ساياسات • 26 قىركۇيەك، 2020

"قر – ەۋروپالىق وداق" ىنتىماقتاستىق كوميتەتىنىڭ 18-ءشى وتىرىسى ءوتتى

27 رەت كورسەتىلدى

"قازاقستان رەسپۋبليكاسى – ەۋروپالىق وداق" ىنتىماقتاستىق كوميتەتىنىڭ 18-ءشى وتىرىسى ءوتتى، دەپ حابارلايدى Egemen.kz.

قازاقستان رەسپۋبليكاسى سىرتقى ىستەر ءمينيسترىنىڭ ورىنباسارى مارعۇلان بايمۇحاننىڭ جانە ەۋروپالىق سىرتقى ءىس-قيمىلدار قىزمەتىنىڭ رەسەي، شىعىس ارىپتەستىك، ورتالىق ازيا جانە ەقىۇ بويىنشا ديرەكتورى ليۋك دەۆيننىڭ توراعالىعىمەن بەينەكونفەرەنتسيا رەجيمىندە «قازاقستان رەسپۋبليكاسى – ەۋروپالىق وداق» ىنتىماقتاستىق كوميتەتىنىڭ 18-ءشى وتىرىسى ءوتتى.

قازاقستاندىق دەلەگاتسيا قۇرامىنا ساۋدا جانە ينتەگراتسيا، ەنەرگەتيكا، يندۋستريا جانە يننوۆاتسيالىق دامۋ، ۇلتتىق ەكونوميكا مينيسترلىكتەرىن قوسا العاندا، قر توعىز مەملەكەتتىك ورگانىنىڭ وكىلدەرى كىردى.

كەلىسسوزدەردىڭ باستى تاقىرىپتارى 2020 جىلعى 1 ناۋرىزدا كۇشىنە ەنگەن كەڭەيتىلگەن ارىپتەستىك پەن ىنتىماقتاستىق تۋرالى كەلىسىمى (كاىك) شەڭبەرىندە قازاقستان مەن ەۋروپالىق وداققا مۇشە ەلدەر اراسىنداعى ساياسي ديالوگتى، كوپجاقتى ساۋدا-ەكونوميكالىق جانە ينۆەستيتسيالىق قاتىناستاردى نىعايتۋ ماسەلەلەرى بولدى.

بەينە كونفەرەنتسيا بارىسىندا قر مەن ەو اراسىنداعى ساۋدا، ەنەرگەتيكا، قورشاعان ورتانى قورعاۋ، اۋىل شارۋاشىلىعى جانە ادام قۇقىقتارى سالاسىنداعى ديالوگتىق پلاتفورمالار جەلىسى بويىنشا بۇرىن قول جەتكىزىلگەن ۋاعدالاستىقتاردى ىسكە اسىرۋ بويىنشا ناقتى پىكىر الماسىلدى، سونداي-اق قازاقستان مەن ەۋروپالىق وداق اراسىنداعى اۋە قاتىناستارىن جولعا قويۋ جانە قر ازاماتتارى ءۇشىن ۆيزالىق رەجيمدى جەڭىلدەتۋ ماسەلەلەرى تالقىلاندى.

تاراپتار «ورتالىق ازيا – ەۋروپالىق وداق» كەزدەسۋلەرى شەڭبەرىندە وڭىرارالىق ىنتىماقتاستىقتى ىلگەرىلەتۋ، سونداي-اق ەۋرووداقتىڭ ورتالىق ازيا بويىنشا جاڭا ستراتەگياسى شەڭبەرىندە جاڭا وڭىرلىك جوبالاردى ازىرلەۋ جانە ىسكە اسىرۋ ماسەلەلەرىنە ەرەكشە نازار اۋداردى.

كەزدەسۋ قورىتىندىسى بويىنشا تاراپتار قازاقستان – ەو جانە ورتالىق ازيا – ەو جەلىسى بويىنشا الداعى كەزدەسۋلەر شەڭبەرىندە قارالعان ماسەلەلەر بويىنشا ءوزارا ءىس-قيمىلدى جالعاستىرۋعا كەلىستى.

سوڭعى جاڭالىقتار

ۇقساس جاڭالىقتار