باتىس قازاقستان وبلىسىندا سوۆەتتىك كەزەڭنەن قالعان, يدەولوگيالىق تۇرعىدان ەسكىرگەن ەلدىمەكەن, ءبىلىم ورىندارى اتاۋلارى ءالى كوپ. وبلىستىق ءماسليحاتتىڭ كەزەكتى 38 سەسسياسىندا وسىنداي ونوماستيكالىق اتاۋلاردى رەتكە كەلتىرۋ جانە يدەولوگيالىق تۇرعىدان ەسكىرگەن اتاۋلاردى ۇلتتىق تانىمعا جاقىن اتاۋلارمەن اۋىستىرۋ ماقساتىندا ۇسىنىس جاسالدى.
باتىس قازاقستان وبلىستىق تىلدەردى دامىتۋ باسقارماسى باسشىسىنىڭ مىندەتىن اتقارۋشى سۆەتا عانيەۆانىڭ مالىمدەمەسىنە قاراعاندا, وبلىستىق دارىندى بالالارعا ارنالعان مامانداندىرىلعان مەكتەپ-گيمنازيا-ينتەرناتى ەندى اباي قۇنانباي ۇلىنىڭ ەسىمىن يەلەنبەك. سونداي-اق بايتەرەك اۋدانىندا ترەكين قازاق مەكتەبى – قادىر مىرزا ءالي اتىنداعى, پەرۆوسوۆەتسك ورتا مەكتەبى – شوقان ءۋاليحانوۆ اتىنداعى, ششاپوۆ ورتا مەكتەبى – باۋىرجان مومىش ۇلى اتىنداعى, باتۋرين ورتا مەكتەبى – تالعات بيگەلدينوۆ اتىنداعى, نوۆەنكي ورتا مەكتەبى – قاسىم قايسەنوۆ اتىنداعى, ۋليانوۆ ورتا مەكتەبى – ءىلياس ەسەنبەرلين اتىنداعى جالپى ورتا ءبىلىم بەرەتىن مەكتەپ بولىپ اتالاتىن بولادى. اتاۋى وزگەرەتىن مەكتەپتەردىڭ قاتارىندا شىڭعىرلاۋ اۋدانىنا قاراستى بەلوگور جانە پولتاۆا نەگىزگى مەكتەپتەرى دە بار. ولار وسى ءبىلىم وردالارى ورنالاسقان ەلدىمەكەندەردىڭ اتاۋىمەن اقتاۋ جانە ارداق نەگىزگى مەكتەپتەرى دەپ وزگەرتىلمەك.
"بۇل اتاۋلاردىڭ وزگەرۋى جەرگىلىكتى بيۋدجەتتەن قوسىمشا قاراجات قاجەت ەتپەيدى. ۇسىنىستى وبلىستىق ءماسليحات دەپۋتاتتارى ءبىراۋىزدان قولدادى. ەندى قازاقستان رەسپۋبليكاسى ۇكىمەتىنىڭ جانىنداعى رەسپۋبليكالىق ونوماستيكا كوميسسياسىنىڭ قاراۋىنا جولدايمىز", - دەيدى قادىربايقىزى.
