– بۇل ساپارعا شىققانداعى ماقساتىڭىز نە؟
– جالپى قازاقستان بويىنشا 230 مىڭعا جۋىق ءتۇرلى اگروقۇرىلىم بار. ونىڭ ىشىندە شارۋا قوجالىقتارىنىڭ سانى 212 مىڭعا جۋىقتايدى. ونىڭ 16 500-ءى ءارتۇرلى اگرارلىق فيرما, كووپەراتيۆتەر. ەسىگىنىڭ الدىنداعى شاعىن قورا-قوپسىسىندا ازىن-اۋلاق مالىن ۇستاپ, باۋ-باقشاسىن ءوسىرىپ وتىرعان قوسالقى شارۋاشىلىقتاردىڭ سانى كۇنى كەشە پرەزيدەنت ق.توقاەۆ ايتقانداي, 1 ملن 700 مىڭ شاماسىندا.
230 مىڭداي اگروقۇرىلىمنىڭ ءارى كەتسە 10-15 پايىزى عانا اياعىنا نىق تۇرعان, الەۋەتى مول شارۋاشىلىقتار. باسىم كوپشىلىگى ۇساق شارۋاشىلىقتار. ۇساق بولسا دا, رەسپۋبليكا بويىنشا وندىرىلەتىن ءونىمنىڭ 85 پايىزىن سولار بەرىپ وتىر. ياعني بۇكىل ەلدى ەتپەن, سۇتپەن, نانمەن, جەمىس-جيدەك, كوكونىس, باسقا دا ونىمدەرمەن اسىراپ وتىرعان سولار. مەنىڭ بۇل ساپارداعى ماقساتىم – شاعىن شارۋاشىلىقتاردى ارالاپ, جۇمىسىن كورىپ, مۇڭ-مۇقتاجىن ءبىلۋ بولدى. جەر-جەردەگى اتقارۋشى بيلىكتى ماقتاۋ نەمەسە داتتاۋ تۋرالى ويىم جوق. شارۋالاردىڭ جاي-كۇيىنە نازار اۋدارتۋ ارقىلى ولارعا دەگەن قوعامنىڭ كوزقاراسىن, جەرگىلىكتى اتقارۋشى بيلىكتىڭ فەرمەرلەر قاۋىمىنا دەگەن ۇستانىمىن جاقسى جاعىنا وزگەرتكىم كەلدى.
ورىنباسارىم ەكەۋمىز 10 كۇن ىشىندە 7 مىڭ شاقىرىمعا جۋىق جولدى اقمولا وبلىسىنان باستاپ, 6 وبلىستىڭ 23 اۋدانىنداعى 49 شارۋاشىلىققا باردىق. اقمولانىڭ اتباسار, استراحان, جاقسى, ەسىل سياقتى اۋداندارىنداعى ەگىن ورىپ, مال ازىعىن دايىنداپ جاتقان شارۋاشىلىقتاردىڭ جۇمىسىمەن تانىستىق. ولاردان نە جەتپەي جاتقانىن, قانداي پروبلەمالارى بار ەكەنىن سۇراپ بىلدىك. ءوزىم الەۋمەتتىك جەلىدە بەلسەندى بولماسام دا, كۇن سايىن فەيسبۋك ارقىلى جۇرتشىلىققا ەسەپ بەرىپ وتىرۋعا تىرىستىم. وداقتىڭ رەسمي سايتىندا دا تۇراقتى تۇردە ءتيىستى اقپارات جاريالانىپ تۇردى.
– سونىمەن 10 كۇندىك جولدا نە كورىپ, ويىڭىزعا نە ءتۇيدىڭىز؟
– سىزگە جانە وقىرمانعا تۇسىنىكتى بولۋى ءۇشىن رەت-رەتىمەن بايانداۋعا تىرىسايىن. الدىمەن اقمولانىڭ شارۋاشىلىقتارىنا باردىق دەدىم عوي. استراحانداعى «ىرىستى-استىق» سەرىكتەستىگىنىڭ باسشىلارى كادەگە جاراتۋ الىمىنىڭ كوتەرىلگەنىنە بايلانىستى كومبايننىڭ باعاسى 330 مىڭ دوللاردان 390 مىڭ دوللارعا قىمباتتاپ كەتكەنىن ايتتى. ديزەل وتىنى كوكتەمدە 165 تەڭگەدەن بولسا, كۇزگە قاراي ءليترى 172 تەڭگەگە جەتىپتى. جانار-جاعارماي وپەراتورىمەن, نەسيە بەرەتىن بانكتەرمەن جۇمىس ىستەۋدە پروبلەمالار بار ەكەنىن جەتكىزدى.
«قازاحمەتوۆ ت.س.» جشس وكىلدەرى قاراجات جەتىسپەي جاتقانىن, تەحنيكا قىمبات ەكەنىن ايتتى. شارۋاشىلىقتى ۇلكەيتۋگە باسى ارتىق جەر جوق. ۇزاق مەرزىمدى نەسيە الۋعا فەرمەرلەردىڭ مۇمكىندىكتەرى از.
جاقسى اۋدانىنداعى «اگروفيرما استانا تان», «تولەگەنوۆ» سياقتى سەرىكتەستىكتەر باياگيز اۋىلىنىڭ جانىنداعى قىزىلساي دەگەن وزەننىڭ بوگەتىن جوندەۋگە جىل سايىن 1,8 ملن تەڭگە جۇمسايدى ەكەن. ياعني وبلىستىڭ نەمەسە اۋداننىڭ ەسەبىنەن جوندەلۋگە ءتيىس بوگەتتى ءوز قاراجاتىنا جىل سايىن جوندەۋگە ءماجبۇر.
– شارۋاشىلىقتى ۇلعايتايىن دەسە جەر جوق دەدىڭىز. نەگىزى يگەرىلمەي جاتقان دا جەرلەر بار ەمەس پە؟
– ونداي دا پروبلەما بار. باسقا ەمەس, ءدال وسى شارۋالارعا جەر جەتپەي جاتقان وبلىستا دا كەزدەسەدى ونداي فاكتىلەر. مىسالى, ەسىل اۋدانىندا 90 مىڭ گەكتار ەگىستىككە ارنالعان القاپ, 35 مىڭ گەكتار جايىلىمدىق جەر پايدالانىلماي بوس جاتىر. شاعىن بيزنەستى تەكسەرۋگە موراتوري جاريالانۋىنا بايلانىستى ول جەردىڭ يەلەرىن تەكسەرۋ قيىن.
وسى اۋدانداعى دۆۋرەچنىي اۋىلىنا دەيىن 5 شاقىرىمنان استام جول وتە ناشار, تەز ارادا جوندەۋدى قاجەت ەتەدى. اۋىل مەن اۋدان ورتالىقتارىنىڭ ىشىندەگى جولداردىڭ جايى دا سول شامالاس. ەلدى مەكەندەردە قاڭىراپ بوس تۇرعان ۇيلەر, قۇلاپ قالعان نىساندار كوپ. مەن مۇنى نەگە ايتىپ وتىر دەرسىز؟ جول ينفراقۇرىلىمى اۋىل شارۋاشىلىعىن دامىتۋدا اسا ماڭىزدى ءرول اتقارادى. ەكىنشىدەن, قۇلازىعان اۋىلدا ادام تۇراقتامايدى, ياعني اگرارلىق سەكتور مامان تاپشىلىعىن كورەدى دەگەن ءسوز.
اقمولانىڭ اۋداندارىن ارالاعاننان كەيىن ودان ءارى قوستاناي وبلىسىنا استىق. بۇرىن تورعاي وبلىسىنىڭ ورتالىعى بولعان ارقالىق قالاسىنىڭ ماڭىندا شارۋا قوجالىقتارى از ەمەس. ونداعى شارۋالاردىڭ نەگىزگى جانايقايى – نەسيە العان كەزدە كەپىلگە قويعان ءۇيدىڭ دە, جەردىڭ دە تىم ارزان باعالانۋى. مىسالى, ءۇي 6 ملن تەڭگە تۇرسا, 3 ملن-عا باعالانادى. جەردىڭ بونيتەت بالى 32 بولسا – 23 دەپ كورسەتىلەدى. سۋبسيديا شارۋالارعا جەتپەيدى, «اقشا ءبىتتى» دەپ فەرمەرلەردىڭ وتىنىمدەرىن قابىلداماي قويادى. «قولداۋ» جۇيەسىن پايدالانعانى ءۇشىن 31 مىڭ تەڭگەنى ءوز قالتالارىنان تولەيدى ەكەن.
– «قولداۋ» شارۋالاردى اقپاراتتىق قولداۋ ءۇشىن 2-3 جىل بۇرىن ەنگىزىلگەن جۇيە ەمەس پە؟
– ءيا, ول مەملەكەتتىڭ اگرارشىلاردى قولداۋى ءۇشىن ارنايى جاسالعان جۇيە, وندا نەلىكتەن شارۋالاردىڭ ەسەبىنەن اقشا تابۋى كەرەك ەكەنى تۇسىنىكسىز. «استىق قولحاتتارىن تىركەۋشىنىڭ دە قىزمەتىنە 58 مىڭ تەڭگە بەرەمىز» دەيدى شارۋالار. بۇل باعا قايدان كەلگەن؟! جاڭاعى اقپاراتتىق جۇيەنىڭ يەسى «اقپاراتتىق ەسەپ ورتالىعى» اق 100 پايىز ۇكىمەتتىكى بولسا, قىزمەتى دە تەگىن بولۋى كەرەك دەپ ويلايمىن. بۇل قىزمەتتى ودان دا e-gov اتقارىپ, ونىڭ يەلىگىن اۋىل شارۋاشىلىعى مينيسترلىگىنە بەرگەن دۇرىس.
امانكەلدى, جانگەلدين اۋداندارىن ارالاپ, شارۋالارمەن كەزدەستىك. تورعاي جەرى كەرەمەت قۇنارلى, بەلۋاردان كەلەتىن قالىڭ ءشوپ جايقالىپ تۇر. اڭ-قۇس ءورىپ ءجۇر, وزەن-كولىندە بالىق كوپ. مال شارۋاشىلىعىنا دا, ەگىنگە دە, باقشا وسىرۋگە دە, قۇس, بالىق وسىرۋگە دە قولايلى جەر. بىراق جول ناشار, ءتىپتى جوق دەۋگە بولادى. ەڭ بولماسا قيىرشىق تاس تا توگىلمەگەن. وزەندەرىندە كوپىر جوق, بوگەتتەرى بۇزىلعان نەمەسە ەسكىرىپ بۇزىلۋدىڭ الدىندا تۇر. مىسالى, امانگەلدى اۋدانى شاقپاق اتا اۋىلىندا «ەدرەس اتا», «كاۋسار» دەگەن شارۋاشىلىقتار بار. «ەدرەس اتا» شارۋا قوجالىعىنىڭ باسشىسى مارات ەدرەسوۆ دەگەن ازاماتپەن نۇر-سۇلتاندا جۇزدەسىپ, ايماقتىڭ مۇڭ-مۇقتاجى تۋرالى ەستىگەنمىن. وسى جولى ءوزىم كوردىم. شاقپاق اتا اۋىلىنا دەيىن 7 شاقىرىمنان استام جەردى دالانىڭ قارا جولىمەن جۇردىك. جول دەگەن اتىمەن جوق. ياعني كولىكتەر كۇز بەن كوكتەمدە باتپاققا باتادى, قىستا قالىڭ قاردى جارىپ ءجۇرۋ مۇمكىن بولمايدى, بايلانىس ۇزىلەدى دەگەن ءسوز. اۋىلداعى وزەندە وتكەل جوق, 2 كوپىر سالۋ كەرەك. ايتپەسە بۇل جاقتىڭ حالقى كوكتەمدە سۋ تاسىعان سايىن ءبىراز ۋاقىت اۋدانعا دا, قالاعا دا قاتىناي المايدى, تاسىعان سۋدىڭ ارىنى قايتقاننان كەيىن عانا پاروم سالىپ, جاياۋ-جالپىلاپ وتەدى.
– بايلانىس قيىن بولسا, مال ءونىمىن قالاعا جەتكىزۋ دە قيىن بولار؟..
– ارينە, قيىن. جاڭا ايتىپ وتكەنىمدەي, جول ينفراقۇرىلىمىن دامىتپاسا, اگرارلىق ءونىمنىڭ كولەمىن دە, ساپاسىن دا ارتتىرا المايسىز, باعاسىن ءتۇسىرۋ دە مۇمكىن ەمەس. سونىڭ سالدارىنان ءونىمدى ماڭداي تەرىن توگىپ ءجۇرىپ وندىرگەن فەرمەرلەر دە, ونى تۇتىنۋشىلار دا زارداپ شەگەدى.
«كاۋسار» شارۋا قوجالىعى مالدى ارقالىقتاعى «KazBeef» دەگەن فيرماعا وتكىزەدى ەكەن. مالدىڭ 1 كيلو ءتىرى سالماعىنىڭ باعاسى 750 تەڭگە, وتە ارزان. شارۋاشىلىقتىڭ نەگىزگى پروبلەماسى – ءونىمىن ساتىپ الۋشى جوق, الاتىندار ارزانعا باعالايدى. مالشىلارعا ەڭ جاقىن بورداقىلاۋ الاڭى 350-400 شاقىرىم جەردە ورنالاسقان. سول سەبەپتى دەلدالدار تۇككە تۇرمايتىن ارزان باعامەن مالىن الىپ كەتەدى. ەتتى, ءسۇتتى وڭدەيتىن كاسىپورىندار جوق. شارۋالاردىڭ سوزىنە قاراعاندا, «اگرارلىق نەسيە كورپوراتسياسى» مەن قازاگروقارجى» دۇرىس جۇمىس ىستەمەيدى, ادامدارمەن دۇرىستاپ سويلەسپەيدى, نەسيەنى 3-6 اي بويى شارۋالاردى كۇتتىرىپ ءبىر-اق بەرەدى.
– قوستاناي وبلىسىنان ءارى قاي وڭىرگە جول تارتتىڭىزدار؟
– امانكەلدى, جانگەلدين اۋداندارىنان ءارى قاراي اقتوبە وبلىسىنىڭ ىرعىز اۋدانىنا دەيىن 300 شاقىرىم جولسىزبەن جۇردىك. جول سالۋعا قاجەتتى تاس, قۇم, تسەمەنت سياقتى ماتەريالدىڭ ءبارى وزىمىزدەن شىعادى, ەكى وبلىستىڭ ورتاسىنا ساپالى جول تارتۋعا بولار ەدى عوي. بۇل ءۇشىن ادامي كوزقاراس قانا كەرەك.
ىرعىزدىڭ بايشەگىر دەگەن اۋىلى اۋدان ورتالىعىنان 90 شاقىرىم جەردە ەكەن. مۇندا دا جول جوق, كادىمگى دالانىڭ قارا جولى, قيىرشىق تاس تا توسەلمەگەن. دالادا ءشوپ شاۋىپ جۇرگەن ەركىن قالاباەۆ دەگەن جىگىتتى توقتاتىپ, اڭگىمەگە تارتتىق. استىندا جەتپىسىنشى جىلدارى شىققان ەسكى تراكتور. «كۇنكورىستىڭ قامى, مال ازىعىن دايىنداپ جاتىرمىز» دەدى. 90 شاقىرىم جەردەگى اۋدان ورتالىعىنا اۋىلدان اۆتوبۋس تا قاتىنامايدى. 40 ءۇيلى اۋىلدا 9 سىنىپتىق مەكتەپ بار ەكەن, جوعارعى سىنىپتاعى بالالاردىڭ باسقا جاققا قاتىناپ وقۋى قيىن. مەكتەبى جوق اۋىلعا ادام تۇراقتامايدى, سوسىن تاعى مامان تاپشى دەيمىز.
وسى اۋدانداعى «ن-سىدىق» شارۋا قوجالىعىنىڭ وكىلدەرىمەن كەزدەستىك. مالمەن, بالىق وسىرۋمەن اينالىسادى. «كولگە سۋ از كەلەدى, شليۋز بولماعاندىقتان قىلقوجا بوگەتىنە سۋ توقتامايدى, سول جەرگە شليۋز سالۋ كەرەك» دەيدى. سۋ از بولعان سوڭ بالىق تا از.
ءتۇيىپ ايتسام, بۇل وبلىستا دا فەرمەرلەر شارۋاشىلىعىن كەڭەيتەيىن دەسە, جەر تاپشى. كەي فەرمەرلەردىڭ شارۋاشىلىق باسىنا سالعان ۇيلەرىنىڭ قۇجاتى دۇرىس بولعانىمەن, جالعىز ءۇي دەپ مەكەنجاي بەرمەيدى, مەكەنجايى جوق ۇيگە جۇمىسشىلاردى تىركەۋگە تۇرعىزا المايدى.
كەيبىر مالقورالار «باتىس ەۋروپا – باتىس-قىتاي» تاس جولىنا ءبىر-اق شاقىرىم جەردە ورنالاسقان, مالدى جولدان ءجيى وتكىزەدى, ونى كولىك قاعادى. «مال وتەتىن جەرلەرگە «ابايلاڭىز...» دەگەن سىندى بەلگىلەر قويىلسا ەكەن» دەگەن وتىنىشتەرىن ايتتى.
اگرارلىق سەكتوردى زامان تالابىنا بەيىمدەۋ كەرەك ەكەنى تۇسىنىكتى. اقتوبە قالاسىنداعى «سحف پروگورودنىي» جشس وسىمدىك شارۋاشىلىعىمەن اينالىسادى ەكەن. ءبىر عانا ءوتىنىشى بار – تامشىلاتىپ سۋارۋ جۇيەسىن سۋبسيديالاعاندا تۇتىكشەلەرگە سۋبسيديانى بولەك بەرسە, جىل سايىن بولسە دەيدى.
– 6 وبلىستىڭ 23 اۋدانىنداعى 49 شارۋاشىلىققا باردىڭىز. ءتۇيىپ ايتساق, شارۋالاردى الاڭداتىپ, جۇمىسقا قولبايلاۋ بولىپ تۇرعان باستى پروبلەمالار نە ەكەن؟
– ءيا, قانداي اۋدانعا, قانداي شارۋاشىلىققا بارعانىمنىڭ ءبارىن ءتىزىپ شىقپاي-اق قويايىن. قىزىلوردا, تۇركىستان, جامبىل وبلىستارىنا بارىپ, ساپامىز سوندا تۇيىندەلدى. فەرمەرلەردەن «وسىنشا مالىڭ, ەگىنىڭ, جەرىڭ بار ەكەن. بۇدان دا باي شارۋاشىلىق قۇرىپ, قازىرگىدەن دە جاقسى تۇرمىس ءۇشىن, مادەنيەتتى, باقۋاتتى ءومىر ءسۇرۋىڭ ءۇشىن نە كەرەك؟ شارۋاشىلىعىن اياعىنان نىق تۇرۋى ءۇشىن قانداي قولداۋ قاجەت؟» دەپ سۇرادىم. ءبارىنىڭ ايتاتىنى نەگىزگى ءۇش-ءتورت-اق ماسەلە: بىرىنشىدەن, جول ينفراقۇرىلىمىن جاقسارتۋدى سۇرايدى. ءونىمىن تاسىمالداۋعا جول كەرەك, العان كولىگىمەن ادام سياقتى جۇرۋگە دە جول كەرەك.
ەكىنشىدەن, ۇزاق مەرزىمگە ارزانداتىلعان نەسيە كەرەك. جامبىل وبلىسىندا اسقار مىرزاحمەتوۆتىڭ كەزىندە قاناتقاقتى جوبا باستالدى, 50 مىڭ ادامعا 2,5 پايىزبەن نەسيە بەرىلدى. قازىر 11 اۋىلدىق وكرۋگتەگى نەسيە العان ادامداردىڭ ءبارى جەكە شارۋاشىلىعىن دامىتىپ جاتىر. وسى جوبانى وبلىستىڭ قازىرگى اكىمى بەردىبەك ساپارباەۆ تا قولداپ, ءارى قاراي دامىتۋعا نيەتتى ەكەنىن ايتتى. مەنىڭشە, بۇل قاناتقاقتى جوبانى رەسپۋبليكاعا تاراتۋ كەرەك.
ۇشىنشىدەن, سۋبسيديالاۋ جۇيەسىن جەتىلدىرۋ كەرەك. قازىر قوسالقى شارۋاشىلىقتار سۋبسيديا المايدى. باسقا دا كەمشىلىكتەرى از ەمەس. تورتىنشىدەن, مامان تاپشى. سالاداعى پروبلەمالاردىڭ ءبارى وسى تورتەۋىنەن كەلىپ تۋىندايدى. ايتالىق تەحنيكانى جاڭارتۋ ءۇشىن قارجى كەرەك – نەسيە الۋ قيىن. 70-80 جىلدارداعى تراكتور, كومباين, تۇقىم سەپكىشتەر, شوپشاپقىشتار ءالى ءجۇر. شارۋا تەزىرەك مالىن سەمىرتىپ, تۇقىمىن سەۋىپ, ەگىنىن وسىرگىسى كەلەدى – بىراق قاجەتتى سۋبسيديا الۋ قيىن. سولاي ماسەلە كۇردەلەنە بەرەدى. نەگىزى شارۋا سۋبسيديا, كرەديت, ديزەلدىك وتىن بەر دەپ ۇكىمەتتىڭ ارتىنان ەمەس, ۇكىمەت سونىڭ ءبارىن ۇسىنىپ شارۋانىڭ ارتىنان جۇگىرۋى كەرەك. سەبەبى ءونىمدى بەرەتىن, ەلدى اسىرايتىن سولار. اۋىل شارۋاشىلىعى دامىعان ەلدەردىڭ بارىندە سولاي.
– كەڭەس كەزىندە ەڭبەك ادامىنا ەرەكشە قۇرمەت كورسەتىلەتىن. قازىر شە؟
– شىنىندا 19 ملن حالىقتى اسىراپ, ارتىلعانىن ەكسپورتتاپ وتىرعان قاۋىم ەرەكشە سىي-قۇرمەتكە لايىق. بىراق سونى ەل تۇسىنبەيدى. ەڭبەككەرلەرمەن كەزدەسكەندە ارقايسىسىنىڭ قولىن الىپ, بۇگىنگىنىڭ ناعىز جۇلدىزى سولار ەكەنىن ايتىپ ەڭسەلەرىن كوتەرۋگە, رۋح بەرۋگە تىرىستىم. ۇكىمەتتىڭ اگرارلىق ساياساتىن ءتۇسىندىردىم, پرەزيدەنت ق.توقاەۆتىڭ جولداۋىندا سالاعا قانشالىقتى ماڭىز بەرىلگەنىن جەتكىزدىم. وسى ساپار بارىسىندا ءوزىم كورگەن پروبلەمالاردى, شارۋالاردىڭ وتىنىشتەرىن, جانايقايىن, ونى شەشۋدىڭ جولدارىن حاتقا ءتۇسىرىپ پرەزيدەنت ق.توقاەۆ پەن اۋىل شارۋاشىلىعى ءمينيسترى س.وماروۆتىڭ اتىنا حات ازىرلەدىم.
قازاقستان – الەۋمەتتىك مەملەكەت. ياعني مەملەكەتتىڭ نەگىزگى ماقساتى – ادامعا جاعداي جاساۋ. كونستيتۋتسيادا ايتىلعانداي, ەلىمىزدىڭ باستى بايلىعى – ادام, ءبىزدىڭ باعا جەتپەس كاپيتالىمىز – وسى ەلدىڭ حالقى. وكىنىشكە قاراي, وپتيميزاتسيا, ۋربانيزاتسيا دەگەن ۇرانمەن كوپ جاعدايدا ماسەلەنىڭ قارجىلىق جانە ەكونوميكالىق جاعىنا باسا ءمان بەرىلىپ, ادامداردىڭ تاعدىرى ەكىنشى كەزەككە قالىپ قويىپ جاتىر. «بولاشاعى جوق اۋىلدار» دەگەن تەرمين شىققانىنا دا ءبىراز بولدى. بۇل تىركەستى سوزدىك قورىمىزدان, قولدانىستان مۇلدە الىپ تاستاۋ كەرەك. «بولاشاعى جوق» دەپ جۇزدەگەن اۋىلدى ساناتتان سىزىپ تاستاۋ قازاقتىڭ بولاشاعى جوق دەۋمەن بىردەي. وكىنىشكە قاراي, سول ساياساتتىڭ كەسىرىنەن 1 100 اۋىل جابىلدى. اۋىلدا ەكى قازاق قالسا دا جول سالىپ, سۋ تارتىپ, تۇرمىسىن جاقسارتۋدىڭ امالىن ويلاۋ كەرەك.
قوستانايدىڭ امانگەلدى, جانگەلدين اۋداندارىنا بارعاندا ءتۇن ورتاسى بولعانىنا قاراماي, احمەت بايتۇرسىن ۇلى, ءالىبي جانگەلديندەردىڭ مۋزەيىنە سوقتىق. ۋاقىت تىعىز بولسا دا ايالداماي كەتۋگە ءداتىمىز شىدامادى. الاشتىڭ زيالىلارى ەلدىڭ نەگىزگى تىرشىلىگى, ەكونوميكانىڭ تىرەگى اۋىل شارۋاشىلىعى ەكەنىن ايتىپ, سالانى دامىتۋدىڭ دا جاي-جاپسارىن ايتىپ كەتتى عوي. شارۋالاردىڭ جاي-كۇيىن, اۋىلداعى اعايىننىڭ تىنىس-تىرشىلىگىن كورگەندە ءبىز سول اتالارىمىزدىڭ اماناتىن ادال ورىنداپ ءجۇرمىز بە دەگەن ويعا كەتتىم.
– اڭگىمەڭىزگە راحمەت.
اڭگىمەلەسكەن
ارنۇر اسقار,
«Egemen Qazaqstan»
