مينيستر ءىسساپار بارىسىندا ورتالىق جۇمىسىنىڭ ناتيجەسىمەن تانىستى. ون ەكى جىل ىشىندە نەيروحيرۋرگيا دارىگەرلەرى 32 مىڭنان استام وپەراتسيا جاساپ, 70-كە جۋىق جاڭا نەيروحيرۋرگيالىق تەحنولوگيا ەنگىزىپ, سونىڭ ارقاسىندا جاعدايى وتە اۋىر ناۋقاستاردى, سونىڭ ىشىندە بالالاردى اياققا تۇرعىزدى.
دەنساۋلىق ساقتاۋ ءمينيسترى ورتالىقتاعى دياگنوستيكالىق جانە كلينيكالىق بولىمشەلەردىڭ جۇمىسىمەن تانىسىپ, جاس ماماندارمەن بەيرەسمي كەزدەسۋ وتكىزدى. بۇدان باسقا, مينيستر سيمۋلياتورلاردا وقىتۋ كۋرستارىن وتكىزۋ ءۇشىن قۇرىلعان ترەنينگتىك ورتالىقتى ارالاپ شىقتى جانە مي گليومالارىن زەرتتەيتىن عىلىمي جوبا اياسىندا قۇرىلعان ورتالىق جانىنداعى بيوبانكتىڭ جۇمىسىن كوردى.
الەكسەي تسوي ترانسفۋزيولوگيا بولىمىندە دە بولدى. وسى بولىمشەنىڭ ماماندارى وزدەرىنىڭ نەگىزگى جۇمىسىنان باسقا, قان ۇنەمدەۋ تەحنولوگيالارى: اۋتوەريتروتسيتتەردىڭ ينتراوپەراتسيالىق اپپاراتتىق رەينفۋزياسى, گەموستازدى ينتەگرالدى باعالاۋ – ترومبوەلاستوگرافيا سياقتى بىرەگەي ەكسپەريمەنتتەر جۇرگىزۋدە.
گوسپيتالدىق فارماتسيا بولىمشەسىندە ماماندار ەمدەۋدىڭ تيىمدىلىگىن ارتتىراتىن جانە دارىلىك زاتتاردى ۇتىمدى پايدالانۋعا مۇمكىندىك بەرگەن جاڭا تەحنولوگيانىڭ ناتيجەسى تۋرالى باياندادى.
سونداي-اق, دەنساۋلىق ساقتاۋ ءمينيسترى راديولوگيا بولىمىنە دە بارىپ, وندا انگيوگرافيالىق وپەراتسيالىق بولمەنىڭ جۇمىسىمەن جانە گامما-پىشاق جۇمىس ىستەيتىن جەكە بلوك قۇرىلىسىنىڭ بارىسىمەن تانىستى.
ساپار سوڭىندا قر دەنساۋلىق ساقتاۋ ءمينيسترى ا.تسوي ورتالىقتىڭ جۇمىسىن جوعارى باعالاپ, ۇجىمنىڭ ەڭبەگىنە تابىس تىلەدى.
