ەلوردا • 26 قىركۇيەك، 2020

ەلوردا اكىمى IT-كەڭەستىڭ قۇرىلعانى تۋرالى مالىمدەدى

13 رەت كورسەتىلدى

IT-كەڭەس تاجىريبە الماسۋعا، جوبالاردى تالقىلاۋعا جانە جاڭا ترەندتەردى انىقتاۋعا باعىتتالاتىن بولادى. بۇل تۋرالى نۇر-سۇلتان قالاسىنىڭ اكىمى التاي كولگىنوۆ ينستاگرام پاراقشاسىندا جازدى، دەپ حابارلايدى Egemen.kz.

«زامانۋي تەحنولوگيالار ءبىر ورنىندا تۇرماي، جوعارى قارقىنمەن دامىپ كەلەدى. تسيفرلاندىرۋ ءومىرىمىزدىڭ بارلىق سالاسىندا ماڭىزدى ءرول اتقارادى. بىزگە باستىسى قالا تىرشىلىگىن قامتاماسىز ەتۋ ءۇشىن ودان دا قولايلى ءارى قاۋىپسىز جاعداي جاساۋعا مۇمكىندىك بەرەتىن جاڭا تەحنولوگيالاردى بەلسەندى تۇردە ەنگىزە بەرۋ قاجەت.

پاندەميا بىزگە ەلەكتروندىق قىزمەتتەردى دامىتۋ قانشالىقتى ماڭىزدى ەكەنىن كورسەتتى. مىسالى، توتەنشە جاعداي رەجيمى كەزىندە ازىق-ت ۇلىك جۇكتەرى باقىلاۋ-وتكىزۋ بەكەتتەرىنەن ەش كەدەرگىسىز ءوتۋى ءۇشىن جاسىل ءدالىز قۇردىق. ياعني، جۇك كولىكتەرى جۇرگىزۋشىلەرىنە كەزەكتە تۇرىپ، قاعاز قۇجاتتار ارقىلى جۇك پەن قوزعالىس باعىتىن جانە تاعى باسقانى قايتا-قايتا راستاۋ كەرەك بولمادى. بۇل مالىمەتتەر ەلەكتروندىق بازاعا ەنگىزىلدى. جەدەل مەديتسينالىق جاردەم ستانسالارىنىڭ جۇمىسىن جەڭىلدەتكەن بىرقاتار قوسىمشا مەن بازا قۇرىلدى. مەديتسينالىق ۇيىمدار تەلەمەديتسيناعا كوشتى. بۇنداي مىسال كوپ.

تسيفرلىق تەحنولوگيالاردى ودان ءارى دامىتىپ، ولاردى ءومىرىمىزدىڭ بارلىق سالاسىنا ەنگىزۋ ءۇشىن IT-كەڭەس قۇردىق. ول تاجىريبە الماسۋ، جوبالاردى تالقىلاۋ مەن جاڭا ترەندتەردى انىقتاۋمەن اينالىسادى. بۇگىن «اstana IT University» بازاسىندا بىرقاتار ماڭىزدى باعىتتى تالقىلادىق.

ءبىرىنشى. قالا مەكتەپتەرىنە STEM-تەحنولوگيالار ەنگىزىپ جاتىرمىز. بۇل وقۋشىلارعا 3D-وبەكتىلەر جاساۋعا، روبوتتاردى مودەلدەۋگە، عىلىمي-تەحنيكالىق ءبىلىمدى بىردەن تاجىريبە جۇزىندە قولدانۋعا مۇمكىندىك بەرەدى. بۇل ارينە وقۋعا دەگەن قىزىعۋشىلىقتى ارتتىرىپ، ساباق ۇلگەرىمىن جاقسارتادى، بولاشاق ماماندىعىن تاڭداۋعا دا كومەكتەسەدى. جاڭا مەكتەپتە (ساۋران كوشەسى، 5/1) قاشىقتان وقۋعا ارنالعان تەحنيكامەن جابدىقتالعان ونلاين-ستۋديا اشىلدى. مۇعالىمدەر ستۋديادا ونلاين-ساباقتار ءتۇسىرىپ، ۆەبينارلار مەن تىكەلەي كورسەتىلىمدەر وتكىزە الادى. ودان ءارى بۇنداي تاجىريبەنى باسقا مەكتەپتەردە دە قولدانامىز. بۇعان قوسا ەلەكتروندىق وقۋ باعدارلامالارى ازىرلەنىپ جاتىر. ولار بالالارعا قانداي دا ءبىر تاقىرىپتىڭ تۇسىنىكتەمەسىن ينتەراكتيۆتى تاقتادان انىق كورۋگە مۇمكىندىك بەرەدى.

ەكىنشى. ينجەنەرلىك جەلىلەردى تسيفرلاۋ. كوشەلەر مەن داڭعىلدار استىندا مىڭداعان شاقىرىم ينجەنەرلىك كوممۋنيكاتسيا جاتىر. ولار سۋ قۇبىرى، ەلەكتر، كارىز، بايلانىس جەلىلەرى. ءار ادامنىڭ ءومىر ءسۇرۋ ساپاسى ولاردىڭ ۇزدىكسىز جۇمىسىنا بايلانىستى. وكىنىشكە قاراي، ماماندار جۇمىس بارىسىندا ءجيى كەزدەسەتىن پروبلەما – ينجەنەرلىك جەلىلەردىڭ ورنى مەن جاعدايى تۋرالى قاعازداعى مالىمەتتىڭ شىنايى احۋالمەن سايكەس كەلمەۋى. وسىنىڭ سالدارىنان جەلىلەر جارىلىپ، باسقا دا وقيعالار كەزدەسىپ جاتادى. ال تسيفرلاۋ بولسا بىزگە بارلىق ينجەنەرلىك جەلىنى: جۇكتەمە مەن ولاردىڭ جاعدايىن كورۋگە مۇمكىندىك بەرەدى. بۇل ءوز كەزەگىندە جوندەۋ جۇمىستارىن ۋاقىتىندا جۇرگىزۋگە، قاجەت بولعان جاعدايدا قۋاتتى ارتتىرۋعا، تاۋەكەلدەردى ازايتۋعا جانە تاعى باسقا ارەكەتتەرگە جول اشادى. قازىر بۇكىل قالانىڭ شامامەن 50% تسيفرلادىق.

ءۇشىنشى. بەينەباقىلاۋ كامەرالارى. «سەرگەك» كامەرالارىنىڭ ارقاسىندا جول اپاتى سانىن 20%، جولداعى ءولىم-ءجىتىم كورسەتكىشىن 40% تومەندەتە الدىق. قازىر باسقا ۆەدومستۆولارداعى ارىپتەستەرىممەن بىرگە «قاۋىپسىز اۋلا» جوباسىن جۇزەگە اسىرىپ جاتىرمىز. بۇل ۇرلىق، بوتەننىڭ مۇلكىن ءبۇلدىرۋ مەن باسقا دا زاڭ بۇزۋشىلىقتار سانىن ازايتۋعا مۇمكىندىك بەرەدى. قاۋىپسىزدىك – بۇل ەڭ ماڭىزدى نارسە.

سونداي-اق، تۇرعىن ءۇي كەشەندەرىندە «اقىلدى» شلاگباۋم مەن اۆتوماشينانىڭ مەملەكەتتىك نومەرىن تانيتىن جۇيەلەردى ورناتۋ بويىنشا جوبانى ىسكە قوسقالى وتىرمىز. بۇل تەحنولوگيا جەدەل قىزمەت كولىكتەرىنە ءۇي اۋلاسىنا ەش كەدەرگىسىز كىرۋگە مۇمكىندىك بەرەدى. جىل سوڭىنا دەيىن تۇرعىن ءۇي كەشەندەرىنىڭ 30% دەيىن «اقىلدى» شلاگباۋممەن قامتۋدى جوسپارلاپ وتىرمىز.

پرەزيدەنت حالىققا جولداۋىندا «تسيفرلاندىرۋ – بارلىق رەفورمانىڭ نەگىزگى ەلەمەنتى» دەگەن بولاتىن»، – دەپ جازدى التاي كولگىنوۆ.

سوڭعى جاڭالىقتار

ۇقساس جاڭالىقتار