ايماقتار • 26 قىركۇيەك، 2020

پاۆلودار وبلىسىندا وقۋشىلاردان COVID-19 انىقتالعان مەكتەپ كارانتينگە جابىلدى

17 رەت كورسەتىلدى

شارباقتى اۋدانىنداعى اۋىل مەكتەبىندە 4 وقۋشىدان كوروناۆيرۋس انىقتالدى، دەپ حابارلايدى Egemen.kz Pavlodarnews.kz سايتىنا سىلتەمە جاساپ.

"شارباقتى اۋدانىنداعى الەكسەەۆكا اۋىلىنىڭ مەكتەبىندە 3-سىنىپ وقۋشىسىنان كوروناۆيرۋس انىقتالدى. وقۋشى سوڭعى رەت ساباققا 16 قىركۇيەك كۇنى بارعان. اتاسىنىڭ پنەۆمونياعا شالدىعۋىنا بايلانىستى بالانى تەكسەرۋ كەزىندە كوروناۆيرۋس انىقتالدى. بۇل بالامەن 44 ادام بايلانىستا بولعان. 44 ادامدى تەكسەرۋ كەزىندە سىنىبىنداعى 3 وقۋشى كۆي جۇقتىرعانى بەلگىلى بولدى"، دەدى باتىربەك اليەۆ.

مەكتەپكە بارىپ ءبىلىم الاتىن 4 وقۋشىدان ىندەتتىڭ انىقتالعانىنا بايلانىستى الەكسەەۆكا اۋىلىنىڭ مەكتەبى كارانتينگە جابىلدى. مەكتەپ ەپيدەميولوگيالىق جاعداي جاقسارعانعا دەيىن جابىق بولادى. 

باتىربەك اليەۆتىڭ ايتۋىنشا، 1 قىركۇيەكتەن بەرى پاۆلودار وبلىسىندا 58 ادام كوروناۆيرۋس جۇقتىرعان. ونىڭ ىشىندە 18 جاسقا دەيىنگى 14 بالا بار. 

"14 بالانىڭ ىشىندە 9 بالا مەكتەپ جاسىندا بولسا، 5 – 6 جاسقا دەيىنگى بالالار. بۇل 6 جاسقا دەيىنگى بالالار بالاباقشاعا بارمايتىندار. ال، قالعان 9 بالانىڭ 4 – كارانتينگە جابىلعان الەكسەەۆكا مەكتەبىنەن، 5 – شارباقتى اۋدانى ورتالىعىنان، پاۆلودار جانە اقسۋ قالاسىنان. بۇل 5 بالا قاشىقتىقتان ءبىلىم الادى"، دەدى دەپارتامەنت باسشىسى.

سپيكەردىڭ ايتۋىنشا، ەگەر ءبىر سىنىپتاعى بالالاردان كۆي انىقتالسا، سول سىنىپ كارانتينگە جابىلادى. ال، ەگەر ءبىر مەكتەپتەگى ءارتۇرلى سىنىپتاردان ىندەت جۇقتىرۋ جاعدايى تىركەلسە، وندا مەكتەپ تولىعىمەن جابىلادى. 

ايتا كەتەيىك، پاۆلودار وبلىسىندا وسى ۋاقىتقا دەيىن 3897 ادامنان COVID-19 انىقتالعان. ونىڭ ىشىندە بەلگىلەرى بار - 2731، بەلگىلەرى جوق - 1166. وتكەن تاۋلىكتە 4 وقيعا تىركەلدى. تاۋلىكتىك ءوسىم 0،1 %-دى قۇراسا، سوڭعى 7 كۇن ىشىندەگى كۇندەلىكتى ورتاشا ءوسىم دە 0،1%-دى قۇرادى. ىندەتتەن جازىلىپ شىققاندار سانى – 3735.

سونداي-اق پنەۆمونياعا شالدىققان 261 ادام ستاتسيونارلاردا جاتىر.

سوڭعى جاڭالىقتار

ۇقساس جاڭالىقتار