مۇنى حالىققا قىزمەت كورسەتۋ ورتالىعىنىڭ جاڭا ءداستۇرى دەسە دە بولادى. وسىلايشا, «ازاماتتارعا ارنالعان ۇكىمەت» مەملەكەتتىك كورپوراتسياسى» قىزىلوردا وبلىسى بويىنشا فيليالىنىڭ ماماندارى قىزمەت الۋعا كەلگەن ءاربىر جانعا جىلۋلىق سىيلاپ, كوڭىلدەرىن تابۋعا تىرىسۋدا. سەبەبى قازىرگىدەي كۇدىگى مەن ءۇمىتى قاتار تۇرعان قيىن كەزەڭدە قامكوڭىلدەرگە كىشكەنە بولسا دا قۋانىش سىيلاپ, كۇدىگىن سەيىلتۋگە قىزمەت ەتۋدىڭ دە پايداسى بار.
ازاماتتاردىڭ كوپشىلىگى العاش جەكە كۋالىك پەن تولقۇجاتىن, جۇرگىزۋشى كۋالىگى مەن سابيلەرىنىڭ العاشقى قۇجاتتارىن العان كەزدەرىن ەستەن شىعارمايدى. ال ولاردىڭ وسىنداي ەرەكشە ساتتەرىنىڭ كۋاسى – حالىققا قىزمەت كورسەتۋ ورتالىقتارى. قىزمەت الۋشىلاردىڭ قۋانىشتى ساتتەرىن بىرگە ءبولىسىپ, جان جىلۋىن سىيلايتىن بۇل باستاما قازىرگى تاڭدا ەلىمىزدىڭ بارلىق وڭىرىندە وتكىزىلۋدە. ومىرىندەگى ماڭىزدى جايتتارمەن بايلانىستى قۇجاتتارىن راسىمدەۋگە كەلگەن ءار تۇرعىن حقو بولىمىنەن كوتەرىڭكى كوڭىل كۇيمەن شىعىپ, سىي-سىياپاتتارعا يە بولىپ جاتىر.
«قىزمەت الۋشىنىڭ ريزاشىلىعى ءبىز ءۇشىن قاشاندا قىمبات. بۇل باستامانى قولداۋداعى باستى ماقساتىمىز – ازاماتتارعا جىلۋ سىيلاۋ. ءبىر جاعىنان وسىنداي كورىنىستەر ماماندارىمىزعا دا كۇش-قۋات سىيلاپ, حقو ىشىندە ەرەكشە كوڭىل كۇي ورنايدى», دەيدى «ازاماتتارعا ارنالعان ۇكىمەت» مەملەكەتتىك كورپوراتسياسى» كەاق قىزىلوردا وبلىسى بويىنشا فيليالىنىڭ ديرەكتورى ايدىن قايرۋللاەۆ.
ەلىمىزدە ورىن العان توتەنشە جاعدايدان كەيىن تۇرعىنداردىڭ كوڭىلىن كوتەرۋ ماقساتىندا جاسالىپ وتىرعان بۇل باستاما كوڭىل قۋانتادى. بۇل جەردە سىيلىقتىڭ كولەمى نەمەسە باعاسى ماڭىزدى ەمەس, باستىسى – شىن كوڭىلدەن بولۋى.
