باس مەردىگەر – «دورستروي» جاۋاپكەرشىلىگى شەكتەۋلى سەرىكتەستىگى قازىر تەرمينالداردا ارلەۋ جۇمىستارىن جۇرگىزىپ جاتىر. بۇگىنگە دەيىن ينجەنەرلىك جۇيەلەر تولىقتاي تارتىلعان. جاياۋ جەتۋ گالەرەيالارىن سالۋ شارالارى دا اياقتالۋعا تاياۋ. بۇدان بولەك, اباتتاندىرۋ جۇمىستارى قارقىن العان. جاڭا ينسپەكتسيالىق-تەكسەرۋ كەشەنىنىڭ قۇرىلىسى دا ءتامامدالىپتى. قازىردە پايدالانۋعا بەرۋ جۇمىستارى جۇرگىزىلۋدە.
ايتا كەتەيىك, وتكىزۋ بەكەتىن رەكونسترۋكتسيالاۋدان كەيىن جولدىڭ قوزعالىس بولىگى 137 مەترگە دەيىن كەڭەيىپ, 8 جولاقتى بولماق. جوبا اياسىندا وتكىزۋ تەرمينالدارىن, ءبوپ, شەكارالىق قىزمەت نىسانىن جانە وتكىزۋ بەكەتىنە قاراستى وزگە دە نىسانداردى قايتا جاڭارتۋ كوزدەلگەن.
نىساندا 172 بىلىكتى مامان مەن ارنايى تەحنيكانىڭ 16 بىرلىگى جۇمىلدىرىلعان. تەحنيكالىق باقىلاۋدى «الماتى ساپا ينجينيرينگ» جشس جۇرگىزۋدە.
رەكونسترۋكتسيالاۋ جۇمىستارى باستالعالى وتكىزۋ بەكەتى تەك جاياۋ جۇرگىنشىلەر ءۇشىن جۇمىس ىستەپ كەلەدى. ادامداردى وتكىزۋ تاڭعى 06:00-24:00 ارالىعىندا جۇزەگە اسۋدا. اۆتوكولىكتەر بولسا, شەكارادان تەك جاقىن جاتقان وتكىزۋ پۋنكتتەرى ارقىلى وتە الادى.
جۇمىستار بيىلعى جەلتوقساندا اياقتالماق. جاڭارتۋدىڭ ارقاسىندا «قوردايدىڭ» وتكىزۋ مۇمكىندىگى ۇلعايادى دەپ كۇتىلۋدە. پۋنكتتەن تاۋلىگىنە 2500 اۆتوكولىك جانە 23 مىڭ ادام وتەدى دەپ بولجانىپ وتىر.
