جاعالاۋدا جەرگىلىكتى تۇرعىندار تۇسىرگەن بەينەجازبادان ولگەن بالىق, شايان, سەگىزاياق, يتبالىقتاردى كورۋگە بولادى.
Greenpeace Russia-نىڭ مالىمەتىنشە, وسى جايت كامچاتكاداعى كاسىبي سەرفينگشىلەر جينالاتىن تۋريستىك ورتالىق حالاكتىرسكي جاعاجايىندا بولعان. حالاكتىرسكي جاعاجايىنداعى سۋدىڭ ءتۇسى وزگەرىپ, ادام دەنساۋلىعىنا قاۋىپ ءتوندىرىپ جاتقانىن ايتادى. سوڭعى بىرنەشە اپتادا سۋعا تۇسكەن ادامداردىڭ تاماعى ءىسىپ, كەيبىرەۋىندە ۋلانۋ دەرەكتەرى كەلتىرىلگەن.
سۋ سىنامالارىن تەكسەرگەن ماماندار مۇناي ونىمدەرى ءتورت ەسەدەن, ال فەنول 2,5 ەسەدەن ارتىق ەكەنىن انىقتادى. بىراق لاستانۋ كولەمى ءالى انىقتالعان جوق.
