– گۇلدەن, بىلاي قاراساڭىز, ءبىر سپورت كلۋبى تۇگەل ءبىر اۋدانعا قىزمەت ەتىپ وتىر. ەستۋىمىزشە, ساباقتارىڭىز دا تەگىن. بۇل جوبا قالاي باستالدى؟
– نەگىزى اۋەلدەن سپورت مەكتەبىن اشساق دەگەن ارمانىمىز بار ەدى. كۇيەۋىم مۇحاديا قۋانگەرەەۆ – ءىى توپتاعى مۇگەدەك. 2006 جىلى ينسۋلت الىپ, سول قول, سول اياعىنا زاقىم كەلدى. سودان كەيىن ءوزى سياقتى تاعدىرلاس جانداردى ىزدەپ, ارالاسا باستادى. اتىراۋ وبلىسىندا مۇمكىندىگى شەكتەۋلى جاندارعا ارنالعان سپورتتىق سەكتسيالار ىزدەپ, «مۇگەدەكتەر» سپورت كلۋبىن تاپتى. اياق-قولى جوق ازاماتتاردىڭ سپورتپەن اينالىسىپ جۇرگەنىن كورىپ, ءوزى دە سپورتپەن اينالىسۋدى ماقسات ەتتى. 2007 جىلى اتالعان سپورت كلۋبىنا جۇمىسقا ورنالاسىپ, ماحامبەت اۋدانى بويىنشا توعىزقۇمالاقتان ادىسكەر بولىپ قىزمەت ەتە باستادى. مەن 2006 جىلدان بەرى وسى اۋداندا جۇمىس ىستەيمىن, تالاي شاكىرت تاربيەلەگەن ۇستازبىن. 2008 جىلى وتباسىن قۇردىق. ارمانىمىز شىندىققا اينالىپ, 2018 جىلى «ەرجۇرەكتەر» قوعامدىق قورىن قۇرىپ, سپورت مەكتەبىنىڭ جۇمىسىن باستادىق. ەكى جىلدىڭ ىشىندە ءبىراز جەتىستىككە جەتتىك.
– سپورت مەكتەبىندە قانداي سەكتسيالار بار؟
– قازىرگى تاڭدا توعىزقۇمالاق, دويبى, شاحمات, جەڭىل اتلەتيكا, ۇستەل تەننيسى سەكتسيالارى جۇمىس ىستەيدى. بارلىق ساباق تەگىن. قاتىسۋشىلارىمىز مۇگەدەكتىگىن راستايتىن انىقتاما الىپ كەلۋى كەرەك. ولاردى دايارلاپ, اۋداندىق, وبلىستىق, رەسپۋبليكالىق جارىستارعا قاتىستىرامىز. سپورت شەبەرلىگىن قورعاعان شاكىرتتەرىمىز دە ءبىراز. كوپتەن وزىپ شىققان جۇيرىكتەردىڭ جارىستارعا كەتەتىن شىعىنىن كوتەرۋگە وبلىس اكىمدىگى اتسالىسادى.
ءوزىمىز تۇرىپ جاتقان اۋدانمەن شەكتەلىپ قالماي, قاسىمىزداعى ەلدى مەكەندەگى ازاماتتارعا دا مۇمكىندىك بەرەيىك دەگەن ويمەن باسقا اۋىلدارداعى بالالارعا دا مەكتەپ اشقىمىز كەلىپ بريتان كەڭەسى مەن Chevron ەنەرگەتيكالىق كومپانياسى ۇيىمداستىرعان كونكۋرسقا قاتىسىپ, الەۋمەتتىك startup جوباسىن جۇزەگە اسىرۋعا 3 مىڭ اقش دوللارى كولەمىندە گرانت جەڭىپ الدىق. بۇگىندە الىس-جاقىن اۋىلدارداعى مۇمكىندىگى شەكتەۋلى جانداردىڭ سپورت مەكتەبىنە كەلىپ-كەتۋىنە جاعداي جاساپ وتىرمىز.
– سپورت مەكتەبىنە كەز كەلگەن ادام كەلىپ, جاتتىعا الا ما؟
– ءيا, سپورتپەن اينالىسامىن دەگەن ىنتاسى بار كەز كەلگەن اۋىل تۇرعىنىنا ەسىگىمىز اشىق. ءبىز تەك سپورتقا باۋلىپ قانا قويماي, ولاردىڭ الەۋمەتتەنۋىنە دە مۇمكىندىك جاسايمىز. جۇمىسقا ورنالاستىرۋعا, وقۋعا تۇسىرۋگە تىرىسامىز. مۇمكىندىگى شەكتەۋلى جاندار كوبىنە قوعامنان قول ءۇزىپ قالادى, كوپشىلىك جينالعان جەرگە بارۋدان تارتىنادى. ماسەلەن, ماحامبەت اۋدانىنىڭ جالعانساي اۋىلىندا ءبىر زامانداسىمىز 14 جىل بويى ۇيىنەن شىقپاي, قوعامدىق ومىردەن قول ءۇزىپ قالعان ەكەن. ءبىزدىڭ سپورت مەكتەبىمىزگە كەلىپ, ادامدارمەن ارالاسا باستادى. توعىزقۇمالاقتان ءتۇرلى چەمپيوناتقا قاتىسىپ, سپورت شەبەرلىگىنە ۇمىتكەر اتاعىن الدى. وقۋعا ءتۇستى, بۇگىندە اۋدارماشى بولىپ جۇمىس ىستەيدى. قازان ايىندا اقتاۋ قالاسىندا وتەتىن تىرەك-قيمىل اپپاراتى زاقىمدانعان جاندار اراسىنداعى چەمپيوناتقا جولداما الىپ وتىر.
– ياعني مەكتەبىڭىز ارقىلى مۇمكىندىگى شەكتەۋلى جاندارعا جاڭا مۇمكىندىكتەر اشۋدى ماقسات ەتتىڭىز؟
– مۇمكىندىگى شەكتەۋلى جاندارعا قوعاممەن بايلانىس ماڭىزدى. سپورت – دەنساۋلىق كەپىلى, بىراق سپورت ادامداردى دا ءوزارا بايلانىستىرادى. مىسالى, ءبىز وسى سپورتتىڭ ارقاسىندا وتباسىلى بولدىق. اۋداننىڭ قوعامدىق ومىرىنە دە ارالاسقىمىز كەلەدى. بىلتىر اۋداندىق جۇمىسپەن قامتۋ بولىمىنەن مەملەكەتتىك تاپسىرىس الىپ, 160 مۇمكىندىگى شەكتەۋلى بالاعا مەرەكەلىك ەرتەڭگىلىك وتكىزدىك.
– سپورت ۇلكەن ومىرگە جولداما بەرەدى دەيسىز عوي؟
– مەكتەبىمىزدە تاربيەلەنگەن, ءوزىن جاقسى قىرىنان كورسەتە العان شاكىرتتەرىمىز جاتتىقتىرۋشىلار قاتارىن تولىقتىرادى. ياعني ولار ءتۇرلى جارىستارعا قاتىسىپ, ىسىلىپ, بەلگىلى دەڭگەيلەردەن وتكەننەن كەيىن جۇمىسقا ورنالاسادى. مىسالى, مەكتەبىمىزگە 7 جىل بۇرىن كەلگەن شاكىرتىمىز اينا بايسانباەۆا وسى ۋاقىتقا دەيىن ءتۇرلى رەسپۋبليكالىق جارىستىڭ جەڭىمپازى اتانىپ, توعىزقۇمالاقتان سپورت شەبەرلىگىنە ۇمىتكەر اتاندى. جاقىندا ونى ەسبول اۋىلىنا باپكەر رەتىندە جۇمىسقا ورنالاستىردىق. مۇنداي مىسالدار از ەمەس.
جالپى, مۇمكىندىگى شەكتەۋلى جانداردىڭ سپورتپەن اينالىسۋىنا كوڭىل بولىنسە دەگەن تىلەك بار. ۇلكەن كومپانيالار دا قولداۋ بىلدىرسە نۇر ۇستىنە نۇر بولار ەدى. ماسەلەن, جولداسىمنىڭ سپورتقا كەلۋىنە سەبەپشى بولعان اتىراۋ وبلىستىق «مۇگەدەكتەر» سپورت كلۋبى مۇمكىندىگى شەكتەۋلى جاندارعا ارنالعان رەسپۋبليكا بويىنشا اشىلعان العاشقى مەكتەپ. ونىڭ نەگىزىن قالاۋشى سارايشىق اۋىلىنىڭ تۋماسى باۋىرجان تاقاۋوۆ اعامىز بۇگىندە ۆولەيبولدى وتىرىپ ويناۋ فەدەراتسياسىنىڭ پرەزيدەنتى. سپورت – ءومىر ساپاسىن ارتتىرۋعا, ادامداردىڭ كوڭىل كۇيىن كوتەرۋگە قاجەت بىردەن-ءبىر قۇرال. سوندىقتان سپورت ۆولونتەرلىگى دە نازارعا الاتىن دۇنيە.
اڭگىمەلەسكەن
سۆەتلانا عالىمجانقىزى,
«Egemen Qazaqstan»
