فيتنەس-يندۋستريا: تىنىعۋدان – شىنىعۋعا جۇمىسسىز قالعان كلۋبتار كۇش جيناۋعا كىرىستى

مەملەكەت دەمەسە...

قازاقستان فيتنەس-يندۋستريا وپەراتورلارى قاۋىمداستىعىنىڭ باسشىسى تاتيانا سالاتينانىڭ ايتۋىنشا, بۇل سالا كوروناۆيرۋس پاندەمياسى كەزىن­دە شى­عىنعا بەلشەدەن باتقان. قاۋىم­­داس­­تىق ماماندارىنىڭ بولجامىن­شا, نا­­رىق­تاعى ويىنشىلاردىڭ جارتىسى­نان كوبى تاراپ كەتۋى مۇمكىن. ال قالعانى شىعىنعا بات­قان كۇيى جۇمىسىن جالعاستىرا بەرمەك.

– مەملەكەت كوروناۆيرۋستىڭ ەكىنشى تولقىنىنا دايىندالىپ جاتىر. دەمەك, الداعى ۋاقىتتا تاعى دا قاتاڭ شەكتەۋ شارا­لارى ەنگىزىلۋى مۇمكىن. سوندىقتان ءبىرجولا تۇرالاپ قالماس ءۇشىن فيتنەس-يندۋس­ترياعا مەملەكەت تاراپىنان قولداۋ كورسە­تىلۋى كەرەك, – دەدى ول بىزگە بەرگەن سۇحباتىندا.

ت.سالاتينانىڭ پىكىرىنشە, الدا قان­داي جاعداي ورىن السا دا, قاۋىپسىزدىك شارالارىن قاتاڭ ساقتاي وتىرىپ, فيتنەس-كلۋبتاردىڭ جۇمىس ىستەۋىنە رۇقسات بەرىلۋى كەرەك.

– مەملەكەتتەن قارجىلاي قولداۋ كۇتىپ وتىرعانىمىزدى جاسىرمايمىز. ادەتتە ءىرى فيت­نەس-كلۋبتاردىڭ عيماراتى جال­عا بەرىلمەيدى. ولار كوپ جاع­دايدا نەسيەگە الىنعان. بىر­نەشە اي بويى جۇمىس ىستەمەي قاڭتارىلىپ تۇرسا دا, مەن­شىك يەلەرى بانك الدىنداعى مىن­دەت­تەمەلەرىن ورىنداۋى ءتيىس. قازىر جۇمىس جاندانىپ, ادامدار جاتتىعۋعا كەلە باستادى. بىراق ولاردىڭ قاتارى تىم سيرەپ كەتتى. مۇنداي جاعدايدا نەسيەنى قالاي وتەۋگە بولادى؟ سوندىقتان مەملەكەت ءبىزدىڭ جاعدايدى ءتۇسىنىپ, پايىزسىز نەسيە ۇسىنسا نەمەسە بۇعان دەيىن الىنعان كرەديتتەردىڭ پايىز­دىق مولشەرلەمەسىن تومەن­دەتسە دەيمىز. مۇنىڭ ءبارى ءىرى كلۋبتارعا قاتىستى. ال شاعىن كلۋبتار نەگىزىنەن عيماراتتى جالعا الادى. ولار ءۇشىن جال­عا الۋ قۇنىن ايتارلىقتاي تومەن­دەتسە, كوپ كومەك بولار ەدى, – دەدى ت.سالاتينا.

بۇل ءبىر عانا ماسەلە. بۇدان بولەك كلۋبتاردىڭ كوممۋ­نال­دىق شىعىندارى مەن قىز­مەتكەرلەرگە تولەيتىن ەڭبەك­اقىسى بار.

سەنبىنىڭ سالدارى

ءدال قازىرگى جاعدايدا تاياق­تىڭ ۇشى شاعىن كلۋبتارعا قاتتىراق ءتيىپ وتىر. ولاردىڭ ءبىر بولىگى ونسىز دا «كولەڭكەدە» جۇمىس ىستەپ كەلگەن ەدى. ءبىرىنشى كەزەكتە سولار جۇمىسىن توق­تاتتى. ودان كەيىن زاڭدى تۇردە تىركەلگەن شاعىن كلۋبتار نا­رىقتان ىعىسا باستادى.

– ءىرى كلۋبتار نارىقتاعى نەگىزگى ويىنشىلار بولىپ سانالادى. ولار نەگىزىنەن ۇزاق­مەرزىمدى كەلىسىمشارتتار بو­يىن­شا جۇمىس ىستەيدى. قازىر مۇن­داي كلۋبتار ابونەمەنت­تەرىن ۇزارتىپ قانا وتىر. جاڭا كليەنت­تەرمەن تولىعىپ جاتقان جوق. ءبىزدىڭ بولجام بويىنشا, جاعداي وسىلاي جالعاسا بەرسە, نارىقتاعى شاعىن جانە ورتا كلۋبتار جۇمىسىن ءبىرجولا توق­تاتادى. مۇنداي قيىندىق ءبىز­دىڭ ەلدە عانا ورىن الىپ وتىر­عان جوق. تۇتاس الەمدەگى احۋال وسىنداي, – دەيدى قاۋىم­داستىق باسشىسى.

ءىرى كلۋبتاردىڭ دا جاعدايى اسا ءماز ەمەس. بىرىنشىدەن, ولار ەرەجەلەردى قاتاڭ ساقتاۋ ار­قىلى جۇمىس ىستەۋدە. بۇلاي جاساماسا, ايىپپۇل سالىنادى. ەكىنشىدەن, ءىرى ويىنشىلاردىڭ الدا-جالدا قاجەت بولار دەپ ساق­تاپ كەلگەن قارجىلىق قور­جىنىنىڭ ءتۇبى كورىندى. دەمەك, ولار دا شىعىنعا شىرمالا باستادى.

– شەكتەۋ شارالارىنا باي­لا­نىس­تى دەمالىس كۇندەرى كلۋب­تار جۇمىس ىستەمەي كەلدى. وسىنىڭ ءوزى ۇلكەن شىعىنعا جول اشتى. قازىر جاعداي ءبىرشاما جاقسارىپ كەلەدى. سەبەبى ءار وڭىردەگى ەپيدەميا­لىق جاعدايعا بايلانىستى فيتنەس-كلۋبتاردىڭ جۇمىسىنا رۇقسات بەرىلۋدە. قالىپتى رەجىمگە كوشۋدە. ادەتتە كليەنتتەر جات­تىعۋ جاساۋعا سەيسەنبى, بەي­سەنبى, سەنبى كۇندەرىن لايىق كورە­دى. وسىعان دەيىن سەنبى, جەك­سەنبى جۇمىس ىستەۋگە رۇقسات بەرىل­مەگەندىكتەن, كەلۋشىلەر دۇي­سەنبى-سارسەنبى-جۇما فور­ماتى­نا كوشتى. ءسويتىپ, سەنبى­نىڭ سال­­دارىنان سەيسەنبى مەن بەي­سەن­بى بوس قالدى, – دەيدى ت.سالاتينا.

قازاقستاننىڭ ءتورت قا­لا­سىن­دا جۇمىس ىستەيتىن «FitnessBlitz» فيتنەس-كلۋبتار جەلىسىنىڭ نەگىزىن قالاۋشى دا­نيار مولداحمەتتىڭ ايتۋىنشا, كومپانيا كارانتين سالدارىنان بيىل ەكى كلۋبتى جابۋعا ءماجبۇر بولىپتى.

– كومپانيانىڭ تابىسى 70 پايىزعا قىسقاردى. بۇعان نەگىزىنەن دەمالىس كۇندەرىندەگى شەكتەۋ شارالارى كەرى اسەر ەتتى. بيزنەس قازىر جار جاعاسىندا تۇر. ونىڭ جاعدايىن وسىلاي باعالاعانىمىز دۇرىس شىعار.تىعىرىقتان شىعۋ ءۇشىن كلۋبتاردى جاۋىپ, وڭتايلاندىرۋعا تۋرا كەلدى. دەمالىس كۇندەرى ءبىزدىڭ ترەنەرلەر اشىق ورىنداردا, ۆوركاۋت الاڭدارىندا جات­تىعۋ وتكىزدى. وسىلاي امال­دادىق, – دەدى دانيار مولداح­مەت جۋرناليستەرگە بەرگەن سۇحباتىندا.

ۇرەي قۇشاعىنداعى تۇر­عىن­داردىڭ ىشىندە فيتنەس-كلۋب­تارعا بارۋدان سانالى تۇردە باس تارتقاندار دا جوق ەمەس. سەبەبى مۇنداي جەردە بەتپەردەمەن تۇمشالانىپ جاتتىعۋ جاساۋ قيىن. تەرگە مالشىنعان ساتتە بەتپەردە تۇگىل, ۇستىڭدەگى كيىم­نىڭ ءوزى جايسىزدىق تانىتادى. سوندىقتان بالا-شاعاسىنىڭ اماندىعى ءۇشىن شىنىعۋدى تىنىعۋعا الماستىرعاندار كوپ.

ونلاين-جاتتىعۋ

رەسەي ساراپشىلارىنىڭ بول­جامىنشا, كورشى ەلدىڭ فيت­ن­ەس-يندۋسترياسىنداعى ويىن­شىلاردىڭ 70 پايىزى نارىق­تان ىعىسۋى مۇمكىن. ال اقش-تاعى نىسانداردىڭ 90 پايىزعا جۋى­عى قازىردىڭ وزىندە جابىلىپ قال­عان. الايدا ولار جاڭا تەح­نو­لوگيالاردى پايدالانا وتى­رىپ, ونلاين-جاتتىعۋعا كوشتى. قازاق­ستاندىق فيتنەس-ترەنەر­لەر­دىڭ دە ءبىرازى ونلاين فور­مات­قا اۋىسۋعا ءماجبۇر بولدى. ەلى­مىزدە العاشقىلاردىڭ ءبىرى بولىپ جاڭا تەحنولوگيانىڭ يگى­لىگىن ءتيىمدى پايدالانعان ترە­نەر­لەردىڭ ءبىرى – استانالىق باۋىرجان رىسبەك.

– Instagram جەلىسىندە 10 مىڭنان استام وقىرمانىم بار. ولاردىڭ ءبارى بۇلشىق ەتتەردى شىنىقتىرۋ, دۇرىس تاماقتانۋ تۋرالى جازبالارىمدى وقىپ, كادەسىنە جاراتادى. كارانتين ەنگىزىلىپ, فيتنەس-كلۋبتار جۇمىسىن توقتاتتى. كەيىن اشىق الاڭداردا جاتتىعۋ جاساۋعا رۇقسات بەرىلدى. سول ساتتەن باستاپ Instagram ارقىلى تىكەلەي ەفير جۇرگىزۋگە كوشتىم. ءسويتىپ, قازاقستاندا العاش بولىپ ونلاين-جاتتىعۋ فورماتىنا اۋىستىم. مەنەن كەيىن ترەنەرلەردىڭ ءبىرازى وسى فورمات بويىنشا جۇمىس ىستەي باستادى. باستاپقىدا تىكەلەي ەفيرگە 7 ادام كىردى. كەيىن 20 ادام قوسىلدى. سوڭىندا 40-50 ادام­دى ءبىر ساتتە جات­تىق­­تى­راتىن دەڭگەيگە جەت­تىك. تىكەلەي ەفير بارىسىندا ءاربىر ادامدى مۇقيات قاداعا­لاپ وتىرۋعا تىرىسامىن. جال­پى, بۇل وڭاي شارۋا ەمەس. قيىن­دىعى كوپ. بىراق بىلىكتى مامان قانداي جاعداي بولسىن تىعى­رىقتان شىعۋى كەرەك, – دەيدى باۋىرجان رىسبەك.

2016 جىلى ريو وليم­پيا­­داسىنا قاتىسقان قازاق بوكس­شىلارىنىڭ فيزيولوگيا­لىق دايىندىعىمەن اينالىسقان باۋىرجان رىسبەك از عانا ۋا­قىت­تىڭ ىشىندە ونلاين-جات­تى­عۋعا ارنالعان اۆتورلىق باع­­دار­لاماسىن دا ازىرلەپ ۇلگەرىپتى.

– ونلاين-جاتتىعۋ جۇرگىزۋدى ءالى دە جالعاستىرىپ جاتىرمىن. ەلدەگى ەپيدەميالىق احۋالدىڭ قالاي وزگەرەتىنى بەلگىسىز. سون­دىقتان قازىر وسى جۇمىستى قىس­تا دا جالعاستىرۋدىڭ قا­مىن جاساپ جاتقان جايىمىز بار. پاندەميا ومىرىمىزگە كوپ وزگە­رىس ەنگىزدى عوي. فيتنەس-يندۋستريا دا باعىتىن وزگەرتتى. الەمدە ونلاين-جاتتىعۋلار جەدەل دامي باستادى. ۋاقىت وتە كەلە ادامداردىڭ كوبى وسىعان كوشۋى مۇمكىن, – دەيدى ب.رىسبەك.

ونىڭ ايتۋىنشا, ونلاين فورماتقا ويىسۋدىڭ بىرنەشە سەبەبى بار.

– بىرىنشىدەن, كلۋبتا دا­يىندالاتىن ادام كانىگى روبوت سەكىلدى جۇمىس ىستەيدى. ايتىلعان دۇنيەنى عانا قايتالايدى. ال دالاداعى جاتتىعۋ الدەقايدا ەركىندەۋ. ەكىنشىدەن, كلۋبتا جاتتىعاتىن ادامداردىڭ دەنى «دۇرىس ىستەپ جاتىرمىن با؟», «مىنالار مەنەن سىمباتتىراق ءارى كۇشتىرەك» دەپ قىسىلىپ-قىمتىرىلىپ جۇرەدى. اشىق الاڭداعى جاتتىعۋدا مۇنداي ويدان ارىلاسىز. ۇشىنشىدەن, كلۋبتا ۇلدار دا, قىزدار دا بىرگە جاتتىعادى. دەمەك, ادامنىڭ ويى اراگىدىك باسقا دۇنيەگە اۋىپ كەتەدى. تورتىنشىدەن, قازىر قالانىڭ كەز كەلگەن اۋلاسىندا جاتتىعۋ جاساۋعا ارنالعان ورىندار بار. تەر سىڭگەن كلۋبقا بارۋدىڭ قاجەتى شامالى, – دەيدى استانالىق مامان.

وكىنىشكە قاراي, وتاندىق فيتنەس-ترەنەرلەردىڭ بارلىعى دەرلىك كارانتين ۋاقىتىندا تىعىرىقتان شىعۋدىڭ امالىن قاراستىرماعان سىڭايلى. ايتپەسە ادەپكى جۇمىستى اشىق الاڭدا دا جالعاستىرۋعا مۇم­كىندىك بار ەكەنىنە كوزىمىز جەتىپ وتىر. مۇنى جالقاۋلىق دەيمىز بە؟ الدە كاسىبي كەم­شىلىككە جاتقىزعان ءجون بە؟

سول سەكىلدى فيتنەس-كلۋب­تار­دىڭ دا ارەكەتسىزدىگىنە تاڭ­عا­لۋعا بولادى. الەمنىڭ وزگە ەلدەرىندەگى فيتنەس-يندۋست­ريا باعىتىن وزگەرتىپ امالداپ جاتقاندا, وتاندىق سالا وكىلدەرىنىڭ ومالىپ وتىرعانى ءتۇرلى ويعا جەتەلەيدى. قالاي دەسەك تە, فيتنەس-يندۋستريا ەندى بۇرىنعىداي بولمايدى. پاندەميا فيتنەس-كلۋبتاردىڭ ءوزىن زامان اعىمىنا ساي شىنى­عۋعا شاقىرعانداي...