ءىس-شاراعا موڭعوليا ۇكىمەتى جانىنداعى مادەنيەت جانە ونەر ىستەرى جونىندەگى اتقارۋشى اگەنتتىك باسشىسى تس.ناتساگدولگور, "ابايدىڭ قارا سوزدەرى" كىتابىنىڭ موڭعول تىلىندەگى اۋدارماسىنىڭ اۆتورى قوعام قايراتكەرى سۇلتان تاۋكەي, مادەنيەت, سىرتقى ىستەر, ءبىلىم جانە عىلىم مينيسترلىك وكىلدەرى مەن جەرگىلىكتى بۇقارالىق اقپارات قۇرالدارى, سونداي-اق قازاق دياسپوراسىنىڭ تانىمال قايراتكەرلەرى قاتىستى.
كەشتى اشىپ ءسوز سويلەگەن قازاقستان رەسپۋبليكاسىنىڭ توتەنشە جانە وكىلەتتى ەلشىسى جالعاس ادىلباەۆ بۇل ەكى تۇلعانىڭ ەڭ ۇلكەن جەتىستىكتەرى, ولاردىڭ ەڭبەكتەرىنىڭ قوعامدى دامىتۋ تۇجىرىمدامالارى جالپى ادامزاتتىق قۇندىلىققا, اعارتۋشىلىق پەن ادامگەرشىلىك يدەيالارىنا نەگىزدەلگەنىن اتاپ ءوتتى.
سونىمەن قاتار, مەملەكەت باسشىسى قاسىم-جومارت توقاەۆ "اباي جانە XXI عاسىر" اتتى ماقالاسىندا ۇلى اقىن مەن فيلوسوفتىڭ ءبىزدىڭ حالقىمىزدىڭ ودان ءارى رۋحاني دامۋى ءۇشىن قاجەتتى مۇرالارىنا ەرەكشە نازار اۋدارۋىمىز كەرەك دەپ جازدى.
ء"ارتۇرلى داۋىرلەردە ءومىر سۇرگەندەرىنە قاراماستان, ولاردىڭ كوزقاراستارى مەن پىكىرلەرى ءبىر-بىرىنە ۇقساس. ولار – ۇلى دالانىڭ ۇلى تۇلعالارى", دەپ اتاپ ءوتتى قازاقستاندىق ديپلومات.
"اباي قۇنانباي ۇلى مەن ءال-فارابي – كوشپەندى حالىقتىڭ, ياعني قازاق حالقى مادەنيەتىنىڭ كورىنىسى. وسى ەكى ۇلى ويشىلدىڭ اراسىندا مىڭجىلدىقتار جاتسا دا, ولاردىڭ دۇنيەتانىمى ءبىر جانە شىعارمالارى ءبىر مەزگىلدە جازىلعان سياقتى", دەدى ءوز سوزىندە موڭعوليا ۇكىمەتى جانىنداعى مادەنيەت جانە ونەر ىستەرى جونىندەگى اگەنتتىكتىڭ باسشىسى تس.ناتساگدولگور.
كەش بارىسىندا موڭعول تىلىندەگى "ابايدىڭ قارا سوزدەرى" كىتابىنىڭ تۇساۋكەسەرى ءوتتى. كىتاپتىڭ اۆتورى, ديپلومات, پروفەسسور, تاريحشى, جازۋشى جانە اۋدارماشى سۇلتان تاۋكەي ۇلى اباي مۇراسى – قازاق حالقىنىڭ عاسىرلار بويى جيناقتالعان جانە بارلىق دانالىقتى بويىنا سىڭىرگەن رۋحاني بايلىق ەكەنىن باسا ايتتى. ونىڭ شىعارمالارى ولمەيدى, ۋاقىت وتە كەلە ولار وزەكتى بولىپ, الەۋمەتتىك, مادەني جانە رۋحاني ومىرگە ارنالعان نۇسقاۋلاردى انىقتايدى.
اباي قۇنانباي ۇلىنىڭ ءومىرى مەن شىعارماشىلىعى تۋرالى موڭعولياداعى قازاق دياسپوراسىنىڭ بەلگىلى ابايتانۋشىلارى ت.ەتەكباي مەن ا.جامبىلدىڭ باياندامالارى تىڭدالدى. سونىمەن قاتار, كەش بارىسىندا ابايدىڭ "جەلسىز تۇندە جارىق-اي" جانە "ايتتىم سالەم قالامقاس" تۋىندىلارى موڭعول حالقىنىڭ ۇلتتىق اسپابى مورينحۋرمەن ورىندالدى. بۇدان باسقا, كەشكە كەلگەن قوناقتار قازاق دياسپوراسىنىڭ دارىندى جاستارىنىڭ ورىنداۋىندا كوپشىلىك ءسۇيىپ تىڭدايتىن "كوزىمنىڭ قاراسى" جانە "سەگىز اياق" مۋزىكالىق شىعارمالارىن, سونداي-اق مانەرلەپ وقىلعان ابايدىڭ ولەڭدەرى مەن قارا سوزدەرىن تاماشالادى. كەش بارىسىندا اباي مەن ءال-فارابيگە ارنالعان فوتوكورمەلەر مەن كىتاپ كورمەلەرى ۇيىمداستىرىلدى. كەش سوڭىندا قوناقتارعا ۇلى ويشىلدار اباي مەن ءال-ءفارابيدىڭ ءومىرى مەن شىعارماشىلىعى تۋرالى دەرەكتى فيلمدەر كورسەتىلدى.
قۋات ۋاتقان, جۋرناليست
ۇلان-باتىر قالاسى
