سۋرەتتەر Baq.kz سايتىنان الىندى
ەندى ەرەكشە بالالار بەيىمدەلگەن تاەكۆوندومەن, ينكليۋزيۆتى حورەگرافيامەن, بەيىمدەلگەن سۋدا جۇزۋمەن جانە بوچچا سپورت تۇرلەرىمەن تەگىن تۇردە اينالىسا الادى.
"سالاماتتى بولاشاق" الەۋمەتتىك جوباسى اياسىندا اشىلعان مۇنداي سپورت سەكتسيالارى بۇعان دەيىن ەلىمىزدىڭ وزگە دە قالالارىندا جانە دە قاراعاندى وبلىسىنىڭ جاڭاارقا اۋدانىندا اشىلعان بولاتىن. جوبا اياسىندا قاراعاندى ايماعى بويىنشا 100-گە تارتا بالانى سپورتقا تارتۋ كوزدەلىپ وتىر.
"ەرەكشە بالالار ءۇشىن قوزعالىستا بولۋ وتە ماڭىزدى. بۇل الدىمەن از قوزعالۋدىڭ سالدارىنان بولاتىن سىرقاتتاردىڭ الدىن الادى. سونداي-اق, بالالار ءۇشىن بەيىمدەلگەن سپورت تۇرلەرىمەن اينالىسۋ ولاردىڭ فيزيكالىق جانە كوممۋنيكاتيۆتىك قابىلەتتەرى اشىلادى", دەيدى جوبانىڭ كورديناتورى نۇرگۇل ۇلجەكوۆا.
اتالعان سپورت سەكتسيالارىنىڭ تاعى ءبىر ەرەكشەلىگى وندا ەرەكشە بالالار دامۋىندا اۋىتقۋى جوق دەنى ساۋ بالالارمەن قاتار ءبىر توپتا سپورتپەن اينالىساتىن بولادى.
"وسىنداي ينكليۋزيۆتى باعىتتا نۇر-سۇلتان قالاسىنداعى سپورت سەكتسيالارى بىرنەشە جىل قاتارىنان جەمىستى جۇمىس ىستەپ كەلەدى. ءبىزدىڭ فوند جوبا اياسىندا ترەنەرلەردى وقىتۋ, ولاردىڭ ەڭبەكاقىسىن تولەۋ, ارنايى سپورتتىق ينۆەنتارمەن جانە مەتوديكالىق جابدىقتارمەن قامتاماسىز ەتۋگە جۇمسالاتىن قارجىنى ءوز موينىنا الادى. ءبىز وسىلايشا مۇگەدەك جانداردىڭ ءومىر ءسۇرۋ ساپاسىن ارتتىرۋىنا ۇلەسىمىزدى قوسامىز", دەيدى "مير راۆنىح ۆوزموجنوستەي" فوندىنىڭ ديرەكتورى نۇرگۇل ۇلجەكوۆا.
ەرەكشە بالالار شىنىعاتىن بەيىمدەلگەن سۋدا ءجۇزۋ سەكتسياسى قاراعاندىنىڭ "بالالار جانە جاسوسپىرىمدەر سارايىندا", بوچچا سەكتسياسى №27 جالپى ءبىلىم بەرەتىن مەكتەپتە جانە قيمىل-تىرەك اپپاراتى بۇزىلعان بالالارعا ارنالعان قاراعاندى وبلىسىنىڭ مەكتەپ-ينتەرناتىندا ۇيىمداستىرىلاتىن بولادى. ال بەيىمدەلگەن تاەكۆوندو سەكتسياسى "قاراعاندى وبلىستىق تاەكۆوندو فەدەراتسياسىندا" ۇيىمداستىرىلسا, ينكليۋزيۆتى حورەگرافيامەن دوستىق ءۇيىنىڭ عيماراتىندا اينالىسۋعا بولادى.
"مەن ەرەكشە بالانىڭ اناسىمەن. بۇگىن قىزىم بوچچو سپورتتىق ويىنىنا قاتىستى. بوچچو قازاقستانداعى جاڭا سپورت ءتۇرى بولعانىمەن ول جازعى پاراوليمپيادا ويىندارىنداعى مۇگەدەكتەر ارباسىنداعى سپورتشىلاردىڭ قاتىساتىن سپورتى. وسى سپورت سەكتسيالارى ەرەكشە بالالاردىڭ سپورتقا عانا ەمەس, ورتاعا بەيىمدەلىپ, ولاردىڭ بولاشاقتا وليمپيادالارعا قاتىسۋلارىنا بەرىلگەن مۇمكىندىك دەپ بىلەمىن. ءبىزدىڭ بالالارىمىزعا كورسەتىلىپ جاتقان قامقورلىققا العىسىم شەكسىز", دەيدى گاۋھار اكيجانوۆا.
