ۆيدەو • 25 قىركۇيەك، 2020

ور وزەنىن ورتايتىپ وتىرعان كىمدەر؟

1020 رەت كورسەتىلدى

اقتوبە وبلىسى حرومتاۋ اۋدانىنا قاراستى قوپا اۋىلىنىڭ تۋماسى دامير يسكاكوۆ حابارلاستى. وقىرماننىڭ سوزىنە قاراعاندا، بيىل تامىز ايىنىڭ سوڭىندا ىرگەدەگى ور وزەنىن مەكەن ەتكەن بالىقتار بەلگىسىز سەبەپپەن قىرىلا باستاعان. سوڭعى ۋاقىتتا وزەننىڭ دە اياسى تارىلىپ، تارتىلىپ بارا جاتقان كورىنەدى.

سوزىنە دالەل رەتىندە بىرنەشە ۆيدەو دەرەكتەرىن ۇسىندى. بەينەجازبانىڭ بارلىعى 2020 جىلدىڭ تامىز جانە قىركۇيەك ايلارىندا تۇسىرىلگەن. ءبىرىنشى ۆيدەودا ولگەن بالىقتار وزەن جيەگىنە شىعىپ قالعان. داميردىڭ ايتۋىنشا، اۋىل ازاماتتارى وسى جاعدايعا بايلانىستى ەكولوگيا ماماندارىنا دابىل قاققان. ال بالىقتاردىڭ قىرىلۋىنا اعىستىڭ بولماۋىنان كەيىن ورىن العان وتتەگى جەتىسپەۋشىلىگى سەبەپ بولۋى مۇمكىن.

وزەن جاعالاپ كورگەن اۋىلدىقتار ور وزەنىنىڭ ورتا بەلدەن بوگەلگەنىن كورىپ تاڭ-تاماشا بولعان. ماسەلە وسى جەردەن باستالدى. تۇرعىندار مۇنداي بوگەت ونسىز دا جۇدەپ-جاداپ جاتقان مەكەنگە تونگەن ەكولوگيالىق  اپات دەپ وتىر. سوزدەن بولەك ولار ىسكە دە كىرىسكەن سىڭايلى. بۇل ماسەلەگە بايلانىستى كوميسسيا شاقىرتقان ەكەن. بىراق ارنايى وكىلدەر كەلەردەن ءبىر كۇن بۇرىن وزەندى بوگەگەندەر بوگەتتى بۇزىپ ۇلگەرگەن.

- مۇنىڭ ءبارى جانىمىزدا ورنالاسقان اكتەپ مال شارۋاشىلىعى كومپانياسىنىڭ ىستەپ وتىرعانى. بۇل وزەن مۇعالجار تاۋىنان باستاۋ الىپ، حرومتاۋ اۋدانىنان ءوتىپ، رەسەيدىڭ ورسك قالاسىنىڭ تۇسىندا جايىق وزەنىنە قۇيىلادى. بۇل وزەنگە قۇيىلاتىن شاكىتاۋ، كۇنگىرلەك، بىلقىلداق، تامدى، ءدامدى تاۋلارىنان كەلەتىن سۋ الاپتارى دا بوگەلگەن. ەڭ سوراقىسى، سۋ الاپتارىنا بوگەت قويىلعانىن ەكى جىلدان بەرى قوپا اۋىلىنىڭ اكىمى ءبىلىپ كەلگەن.  سويتە تۇرا ەشقانداي شارا قولدانىلماعان.  ەكى ورتادا قوپا، بوگەتساي، كوكتاۋ سەكىلدى اۋىل تۇرعىندارى مەن تابيعات زارداپ شەككەلى تۇر. بۇدان بولەك كەزىندە تابيعاتى تامىلجىپ جاتاتىن ولكەنىڭ بۇگىندە سۇرقى قاشىپ بارادى، - دەيدى دامير يسكاكوۆ.

وسى وقيعادان سوڭ بيىلعى جىلدىڭ 11 قىركۇيەگى كۇنى وبلىستان اۋىلعا تاعى دا كوميسسيا كەلگەن. قۇرامىندا سالالىق وبلىس باسقارماسىنىڭ وكىلى مەن حرومتاۋ اۋدانى اكىمىنىڭ ورىنباسارى سەكىلدى باسشىلار دا بولعان. 23 قىركۇيەك كۇنى حرومتاۋ اۋدانى اكىمى قورىتىندى جاۋاپتى جەتكىزگەن كورىنەدى.

- جينالىستا ور وزەنىن ورتاسىنان بوگەگەندەرگە ايىپپىل سالىنعانى ايتىلدى. ال سالالارىنداعى ءتۇرلى بوگەتتەردىڭ قۇجاتى ازىرلەنىپ جاتىر دەگەندەيگە كەلتىردى. سوندا ول بۇعان دەيىن زاڭسىز سالىنعان عوي ، - دەيدى دامير يسكاكوۆ.

ماسەلەنى جايىق – كاسپي باسسەيندىك ينسپەكتسياسى باقىلاۋعا العان كورىنەدى. بۇل تۋرالى وسى جاعدايدى الەۋمەتتىك جەلىدە جازىپ جۇرگەن سول ولكەنىڭ تۋماسى باقىتجان قۇرمانوۆ ايتىپ بەردى.

- جاعدايدىڭ قالاي قاراي وزگەرەتىنىن بىلمەيمىن. جايىق – كاسپي باسسەيندىك ينسپەكتسياسىنا بارعانىمدا باسشىلىعىن پروكۋراتۋرا شاقىرىپ الىپتى. وبلىس اكىمىنە دە حابارلاسىپ كوردىم. كومەكشىسى نۇر-سۇلتان قالاسىندا جينالىستا جۇرگەنىن، كەلگەن سوڭ جاۋاپ بەرەتىنىن جەتكىزدى، - دەيدى ب. قۇرمانوۆ.

وسىلايشا ور وزەنى سالالارىن بوگەپ تاستاعاندار مەن تابيعات جاناشىرلارى اراسىنداعى ماسەلە ءبىر شەشىمىن تاپپاي تۇر.

سوڭعى جاڭالىقتار

ۇقساس جاڭالىقتار