تامىز ايىنىڭ باسىندا اۋدان ورتالىعىندا تۇراتىن تاعى ءبىر كوپبالالى وتباسىن قامقورلىقتارىنا الدى. ەسكى ءۇيدىڭ ورنىنا جاڭا باسپانا سوعۋعا قارەكەت جاساعان جاندارعا قولداۋ تانىتىپ, ەسىك پەن ەدەنىن, شيفەرىن جەتكىزىپ بەردى. جاس كاسىپكەر باقىتجان داندىباەۆ بورەنە ءتۇسىرىپ بەرسە, اتىن اتاماۋدى سۇراعان تاعى ءبىر جومارت جان شاتىرعا قاجەتتى اعاشتارىن جەتكىزىپتى.
وسى جازدا اياقاستى كوتەرىلگەن داۋىل كەنتتەگى ساياجاي شاعىن اۋدانىنداعى ا.كوشەرباەۆانىڭ ءۇيىنىڭ شاتىرىن ۇشىرىپ كەتكەن بولاتىن. ناۋقاس بالاسى بار انا جاڭبىرلى كۇندەرى ءۇيدىڭ توبەسىنەن اققان سۋ ەدەنىنە جەتكەندە كوپتەن كومەك سۇراپتى. «جاڭارعان جاڭاقورعان جاستارى» بۇل ءوتىنىشتى دە اياقسىز قالدىرعان جوق. توپ بەلسەندىلەرى داۋلەت تۇراباەۆ پەن نارجان مولدابەكوۆ ەرىكتى جاستاردىڭ كومەگىمەن جىلۋ جينادى. از ۋاقىتتىڭ ىشىندە قاجەتتى ماتەريالدار الىپ, ءۇيدىڭ شاتىرىن قاعىپ بەردى.
كوپكە كومەگىن تيگىزىپ جۇرگەن كەيىنگى تولقىننىڭ يگى ىستەرى ەسكەرۋسىز قالعان ەمەس. بيىل «جومارت جۇرەك» سىيلىعىن تابىستاۋعا ارنالعان شارادا توپ مۇشەسى قوعامبەك ءمۇتان ۇلى «ەرەن ەرىكتىلىك» نوميناتسياسىمەن ماراپاتتالدى.
جاڭا وقۋ جىلى باستالار ساتتە «جاڭارعان جاڭاقورعان جاستارى» قوعامدىق قورىنىڭ ۇيىمداستىرۋىمەن «مەكتەپكە جول» قايىرىمدىلىق اكتسياسى ءوتتى. اكتسيا اياسىندا الەۋمەتتىك جاعىنان از قامتىلعان وتباسى بالالارىنا وقۋعا قاجەتتى قۇرال-جابدىقتار سالىنعان 90 سومكە تابىستالدى. ونلاين وقۋعا قاجەتتى قۇرىلعى تاپپاي قينالىپ وتىرعاندار بالالارعا 14 سمارتفون الىپ بەردى.
– كومەككە شىن مۇقتاج ادامنىڭ مەسەلىن قايتارىپ, قولىن قاققان كەزىمىز جوق,– دەيدى قور مۇشەسى, اۋداندىق ءماسليحات دەپۋتاتى ارمان ءماجيتوۆ. – بىراق مەملەكەتتەن دە, اينالاسىنان دا ۇنەمى كومەك دامەتىپ, سونى كاسىپ قىلىپ العاندار دا جوق دەي المايمىز. سوندىقتان دا ءبىز «قينالعانعا بالىق ەمەس, قارماق بەر» دەگەن ۇستانىمدامىز. وسى باعىتتا ءوزارا اقىلداسىپ, الداعى ۋاقىتتا قولىنان ءىس كەلەتىن, بىراق ماتەريالدىق مۇمكىندىگى جوق جاندارعا قاجەتتى قۇرىلعىلارىن الىپ بەرىپ, كاسىپ باستاۋىنا جول اشپاقپىز.
جاستار ءوز قاتارلارىن كاسىپكە باۋلۋ باعىتىندا دا ءتۇرلى شارالار ۇيىمداستىرىپ كەلەدى. مىسالى, جۋىردا قوعامدىق قور مەن «Qamqor» الەۋمەتتىك دۇكەنى كونديتەرلىك ونىمدەر پىسىرۋدەن تەگىن شەبەرلىك ساعاتىن وتكىزدى. كوپ ۇزاماي «جاستار رەسۋرستىق ورتالىعى» كمم-نىڭ قولداۋىمەن قور مەن الەۋمەتتىك دۇكەن وتباسىلىق سايىس ۇيىمداستىردى. وتباسى قۇندىلىقتارى مەن سالاماتتى ءومىر سالتىن ناسيحاتتاۋعا ارنالعان شارادا قاتىسۋشى كوماندالار باعالى سىيلىقتارمەن ماراپاتتالدى. باس جۇلدەگە بەرىلگەن ۆەلوسيپەد يبراگيموۆتەر وتباسىنا بۇيىردى.
جاستاردىڭ باستاماسىمەن ءاربىر جۇما كۇنى الەۋمەتتىك دۇكەندە «تەگىن نان» قايىرىمدىلىق اكتسياسى تۇراقتى وتكىزىلىپ كەلەدى.
قىزىلوردا وبلىسى
