جيىندا جول, سۋ, جارىق, جىلۋ, تۇرعىن ءۇي قۇرىلىسى جانە تاسىمالداۋ سالاسى بويىنشا تۇيتكىلدى ماسەلەلەردىڭ ءتۇيىنى تارقاتىلدى. الدىمەن شاھاردىڭ جىلۋ بەرۋ ماۋسىمىنا دايىندىق جۇمىستارى پىسىقتالدى. بيىل ماۋسىم جىلداعى كەستەگە ساي 15 قازاننان باستالادى دەپ مەجەلەنگەن. بۇگىندە ورتالىقتاندىرىلعان جىلۋ جۇيەسىنە قوسىلعان نىسانداردىڭ 90 پايىزى قىسقا دايىن. قالعان اۋماق جىلۋ قابىلداۋعا 10-قازان كۇنى تولىعىمەن ءازىر بولماق. بۇل تۋرالى وبلىستىق ەنەرگەتيكا جانە تۇرعىن ءۇي-كوممۋنالدىق شارۋاشىلىق باسقارماسىنىڭ باسشىسى رۋسلان نۇرماعانبەتوۆ ءمالىم ەتتى. قازىر كۆارتالىشىلىك 7 جىلۋ جەلىسىندە سوڭعى جۇمىستار جۇرگىزىلىپ جاتىر.
بۇل رەتتە وبلىس اكىمىنىڭ ورىنباسارى كۇن رايى كۇرت وزگەرىپ, بىرنەشە كۇن قاتارىنان سىناپ باعاناسى تومەندەسە, قالانى جىلۋمەن قامتۋ ەرتەرەك باستالۋى قاجەت ەكەنىن باسا ايتىپ, دايىندىق جۇمىستارىن جەدەلدەتۋدى تاپسىردى.
وتىرىستا ورتاعا سالىنعان كەلەسى تاقىرىپ جول قۇرىلىسى. بيىل جىل كولەمىندە رەسپۋبليكالىق, وبلىستىق جانە جەرگىلىكتى بيۋدجەت ەسەبىنەن قالا اۋماعىندا 200-دەن اسا كوشە كۇردەلى, ورتاشا جوندەۋدەن وتۋدە. حالىقتان كەلگەن ارىز-شاعىمدار ەسكەرىلىپ, باسىمدىق قالاعا قاراستى كەنت جانە اۋىلدىق وكرۋگتەرگە, قالانىڭ شەت اۋماقتارىنا بەرىلگەن. قالا اكىمى نۇرلىبەك نالىباەۆ بۇل جۇمىستاردىڭ الداعى جىلى دا قارقىندى تۇردە جالعاساتىنىن ايتىپ, جىل اياعىنا دەيىن ارنايى جوبا دايىندالىپ, رەسپۋبليكاعا بيۋدجەتتىك ءوتىنىم بەرىلەتىنىن جەتكىزدى.
تۇرعىن ءۇي قۇرىلىسىنىڭ قارقىنى مەن ساۋلەتتىك كەسكىنى دە كۇن تارتىبىندە قارالدى. جالپى بيىل قالا كولەمىندە 345 529 شارشى مەتر تۇرعىن پايدالانۋعا بەرىلەدى دەپ جوسپارلانعان. قۇرىلىستىڭ نەگىزگى بولىگى سىرداريا وزەنىنىڭ سول جاعالاۋىندا.
كەلەلى جيىندا سۋ جۇيەسى مەن جارىق جەلىسىنە قاتىستى ماسەلەلەر دە تالقىعا ءتۇسىپ, ۇسىنىس-پىكىرلەر تىڭدالدى. جيىندى قورىتىندىلاي كەلە قالا اكىمى نۇرلىبەك نالىباەۆ تاپسىرمالاردىڭ حاتتاماعا سايكەس وبلىستىق باسقارمالارمەن بىرلەسە اتقارىلۋى قاتاڭ باقىلاۋدا بولاتىنىن جەتكىزدى.
