جامبىل وبلىسىنىڭ اكىمى بەردىبەك ساپارباەۆ جينالعانداردى مەرەكەمەن شىن جۇرەكتەن قۇتتىقتاپ, زور دەنساۋلىق, كوتەرىڭكى كوڭىل, ۇزاق ءومىر تىلەدى.
- سىزدەر ءتىرى شەجىرەسىزدەر جانە ءبىز ءۇشىن دانالىقتىڭ قاينار كوزىسىزدەر! قارتتار كۇنى – بۇل ارداگەرلەردى قامقورلىقپەن جانە مەيىرىمگە بولەۋدىڭ تاماشا ءساتى. ءبىز سىزدەردىڭ ءاربىرىڭىزدىڭ قاجىرلى ەڭبەكتەرىڭىز بەن جەتىستىكتەرىڭىزدى ۇلگى تۇتامىز. جاڭا ۇرپاقتىڭ بەيبىتشىلىكتە باقىتتى ءومىر ءسۇرۋى جولىندا ايانباي بارىن سالعان ارداگەرلەردىڭ ەرلىگىن ەشقاشان ۇمىتپايمىز. سىزدەردىڭ وبلىس ەكونوميكاسىن دامىتۋعا قوسقان ۇلەستەرىڭىز وراسان زور. سىزدەردىڭ كوپشىلىگىڭىز جاۋاپتى باسشىلىق قىزمەتتەردە ەڭبەك ەتىپ, جاس ماماندارعا تالىمگەر بولا بىلدىڭىزدەر, - دەدى وبلىس اكىمى.
بەردىبەك ساپارباەۆ زەينەت دەمالىسىنا شىققان ارداگەرلەردىڭ قوعامداعى بەيبىتشىلىك پەن كەلىسىمدى ساقتاۋعا ءوز ۇلەستەرىن قوسىپ جۇرگەنىن اتاپ ءوتتى. ولار وزدەرىنىڭ ومىرلىك تاجىريبەلەرىن بولىسە وتىرىپ, جاستاردى دۇرىس جولعا باعىتتاپ كەلەدى.
- تاۋەلسىزدىك جىلدارى قازاقستان ەكونوميكاسى مەن دەموكراتيالىق نەگىزى دامىپ كەلە جاتقان قۋاتتى مەملەكەتكە اينالدى. بۇل ءۇشىن ءبىز اعا بۋىن الدىندا قارىزدارمىز. مەن ۇنەمى ايتىپ كەلەمىن, جاستار وزدەرىنە ءومىر سىيلاعان, تاربيە مەن ءبىلىم بەرگەن ۇلكەندەردى ۇمىتپاۋى ءتيىس. قارت ادامدارعا قۇرمەت پەن قامقورلىق تەك وسىنداي مەرەكە كۇندەرى عانا ەمەس, ۇنەمى كورسەتىلۋى كەرەك, - دەپ اتاپ ءوتتى ايماق باسشىسى.
مەملەكەت ارداگەرلەرگە ءاردايىم قامقورلىق تانىتىپ, ولاردىڭ ەشتەڭەگە مۇقتاج بولماۋى ءۇشىن ءتيىستى جاعداي جاساپ وتىرعاندىعىن دا باسا ايتتى.
- پرەزيدەنت قاسىم-جومارت توقاەۆ قازاقستان حالقىنا جولداۋىندا كۇتىلەتىن ءومىر ءسۇرۋ ۇزاقتىعىن 75 جاسقا دەيىن جەتكىزۋ ءۇشىن دەنساۋلىق ساقتاۋ سالاسىن ودان ءارى دامىتۋ بويىنشا شارالار قابىلداۋدى تاپسىردى. بۇگىندە ءبىزدىڭ وبلىسىمىزدا 100 جاستان اسقان 20 ارداگەر جانە 90 جاستان اسقان 1085 زەينەتكەر تۇرادى, - دەپ بەردىبەك ساپارباەۆ ناقتى دەرەكتەرمەن ءبولىستى.
وبلىستىق ارداگەرلەر كەڭەسىنىڭ توراعاسى ەركىنبەك سولتىباەۆ ارداگەرلەرگە سالاۋاتتى ءومىر سالتىن ناسيحاتتاۋ جانە وسكەلەڭ ۇرپاقتى قازاقستاندىق پاتريوتيزم رۋحىندا تاربيەلەۋدەگى وراسان زور جۇمىستارى ءۇشىن العىس ايتتى.
اڭگىمە بارىسىندا باستان كەشكەن قيىندىقتار, اسكەري ەرلىكتەر, جەتىستىكتەر, رۋحاني قۇندىلىقتار تۋرالى ايتىلدى. ارداگەرلەر جىلى لەبىزدەرىن ءبىلدىرىپ, سۇيىكتى اندەرىن شىرقادى.
ارداگەرلەر وبلىس باسشىلىعىنا ءىلتيپاتى مەن ولارعا دەگەن قۇرمەتى ءۇشىن ريزاشىلىقتارىن ءبىلدىردى.
- ۇزاق جىلدار بويى ءوڭىردىڭ يگىلىگى جولىندا ەڭبەك ەتكەن قاريالارعا كوپ كوڭىل بولىنەدى. بۇگىنگى مەرەكەگە وراي كەزدەسۋ ۇيىمداستىرىپ, ەركىن اڭگىمە قۇرىپ, وتكەنىمىزدى ەسكە ءتۇسىرىپ, ءبىر سەرپىلىپ قالۋعا مۇمكىندىك بەرگەندەرىڭىز ءۇشىن راحمەت, - دەدى جۋرناليستيكا ارداگەرى, قازاقستان رەسپۋبليكاسىنىڭ ەڭبەك سىڭىرگەن قايراتكەرى باتتال جاڭاباي ۇلى.
كەزدەسۋگە قاتىسۋشىلار ءتۇرلى ماسەلەلەر بويىنشا ويلارىن ورتاعا سالدى. ولار وبلىس ورتالىعى ادام تانىماستاي وزگەرگەنىن تىلگەت تيەك ەتىپ, كونە تاراز تۋريستەرد ءۇشىن تارتىمدى ورتالىققا اينالاتىندىعىنا سەنىم ءبىلدىردى.
سونداي-اق جينالعاندار وزدەرىن تولعاندىرىپ جۇرگەن ماسەلەلەردى جەتكىزدى. وبلىس اكىمى بارلىعىن مۇقيات تىڭداپ, ولاردى شەشۋگە ۋادە بەردى.
سونداي-اق بۇل كۇنى بەردىبەك ساپارباەۆ ارداگەرلەر ۇيىنە ات باسىن بۇرىپ, ارداگەرلەر كەڭەسىنىڭ جۇمىسىمەن تانىستى.
