وسىدان ەكى اپتا بۇرىن قوستانايعا قاشىقتان وقىپ جاتقان وقۋشىلارعا ارنالعان 1,5 مىڭ كومپيۋتەر اكەلىنىپ, وبلىستىڭ بىرنەشە اۋدان, قالالارىنداعى ءبىلىم مەكەمەلەرىنە جەتكىزىلگەن. باستىسى, قاشىقتان ءبىلىم الىپ جاتقان وقۋشىلار قاجەت قۇرالدان قىسىلىپ قالماۋى كەرەك. ال وتكەن اپتانىڭ اياعىندا ءبىلىم باسقارماسىنىڭ ماماندارى كومپيۋتەر, نوۋتبۋك, پلانشەتى بار – 651 تەحنيكالىق قۇرىلعىنى ارقالىققا جىبەردى. جۇك كولىككە تيەلەر الدىندا باسقارما وكىلدەرى مەن قوعام بەلسەندىلەرى ءار قۇرىلعىنى مۇقيات تەكسەرىپ شىقتى.
– بۇگىن 1,5 مىڭ كومپيۋتەر قۇرالىن تەكسەرىپ, قابىلداپ الدىق. مونيتورينگ بارىسىندا ءار كومپيۋتەردىڭ اقاۋىنىڭ بار-جوعى تەكسەرىلىپ, قوسىمشا بولشەكتەرىنىڭ تۇگەل ەكەنىنە كوز جەتكىزدىك, – دەدى «قوستاناي – ادالدىق الاڭى» جوبالىق ءوفيسىنىڭ مەنەدجەرى ەركەبۇلان تىلەنباەۆ.
قالعان كومپيۋتەرلەر مونيتورينگتىك توپ مۇشەلەرىنىڭ قاتىسۋىمەن دەنيسوۆ, قامىستى, قاراسۋ, مەڭدىقارا, ۇزىنكول اۋداندارىنا جونەلتىلەدى. ءبىلىم باسقارماسى باسشىسىنىڭ ايتۋىنشا, بيىل وبلىس مەكتەپتەرىنە جالپى سانى 15 مىڭ كومپيۋتەر جەتكىزىلۋى ءتيىس.
– قاشىقتان وقىپ جاتقان وقۋشىلارعا ارنالعان 1,5 مىڭ قۇرىلعى اتالعان اۋداندارداعى ءبىلىم مەكەمەلەرىنە كەلىسىمشارت بويىنشا 4 قازانعا دەيىن جەتكىزىلۋى كەرەك. قالعان 13 638 كومپيۋتەر قۇرالىن قازان ايىندا تاراتىپ بەرەمىز. ياعني, الداعى ايدا وبلىستىڭ بارلىق 20 وڭىرىنە 11 مىڭ نوۋتبۋك, 2 مىڭ پلانشەت جونەلتىلەدى, – دەدى ءبىلىم باسقارماسىنىڭ باسشىسى زاۋرە بايمەنوۆا.
بۇل كومپيۋتەرلەر ءار اۋدانعا سول جەردەگى وقۋشىلاردىڭ جانە اۋىستىرۋدى قاجەت ەتەتىن ەسكى كومپيۋتەرلەردىڭ سانىنا قاراي ۇلەستىرىلەدى. باسقارما باسشىسىنىڭ سوزىنشە, جىل باسىنان بەرى وبلىس مەكتەپتەرى وقۋشىلارعا 12 مىڭ كومپيۋتەر ۇستاتقان. قاشىقتان وقىتۋ اياقتالعان سوڭ ونىڭ ءبارى مەكتەپ مەنشىگىنە قايتارىلادى. بۇل ماقساتقا ۇكىمەت قورىنان 2,4 ملرد تەڭگە جۇمسالىپ وتىر.
– ءوڭىر مەكتەپتەرىندە مۇقتاج وقۋشىلارعا كومپيۋتەر تاراتۋ جۇمىستارى ءالى دە جالعاسىپ جاتىر. قۇرالى جوق بالالاردىڭ اتا-انالارى مەكتەپكە حابارلاسىپ, ۋاقىتشا پايدالاناتىن كومپيۋتەر الۋىنا بولادى. ءالى دە كەش ەمەس. الايدا بۇگىندە وبلىستاعى 493 مەكتەپتىڭ 355-ءى شتاتتىق رەجىمدە جۇمىس ىستەپ جاتقانىن اتاپ ءوتۋ كەرەك. سوندىقتان مەكتەپكە دە كومپيۋتەر قاجەت, –دەدى باسقارما باسشىسى.
مونيتورينگ توبى تەكسەرگەن جاڭا كومپيۋتەرلەردىڭ ءبىرازىنان اقاۋ تابىلىپ, قابىلداۋدان وتپەي قالدى. وسىلايشا جەتكىزۋشى كومپانيانىڭ بىردەن 20 مونيتوردى قايتا اۋىستىرىپ بەرۋىنە تۋرا كەلدى.
قوستاناي وبلىسى
