وقيعا • 25 قىركۇيەك، 2020

باس باسىلىم ءتىلشىسى قۇرمەتكە بولەندى

75 رەت كورسەتىلدى

بۇگىن تولەبي اۋدانى اكىمدىگىنىڭ اكتيۆى مەن ءماسليحات دەپۋتاتتارىنىڭ كەزەكتى سەسسيا وتىرىسىندا اۋداننىڭ الەۋمەتتىك-ەكونوميكالىق دامۋىنا ۇلەس قوسقان بىرقاتار ازاماتتارعا "تولەبي اۋدانىنىڭ قۇرمەتتى ازاماتى" اتاعى رەسمي تۇردە تابىستالدى، دەپ حابارلايدى Egemen.kz

تۋعان ولكەگە ەتكەن ەڭبەگى ەلەنىپ، باعالانعان ازاماتتاردىڭ قاتارىندا ارىپتەسىمىز Egemen Qazaqstan گازەتىنىڭ تۇركىستان وبلىسى بويىنشا مەنشىكتى ءتىلشىسى، جۋرناليستەر وداعى تۇركىستان وبلىستىق فيليالىنىڭ توراعاسى عالىمجان ەلشىباي دا بولدى.

ارىپتەسىمىزگە اۋدان اكىمى باۋىرجان وماربەكوۆ، ءماسليحات حاتشىسى نۇرلان قويباعاروۆ، ارداگەرلەر كەڭەسىنىڭ توراعاسى ءاتىرحان شىڭعىسباي ءماسليحات دەپۋتاتتارى مەن اكىمدىك اكتيۆىنىڭ الدىندا القالى ماراپاتتى سالتاناتتى تۇردە تابىستادى. 

قۇرمەتكە بولەنگەن جەرلەستەرگە جۇرەكجاردى اق تىلەكتەرىن ارناعان ەل اعالارى ماراپات يەلەرىن ولكەنىڭ وركەندەۋى جولىندا مۇنان بىلاي دا ايانباي ەڭبەك ەتۋگە شاقىردى.

اقپارات سالاسىنىڭ مايتالمانى عالىمجان قامىتبەك ۇلىنىڭ تولەبي اۋدانىنا، ونىڭ ىشىندە تۋىپ، وسكەن اۋىلى – قاسقاسۋدىڭ كوركەيىپ، گۇلدەنۋىنە سىڭىرگەن ەڭبەگى ەرەن. بۇل جونىندە اقپارات سالاسىنداعى ارىپتەس-دوسى، بۇگىندە جامبىل قوبلىستىق "اقجول" گازەتىنىڭ باس رەداكتورى ورالحان ءداۋىت الەۋمەتتىك جەلىدەگى پاراقشاسىندا: 

ء"الى ەسىمدە... شامامەن 2000 جىلداردىڭ شاماسى بولۋى كەرەك. "وڭتۇستىك قازاقستان" گازەتىندە جۇمىس ىستەيتىن كەزىم. رەداكتسياعا تولەبي اۋدانى، قاسقاسۋ اۋىلىنىڭ ءبىر توپ اقساقالدارى كەلدى. قاستارىندا عالىمجان ەلشىباي دوسىم بار. 

ءدال سول كەزدە تابيعاتى تاماشا، تاۋ ەتەگىندەگى قاسقاسۋدان ءبىر كاسىپكەرلەر شاحتا اشامىز دەپ شابىلىپ جاتقان بولاتىن. عالىمجان دوسىم قازاقتىڭ شۆەيتسارياسى اتانعان شاتقالدىڭ شاحتاعا اينالىپ كەتپەۋى ءۇشىن بارىن سالدى. اۋداندىق گازەتتەن رەسپۋبليكالىق گازەتتەرگە دەيىن ماقالا جازىپ، ماسەلە قىپ كوتەردى. 

وبلىستىق گازەتتىڭ باس رەداكتورى ورازحان جارقىنبەك اعامىز ەلدىڭ ماسەلەسىن ءوزىنىڭ ماسەلەسىندەي كورەتىن كەڭ جۇرەكتى ازامات ەدى عوي. اقساقالداردىڭ اڭگىمەسىن اسىقپاي تىڭداپ، شايىن بەرىپ، سول كۇنگى ءنومىردىڭ ءبىرىنشى بەتىنە جوسپارلانعان باس ماقالانى الدىرىپ تاستاپ، قاسقاسۋلىقتاردىڭ ماسەلەسىن ءبىرىنشى بەتتەن، ءبىرىنشى پلاننان بەرگىزدى. 

عالىمجان دوسىم مۇنىمەن دە تىنباي رەسپۋبليكالىق "جاس الاش" گازەتىنە جازدى، وبلىس باسشىلارىنىڭ نازارىن اۋداردى. ايتەۋىر، تۋعان جەرىنىڭ باسىنا ءتونىپ تۇرعان قاسىرەتىنە اراشا ءتۇسىپ، بارماعان جەرى، اشپاعان ەسىگى قالمادى. اللا ساقتاپ، قاسقاسۋ شاتقالى شاحتاعا اينالماي، امان قالدى. مىنە، بۇگىندە قاسقاسۋ كەرەمەت كەلبەتىمەن ءتۋريزمنىڭ ءبىر ورتالىعىنا اينالىپ وتىر. قاسقاسۋدىڭ كەرەمەتىن سوناۋ كەڭەس زامانىندا اسانباي اسقاروۆتىڭ ءوزى باعالاپ، ەكىنشى مەدەۋ سوقتىرماق بولعانى، تاۋەلسىز ەلىمىزدىڭ ۇكىمەتى دە تۋريزم ماسەلەسىن اڭگىمە قىلعاندا قاسقاسۋدى اينالىپ وتپەيتىنى بەلگىلى.

ودان بەرىدە دە عالىم دوسىم قاسقاسۋ اۋىلىنان مەكتەپ اشۋ ءۇشىن ۇيمە-ءۇي ءجۇرىپ، تۇرعىنداردان قول جينادى. سول كەزدە "شاپ-شاعىن اۋىلعا ءوز الدىنا مەكتەپ سالىپ بەرە مە؟" دەپ كۇلگەندەر دە بولدى. بۇعان دەيىن بۇل اۋىلدىڭ بالالارى ءتورت-شاقىرىم جەردەگى كورشى اۋىلدىڭ مەكتەبىنە كەلىپ وقيتىن. اللاعا شۇكىرشىلىك، كوپ ۇزاماي قاسقاسۋ اۋىلىنىڭ قاق ورتاسىندا ەڭسەلى مەكتەپ بوي كوتەرىپ، بۇگىندە قانشاما بالاعا ءبىلىم، قانشاما ادامعا جۇمىس بەرىپ وتىر. 

وسى اۋىلدان مەشىت سوعىلعاندا دا عالىم دوسىم العاشقىلاردىڭ قاتارىندا ءوز قالتاسىنان 1 ميلليون تەڭگە قوستى. وسى عالىمنىڭ ارالاسۋىمەن وبلىستىق ءماسليحاتتىڭ دەپۋتاتتارى مۇرات تولتەباەۆ پەن اسەت قايىپبەكوۆ سياقتى مەتسەنات جىگىتتەر دە اللا ۇيىنە ءوز كومەكتەرىن كورسەتتى.

بۇدان بولەك عالىمجان ەلشىباي قانشاما مۇقتاج جاندارعا كومەكتەسىپ، ۇنەمى قايىرىمدىلىق ءىس-شارالاردىڭ بەل ورتاسىندا ءجۇر"، دەپ اعىنان اقتارىلدى.

سوڭعى جاڭالىقتار

ۇقساس جاڭالىقتار