۇسىنىس جينالىپتى. تۇرعىنداردى تولعاندىراتىن تاقىرىپتاردىڭ العاشقى بەستىگىنە – تۇرعىن ءۇيدىڭ قولجەتىمدىلىگى, جولداردى جوندەۋ, الەۋمەتتىك قولداۋ, دەنساۋلىق ساقتاۋ مەن ءبىلىم سالالارىنىڭ دەڭگەيىن ارتتىرۋ ماسەلەلەرى كىرىپ وتىر. ەلباسى تاپسىرعانداي, بارلىق كوتەرىلگەن ماسەلەلەردى پارتيا ەرەكشە باقىلاۋعا الادى.
ال پارتيانىڭ حاتشىسى الىبەك الدەنەي Facebook-تەگى جەكە پاراقشاسىندا «3 قازاندا 08:00-دەن 14:00-گە دەيىن ينتەرنەتكە قوسىلۋ مۇمكىندىگى جوق 643 ەلدى مەكەندە قاعاز بيۋللەتەندەر بويىنشا داۋىس بەرۋ ءوتتى. بۇل ەلدى مەكەندەر رەسپۋبليكالىق دەڭگەيدەگى قالالاردى قوسپاعاندا ەلىمىزدىڭ بارلىق وڭىرلەرىندەگى شالعاي اۋدانداردا ورنالاسقان. بۇل Nur Otan پارتياسىنىڭ بارلىق مۇشەلەرىنىڭ سايلاۋ قۇقىعىن ىسكە اسىرۋ ءۇشىن جاسالدى» دەگەن جازبا قالدىرىپتى. ياعني, شالعاي ەلدى مەكەن تۇرعىندارىنىڭ تىلەك-نيەتى دە ەسكەرۋسىز قالعان جوق.
كانديداتتارعا Nur Otan پارتياسى ۇيىمىنىڭ اتىنان نەمەسە ءوزىن ءوزى ۇسىنۋ جولىمەن دە قاتىسۋىنا مۇمكىندىك بەرىلدى. وسىلايشا پارتيانىڭ قۇندىلىقتارىن ۇستاناتىن جانە سايلاۋ قۇقىعى بار كەز كەلگەن ازامات پرايمەريزگە ۇمىتكەر بولا الدى. ول ءۇشىن كانديدات پرايمەريزگە قاتىسۋشىلاردى تىركەۋ مەرزىمى اياقتالعانعا دەيىن باستاۋىش پارتيانىڭ قاتارىنا قوسىلۋى كەرەك ەدى.
ايتا كەتەيىك, ەلىمىزدە كانديداتتاردى ۇسىنۋ مەن تىركەۋ جۇمىستارى 17 تامىزدا باستالىپ, 28 تامىزعا (قوسا ەسەپتەگەندە) دەيىن جالعاسقان بولاتىن. ۇمىتكەرلەرگە ۇگىت-ناسيحات جۇمىستارىنا دايىندالۋ ءۇشىن 31 تامىزدان 6 قىركۇيەككە دەيىن 7 كۇن ۋاقىت بەرىلدى. كەيىن, 7 قىركۇيەكتەن 3 قازانعا دەيىنگى ارالىقتا ۇمىتكەرلەردىڭ ۇگىت-ناسيحات جۇمىستارى, سونىڭ ىشىندە 14-30 قىركۇيەك ارالىعىندا جاريا پىكىرسايىستار ۇيىمداستىرىلدى. بۇل پىكىرسايىستار «پرايمەريز» ارنايى اقپاراتتىق جۇيەسى ارقىلى ءوتىپ, پارتيانىڭ رەسمي اككاۋنتتارىندا جاريالانىپ تۇردى.
تاعى ءبىر ايتا كەتەرلىگى, پارتيا توراعاسىنىڭ تاپسىرماسى بويىنشا ۇمىتكەرلەرگە ونلاين-فورماتتا داۋىس بەرۋ ءۇشىن ارنايى پلاتفورما دا ازىرلەنگەن بولاتىن. وسىلايشا «پرايمەريز» جۇيەسى تۇرعىندارمەن كەرى بايلانىستى بارىنشا كۇشەيتۋدى, جالپى جۇرتشىلىقتىڭ پىكىرلەرىن ەسكەرە وتىرىپ, ءتۇرلى باستامالار مەن زاڭ جوبالارىن ونلاين-تالقىلاۋ مۇمكىندىگىن كوزدەگەن ەدى.
ءسويتىپ تامىزدىڭ بەل ورتاسىندا باستالعان ىرىكتەۋ 1-4 قازان ارالىعىندا ءموبيلدى قوسىمشا جانە ارنايى ۆەب-پورتال ارقىلى ەلەكتروندى داۋىس بەرۋمەن تۇيىندەلدى. داۋىس بەرۋدىڭ سوڭعى كۇنى پارتيا ۇيىمدارىنىڭ بازاسىندا سايلاۋ ۋچاسكەلەرى اشىلدى. ينتەرنەت جەلىسى جوق ەلدى مەكەن تۇرعىندارى سايلاۋ ۋچاسكەلەرىنە كەلىپ, قاعاز بيۋللەتەندەر ارقىلى داۋىس بەردى.
بۇعان دەيىن Nur Otan پارتياسى پرايمەريز وتكىزۋ, سونداي-اق كانديداتتارعا ۇيىمداستىرۋشىلىق جانە قۇقىقتىق قولداۋ كورسەتۋ ماسەلەلەرى بويىنشا 8 (800) 080 4441 ارنايى جەلىنى ىسكە قوسقان بولاتىن. سونىمەن قاتار ارنايى primaries.kz ۆەب پورتالى دا قاتىسۋشىلار مەن داۋىس بەرۋشىلەردىڭ كادەسىنە جارادى. وسىلايشا https://vote.primaries.kz ۆەب-سايتى جانە ءموبيلدى قوسىمشا ارقىلى ونلاين داۋىس بەرۋ مەرزىمى تۋرا ءبىر تاۋلىككە, ياعني 4 قازان كۇنگى ساعات 14:00-گە دەيىن ۇزارتىلعان بولاتىن.
كانديداتتارعا داۋىس بەرۋ توقتاتىلعانىمەن, ونىڭ قورىتىندىسى ازىرگە قولىمىزعا تيگەن جوق. پارتيا وكىلدەرى بۇگىندە بارلىق داۋىستى ساراپقا سالىپ, كىمنىڭ باعى جانعانىن انىقتاپ جاتىر.
